Ruth 1

Kikuyu Bible (IBUKU RĨRĨA ITHERU RĨA NGAI)

Jump to: Chapter 2 →

1NA GŨGĨKINYA atĩrĩ, atĩ matukũ marĩa atiirĩrĩri-bũrũri maaciragĩra andũ, gũgĩkorũo kwarĩ ng’aragu bũrũri ũcio. Nake mũndũ ũmwe wa Bethi-lehemu-juda agĩthiĩ gũtũũra e mũgeni bũrũri wa Moabi, marĩ na mũtumia wake, o na ariũ ake erĩ.

2Nake mũndũ ũcio etagwo Elimeleku, o nake mũka etagwo Naomi, namo marĩĩtwa ma ariũ acio ake erĩ, nĩ Mahaloni, na Kilioni, nao maarĩ Aefiratha a kũu Bethi-lehemu-juda. Magĩgĩkinya bũrũri wa Moabi, magĩtũũra kuo.

3Nake Elimeleku, mũthuriwe wa Naomi, agĩkua; nake agĩgĩtigwo na ariũ acio ake erĩ.

4Nao makĩĩgũrĩra aka thĩinĩ wa airĩtu a Moabi; nao ũmwe etagwo Oripa, na ũrĩa ũngĩ etagwo Ruthu; nao magĩgĩtũũra kũu ta mĩaka ikũmi.

5Nao Mahaloni na Kilioni magĩkua erĩ; mũndũ-wa-nja ũcio agĩgĩkuĩrũo nĩ ciana icio ciake cierĩ, o na mũthuriwe.

6Nake agĩgĩũkĩra, me na aka acio a ariũ ake, nĩ getha acoke kwao, oime bũrũri ũcio wa Moabi; nĩ ũndũ arĩ o kũu bũrũri ũcio wa Moabi nĩaaiguĩte ũrĩa Jehova aririkanĩte andũ ake, akamahe irio.

7Nake agĩkiumagara, akiuma kũu, marĩ na aka acio erĩ a ariũ ake; makĩgwata njĩra, nĩguo macoke bũrũri wa Juda.

8Nake Naomi agĩkĩĩra aka acio erĩ a ariũ ake atĩrĩ, Wĩthiĩrei, mũndũ o mũndũ acoke nyũmba ya nyina; Jehova aromwĩka maũndũ mega, o ta ũrĩa na inyuĩ mwekire acio maakuire, o na niĩ, niĩ mwene.

9Jehova aroetĩkĩra muone handũ ha gũikara mũhoreire, o mũndũ wanyu, mwĩ thĩinĩ wa nyũmba cia athuri anyu. Agĩkĩmamumunya, nao makĩanĩrĩra makĩrĩra.

10Magĩkĩmwĩra atĩrĩ, Aca-ni, no nĩtũgũcokania nawe kwa andũ anyu.

11Ningĩ Naomi akĩmera atĩrĩ, Aarĩ akwa, wĩhũndũkĩrei; mũgũkĩnũmĩrĩra nĩkĩ? Kaĩ o na rĩu, ndĩkĩrĩ na ihĩĩ nda yakwa nĩguo igagĩtuĩka athuri anyu?

12Wĩhũndũkĩrei, aarĩ akwa, mwĩthiĩre, amu niĩ ndĩ mũkũrũ mũno; ndingĩcoka kũgĩa na mũrũme. Ningĩ-rĩ, o na ingĩkiuga atĩ ndĩ na mwĩhoko wa gũciara, o na ingĩgĩa na mũrũme ũtukũ ũyũ wa ũmũthĩ, ngaciara ihĩĩ-rĩ,

13kaĩ mũngĩgĩcieterera o nginya hĩndĩ ĩrĩa igakũra? Githĩ mwakĩhota kwĩhinga arũme nĩ ũndũ wacio? Kũroaga gũtuĩka ũguo, aarĩ akwa; nĩ ũndũ ruo rũrĩa ndĩ naruo nĩ ũndũ wanyu nĩ rũnene mũno; nĩ ũndũ guoko kwa Jehova nĩ gũtambũrũkie kũnjũkĩrĩre.

14Nao magĩkĩanĩrĩra makĩrĩra rĩngĩ; nake Oripa akĩmumunya nyaciarawe; no Ruthu akĩrũmanĩrĩra nake.

15Nake agĩkĩmwĩra ũũ: Atĩrĩrĩ, ta rora, mũka wa mũrũ wa nyina na mũthuriguo nĩaahũndũka, acoke kũrĩ andũ ao, o na kũrĩ ngai yake; tondũ ũcio o nawe garũrũka wĩthiĩre ũrũmĩrĩre mũka ũcio wa mũrũ wa nyina na mũthuriguo.

16Nake Ruthu agĩkĩmwĩra atĩrĩ, Tiga kũningĩrĩria ngũtige, atĩ nĩguo ngarũrũke ndige gũkũrũmĩrĩra; nĩ ũndũ-rĩ, o kũrĩa ũgathiĩ, nokuo niĩ o na niĩ ngathiĩ, na kũrĩa ũgatũũra, nokuo niĩ o na niĩ ngatũũra, nao andũ anyu no-o magatuĩka andũ aitũ, nake Ngai waku nowe ũgatuĩka Ngai wakwa,

17na kũrĩa ũgakuĩra nokuo niĩ na niĩ ngakuĩra, na nokuo ngathikwo. Jehova aro’thũũra, o na anjĩke ũũru makĩria, kũngĩkagĩa ũndũ o na ũmwe ũgũtũtigithania nawe tiga o gĩkuũ giiki!

18Na rĩrĩ, hĩndĩ ĩrĩa onire atĩ nĩomĩtie ngoro agacirĩra gũtwarana nake-rĩ, agĩtiga gũcoka kwaria nake, agĩĩkirĩra.

19Tondũ ũcio magĩgĩthiĩ o erĩ, o nginya magĩkinya Bethi-lehemu. Na gũgĩkinya atĩrĩ, atĩ hĩndĩ ĩrĩa maakinyire Bethi-lehemu, andũ a itũũra rĩu othe makĩgega nĩ ũndũ wao, nao andũ-a-nja magĩkiuga atĩrĩ, Hĩ! Ĩ ũyũ nĩ Naomi?

20Nake akĩmera atĩrĩ, Tigai gũcoka kũnjĩta Naomi; njĩtagai Mara, nĩ ũndũ Ngai Mwene-Hinya-Wothe nĩanjĩkĩte maũndũ ma kũ’he ruo mũno.

21Tondũ-rĩ, ngiuma gũkũ ndathiire njiyũrĩtwo nĩ maũndũ mega, nake Jehova aanyinũkia gwitũ mũciĩ ndĩ mũtheri; kaĩ mũgũkĩnjĩta Naomi nĩ ũndũ kĩ, kuona atĩ Jehova nĩangarũkĩte, o nake ũrĩa Mwene-Hinya-Wothe aka’he ruo?

22Ũguo nĩguo Naomi aahũndũkire kwao; nake Ruthu, Mũmoabi ũcio mũka wa mũriũ, o ũcio maahũndũkire nake makiuma bũrũri wa Moabi, akĩinũka nake, nao magĩgĩkinya Bethi-lehemu hĩndĩ ĩrĩa cairi yaambĩrĩirie kũgethwo.

Jump to: Chapter 2 →