Ruth 4

Kikuyu Bible (IBUKU RĨRĨA ITHERU RĨA NGAI)

← Chapter 3 Jump to:

1Nake Boazu akĩambata agĩkinya kĩhingo-inĩ gĩa itũũra agĩikara thĩ ho; na atĩrĩrĩ, mũndũ ũcio ũngĩ wa arĩa mangĩmathambia, o ũcio waheanĩtwo ũhoro wake nĩ Boazu, akĩhĩtũkĩra hau; nake Boazu akĩmwĩra atĩrĩ, Nĩwe, ng’ania! Ta garũrũka ũikare thĩ haha. Nake agĩkĩgarũrũka agĩikara thĩ.

2Nake agĩkĩnyita andũ ikũmi thĩinĩ wa athuri a itũũra, akĩmera atĩrĩ, Ta ikarai thĩ haha. Nao magĩgĩikara thĩ.

3Agĩkĩĩra mũndũ ũcio wa arĩa mangĩmathambia atĩrĩ, Naomi, ũcio ũracokire gũkũ oimĩte bũrũri wa Moabi, nĩekwendia gĩcigo gĩa gĩthaka kĩrĩa kĩarĩ kĩa Elimeleku, mũrũ wa ithe witũ;

4na niĩ ndagĩĩciria nguumbũrĩre ũhoro ũcio, ngwĩre atĩrĩ, Gũrĩra gĩthaka kĩu o haha mbere ya athuri aya, o na athuri a andũ aitũ. Ũngĩkorũo nĩũgũgĩkũũra-rĩ, gĩkũũre; no rĩrĩ, ũngĩkorũo ndũgũgĩkũũra-rĩ, ũgĩcoke ũnjĩre, nĩguo ’menye ũhoro ũcio; nĩ ũndũ hatirĩ mũndũ ũngĩ o na ũrĩkũ ũngĩgĩkũũra tiga wee; na niĩ nĩ niĩ ndĩ thutha waku. Nake agĩkiuga atĩrĩ, Nĩngũgĩkũũra.

5Nake Boazu agĩkiuga atĩrĩ, Mũthenya ũrĩa ũkagũra mũgũnda ũcio he Naomi-rĩ, ndũrĩ hingo ũtakaũgũra he Ruthu, Mũmoabi, o nake; ũcoke ũthambie mũka wa ũcio wakuire, nĩ getha ũtũũrie rĩĩtwa rĩa mũndũ ũcio mũkui ũgai-inĩ wake.

6Nake mũndũ ũcio wa arĩa mangĩmathambia agĩkiuga atĩrĩ, He! Ndikĩhota gũgĩkũũra ndĩgĩtware arĩ niĩ, nĩ getha hihi ndigethũkĩrie ũgai wakwa niĩ mwene; nĩndakũrekera ithenya rĩakwa rĩa ũkũũri, nĩ ũndũ ndikĩhota gũgĩkũũra.

7Na rĩrĩ, mũtugo ũrĩa wakĩrĩ kũu Isiraeli tene ũkoniĩ gũkũũra na gũkũũrania indo, nĩguo maũndũ mothe mahingio wega-rĩ, nĩ ũyũ, atĩ mũndũ ũmwe wa arĩa me na ũhoro nĩ kũruta aarutaga kĩratũ gĩake, agakĩnengera ũcio ũngĩ; ũndũ ũcio nĩguo andũ a Isiraeli maamenyerete gwĩka nĩ getha ũhoro ũgĩe na ũira mũtĩtĩrithie.

8Naguo ũguo noguo gwagĩkinyire, atĩ mũndũ ũcio wa arĩa mangĩmathambia agĩkĩĩra Boazu atĩrĩ, Wĩgũrĩre ng’ũndũ ĩo arĩ wee. Nake agĩkĩruta kĩratũ gĩake.

9Nake Boazu agĩkĩĩra athuri acio, o na andũ othe arĩa maarĩ ho atĩrĩ, Nĩ inyuĩ aira ũmũthĩ, atĩ nĩndagũra he Naomi indo ciothe iria ciarĩ cia Elimeleku, o na iria ciothe ciarĩ cia Kilioni, o na cia Mahaloni.

10O na ningĩ-rĩ, Ruthu, ũcio Mũmoabi, mũka wa Mahaloni, nĩndamũthambia nĩguo ndũũrie rĩĩtwa rĩa mũkui ũgai-inĩ wake, nĩ getha rĩĩtwa rĩa mũkui rĩtikore biũ, rĩage gũkanaririkanwo nĩ ariũ a ithe wao, o na kĩhingo-inĩ gĩa itũũra rĩrĩa aatũire; inyuĩ nĩ inyuĩ aira ũmũthĩ.

11Nao andũ acio othe maarĩ kĩhingo-inĩ, o na athuri, magĩkiuga atĩrĩ, Nĩ ithuĩ aira. Jehova arotũma mũndũ-wa-nja ũcio ũgũũka gwaku mũciĩ atuĩke o ta Rakeli, o na ta Lea, atumia arĩa erĩ maahandire nyũmba ya Isiraeli; ningĩ o nawe ũrotuĩka gĩtonga kũu Efiratha, o na ũgĩe igweta mũno kũu Bethi-lehemu;

12o nayo nyũmba yaku ĩrogatuĩka ta nyũmba ya Perezu, ũrĩa Tamaru aaciarĩire Juda, nĩ ũndũ wa mbeũ ĩrĩa Jehova agakũhe yumĩte he mũirĩtu ũcio.

13Tondũ wa maũndũ macio, Boazu agĩtwara Ruthu agĩtuĩka mũka, agĩcoka akĩonana nake, nake Jehova agĩtũma Ruthu agĩe ihu, agĩciara kahĩĩ.

14Nao andũ-a-nja arĩa angĩ a itũũra rĩu makĩaria na Naomi, makiuga atĩrĩ, Jehova arogathwo, o we ũrĩa ũtagũtigĩte ũtarĩ na mũthambania ũgũkoniĩ ũmũthĩ, narĩo rĩĩtwa rĩa kahĩĩ kau rĩrogĩa igweta thĩinĩ wa Isiraeli.

15Kau nĩko gagatũma ũcoke kwĩigua, na nĩko gagagũtiirithagia wakũra; nĩ ũndũ mũka wa mũrũguo ũcio ũkwendete mũno, agakwenda gũkĩra ihĩĩ mũgwanja, nĩwe ũgaciarĩte.

16Nake Naomi agĩkĩoya kaana kau, agĩkaigĩrĩra gĩthũri-inĩ gĩake, agĩtuĩka mũreri wako.

17Nao andũ-a-nja arĩa angĩ a itũũra rĩao magĩgatua rĩĩtwa, makiuga atĩrĩ, Naomi nĩaciarĩirũo kahĩĩ; magĩgatua Obedi; nake nĩwe ithe wa Jesii, ũrĩa ithe wa Daudi.

18Na rĩrĩ, njiaro cia Perezu nĩcio ici:

19Perezu aaciarire Hezironi, nake Hezironi agĩciara Ramu, nake Ramu agĩciara Aminadabu,

20nake Aminadabu agĩciara Nahashoni, nake Nahashoni agĩciara Salimoni,

21nake Salimoni agĩciara Boazu, nake Boazu agĩciara Obedi,

22nake Obedi agĩciara Jesii, nake Jesii agĩciara Daudi.

← Chapter 3 Jump to: