Zechariah 10

Kikuyu Bible (IBUKU RĨRĨA ITHERU RĨA NGAI)

← Chapter 9 Jump to: Chapter 11 →

1Atĩrĩrĩ, hoyai Jehova mbura ihinda rĩa mbura ya gũkũria irio, mũmĩhoe harĩ Jehova ũrĩa ũthondekaga heni; nake nĩakoirithanĩria mbura ya kũigana, na ahe mũndũ o wothe irio cia mũgũnda.

2Nĩ ũndũ mĩhianano ya kũhoya ngai nayo ya mũndũ o mũndũ nĩ kwaria yarĩtie ndeto cia tũhũ, nao aragũri makona ũragũri wa maheni; arĩa marotaga iroto-rĩ, no kũhenania mahenanagia makĩaria ũhoro wacio, nao mahoreragia andũ ngoro na maũndũ ma tũhũ. Tondũ ũcio andũ nĩ kũũrũra morũraga ta ng’ondu; nĩ anyarirĩku, nĩ ũndũ matirĩ na mũrĩithi.

3Marakara makwa nĩ maakanu nĩ ũndũ wa arĩithi, na nĩ kũherithia ngaherithia thenge icio, nĩ gũkorũo Jehova Mũnene wa Ita nĩaceereire mbũri cia rũũru rũake, nacio nĩcio andũ a nyũmba ya Juda, nake nĩakamamenyerera ta marĩ mbarathi yake ĩrĩa njega mũno ya mbaara.

4Ũrĩa ũgatuĩka ta ihiga rĩa koine akoima kũrĩ we, o nake ũrĩa ũgatuĩka ta mũcumarĩ oime o harĩ we; ningĩ ũrĩa ũgatuĩka ta ũta wa mbaara o nake akoima o harĩ we, o na mũndũ o wothe wa gwathana oime harĩ we, othe o ũndũ ũmwe.

5Nao matuĩke ta makarau, marangagĩrĩrie thũ ciao ndaka-inĩ ya njĩra hĩndĩ ya mbaara; nao nĩmakarũa mbaara, nĩ ũndũ Jehova agakorũo e hamwe nao, nao andũ arĩa mathiaga mahaicĩte mbarathi magũnyare nĩ guoya.

6Na nĩngekĩra andũ a nyũmba ya Juda hinya, na ’honokie andũ a nyũmba ya Jusufu, na ndĩmacokie kwao, nĩ ũndũ nĩndĩmaiguĩrĩire tha; na nĩmakonagwo o ta itaamatirikĩte, nĩ gũkorũo niĩ nĩ niĩ Jehova Ngai wao, na nĩngamaigua.

7Nao andũ a Efiraimu magatuĩka ta mũndũ karau, nacio ngoro ciao ikenũrũrũke ta manyuĩte ndibei; ĩĩ, ti-itherũ ciana ciao nĩikona ũndũ ũcio, ikenũrũrũke, nacio ngoro ciacio ikenagĩre Jehova.

8Nĩ gwĩta ngameta na iyũ, ndĩmonganithie, nĩ ũndũ nĩndĩmakũũrĩte; nao nĩmarĩongererekaga o ta ũrĩa mongererekaga tene.

9O na harĩa ndamaharaganĩirie ndũrĩrĩ-inĩ, nĩmagacoka kũndirikana marĩ mabũrũri-inĩ ma kũraya; na matũũre muoyo me na ciana ciao, na macoke kwao.

10Ningĩ-rĩ, ngamacokia kwao ndĩmarutĩte bũrũri wa Misiri, o na ndĩmonganie ndĩmarutĩte Ashuri, ndĩmatware ndĩmakinyie bũrũri wa Gileadi, o na Lebanoni, o nginya haage handũ ha kũiganĩrũo nĩo.

11Nake akagera iria-inĩ rĩa mathĩna, na ahũre makũmbĩ ma maĩ, namo maĩ marĩa mariku ma rũũĩ rũa Nili mahũe biũ; naguo mwĩtĩo wa Ashuri ũhwererekere, o naguo mũthĩgi wa Misiri wa wathani ũthenge.

12Na niĩ nĩngamomirĩria ndĩmekĩre hinya uumĩte harĩ Jehova; nao macange ũũ na ũũ kũndũ guothe makĩgwetaga rĩĩtwa rĩake; ũguo nĩguo Jehova ekuuga.

← Chapter 9 Jump to: Chapter 11 →