Zechariah 13

Kikuyu Bible (IBUKU RĨRĨA ITHERU RĨA NGAI)

← Chapter 12 Jump to: Chapter 14 →

1O na ningĩ mũthenya ũcio-rĩ, nĩgũgathikũrio gĩthima nĩ ũndũ wa andũ a nyũmba ya Daudi, o na ũndũ wa andũ arĩa matũũraga Jerusalemu, nĩguo mathambio na mathirũo nĩ mehia, o na mathahu.

2Na nĩgũgakinya atĩrĩ, mũthenya ũcio, atĩ nĩnganina ũhoro wa kũgwetwo mĩhianano bũrũri ũcio, ndĩũnine biũ, nayo ndĩgacoka kũririkanwo rĩngĩ o na rĩ; ũguo nĩguo Jehova Mũnene wa Ita ekuuga. O na ningĩ nĩngatũma anabii moime bũrũri ũcio, hamwe na roho ũrĩa mũũru wĩ thĩinĩ wao.

3Na nĩgũgakinya atĩrĩ, atĩ hĩndĩ ĩrĩa mũndũ o na ũrĩkũ agakorũo o akĩrathaga mohoro, hĩndĩ ĩo ithe na nyina arĩa maamũciarire makamwĩra atĩrĩ, Ndwagĩrĩirũo nĩ gũtũũra muoyo, nĩ ũndũ nĩ kwaria ũraaria ndeto cia maheni ũkĩgwetaga rĩĩtwa rĩa Jehova; nao ithe na nyina, o acio amũciari, mamũthece na rũhiũ kĩngwete o akĩratha mohoro.

4Na nĩgũgakinya atĩrĩ, mũthenya ũcio, atĩ anabii nĩmagaconoka, mũndũ o mũndũ wao aconoke nĩ ũndũ wa kĩoneki gĩake rĩrĩa ekũratha mohoro; o na ningĩ matikehumba nguo irĩ maguanyĩrĩ nĩguo mahenie andũ.

5No nĩ kuuga akoiga atĩrĩ, Niĩ ndirĩ mũnabii, ndĩ mũrĩmi mũgũnda, nĩ ũndũ nĩndatuirũo ngombo kuuma ndĩ o mũnyinyi.

6Nake mũndũ angĩkamũũria atĩrĩ, Nguraro ici ii gatagatĩ ka moko maku-rĩ, kaĩ irĩ cia kĩ? Hĩndĩ ĩo nake agacokia atĩrĩ, Nĩ iria ndaguraririo ngĩhingũria nyũmba cia anyanya akwa.

7Atĩrĩrĩ, wee rũhiũ rũa njora, ũrocomorũo wambararĩrio mũrĩithi wakwa, o we mũndũ ũrĩa wakwa; ũguo nĩguo Jehova Mũnene wa Ita ekuuga. Ringa mũrĩithi, nacio mbũri ihurunjũke; na niĩ ngarũre guoko gwakwa ndĩkũrorie harĩ iria nyinyi.

8Na nĩgũgakinya atĩrĩ, atĩ bũrũri wothe-rĩ, icunjĩ igĩrĩ cia andũ aguo nĩ kũninwo ikaninwo ikue, no gĩcunjĩ gĩa gatatũ gĩtigio kuo; ũguo nĩguo Jehova ekuuga;

9nakĩo gĩcunjĩ kĩu gĩa gatatũ nĩngakĩhĩtũkithĩria mwaki-inĩ, na ndĩgĩtherie o ta ũrĩa betha itheragio, na ndĩkĩgerie o ta ũrĩa thahabu ĩgeragio; nao nĩmarĩkayagĩra rĩĩtwa rĩakwa, na niĩ ndĩmaigue, njoke njuge atĩrĩ, Aya nĩo andũ akwa; nao moige atĩrĩ, Jehova nĩwe Ngai wakwa.

← Chapter 12 Jump to: Chapter 14 →