Proverbs 27

Kalenjin 2019 (Bukuit Ne Tilil)

← Chapter 26 Jump to: Chapter 28 →

1Amechaugei agobo mutai; amu mengen kiit ne piitu eng' peetuut age tugul.

2Ingolasun age, amelasuge; ingolasun toondet, amelasuge.

3Nyigiis koita, nyigiisen ng'aniek; ago siirei chooto tugul nereegegap ne perber.

4Korom nereeknateet, koroomen miising' nereegek; ago ng'oo ne imuuchi kotonon eng' taitap ng'etkonda?

5Kaigai kereetap kong' ne taagu kosiir chamyet ne kiunyei.

6Po iman kaguotenetap chorweet; ago chaang' ng'ututosyegap puunyoot.

7Wechei masamek chiito ne piyong'ot; ago anyiny kiy age tugul ne ng'waan eng' chiito ne amei rubo.

8Uu toriityon ne ng'eete keswennyi koombenoti, chiito ne ng'eete oldanyi koombenot.

9Iboiboi muguleldo mwanik ak nyamdutik; iboiboi ko uu nooto anyinyindap chorweetap chii ye toreti ineendet.

10Amemete chorweng'ung', ak chorweetap kwandang'ung'; amewe kootap ng'eetap kamenng'ung' eng' peetuutap nyalildang'ung'. Kaigai chiitap kokweng'ung' ne neegit kosiir ng'eetap kamenng'ung' ne mi ole loo.

11Weeriinnyu, egu utaat, ak ibaibai muguleldanyu, si amuuch awolji ineendet ne iteweera.

12Keerei chiito ne ng'oom yaityet, ak kounygei; ago siirtoi abusanik, ak konyoor nyalilda.

13Nam ngoryeetap ineendet ne tononjin toondet; ak inam ineendet koek kaarorunet ne tononjin toondet.

14Ineendet ne iberuuri chorwennyi eng' kutit ne oo, kong'eetei karon miising', ki iti koek chubisyet kaberuronooto eng' ineendet.

15Kergei ropta ne inesi eng' peetuutap ropta ak kwondo ne poliin.

16Ineendet ne leen kirindoi kwonyooto, kogirindoi usoonet, ak komumute mwaita eunnyi ne po tai.

17Litei karnet, karnet; litei ko uu nooto chii togeetap chorwennyi.

18Age tugul ne riibei mogoywet koamei logoekyik, ak kitoroori ineendet ne riibei kiptaiyandennyi.

19Ko uu ye keerei chii togeennyi eng' peek, ko uu nooto keerei muguleldap chii, ne po chiito age.

20Ma koi piyo yemi piik che ki kobek ak ng'emisyet; ma koi piyo konyegap chii.

21Kitiliili fedha eng' tereet, kitiliile thahabu `maat ne oo, ak kityeme chii kalasunennyi.

22Agot ngitui chiito ne perber eng' kenut kobooto peek che kagitartaran, koma istoige perberyennyi kora.

23Igiilgei si inai ole teptoi akwotisyegap keechiireguk, riip komyee akwotisyegap tuguuk.

24Amu ma po koigeny mogornatosyek, ama tebyei naaryeetap pounateet eng' ibinwek tugul.

25Ki ibei susweek che ki koyaamnyo, ak piitos susweek che ng'orng'or, ak kiyumi sogeek che po tuloonook.

26Po ngoroiguk aaregap keechiir, ak ng'oroorek ko alyetap mbar;

27miitei cheegap ng'oroorek che yamei koek amitwogiguk, ak che po piigap koong'ung'; ak amitwogik che yamei tiibiiguk.

← Chapter 26 Jump to: Chapter 28 →