Proverbs 5

Kalenjin 2019 (Bukuit Ne Tilil)

← Chapter 4 Jump to: Chapter 6 →

1Weeriinnyu, kas utaatyennyu; epchi iit kaguiyennyu,

2si kobiit iriip naet ne myee, si koriip `kuting'ung' naet.

3Amu kutitap chepkugoniot kosaune kumyat, ak ng'aleekyik ko tangusen kosiir mwai;

4ago ng'waan kagesunennyi ko uu ng'wonet, ng'atip ko uu rotwetap chok ne ng'atiben komoswek tuwai.

5Choorchingei keelyekyik meet; namegei kakwautikyik ak ye mi che ki kobek,

6Ma nyooru ineendet ooreet ne litit ne po saboondo; ma tononiotiin ortinwekyik, ama naei.

7Ogasa anyun, werchu, amoistoegei ng'aleek che amwae.

8Iste oreng'ung' kolooit eng' korgonooto, ameriikyi kurgeetap koonnyi,

9si megoochi teegistang'ung' piik alak, ak igoochi kenyisyeguk piik che kolgol;

10si ma nyoor kobaibaegei toek kimnateng'ung'; si ma tebee poisyoniguk che kiimeen kootap toondet;

11si iriir let, ye kang'emak panyeeguk ak poortang'ung',

12ak imwa ile, “Tya weget ne ki awech kergong'yet, ak saset ne ki sas muguleldanyu kateunet!

13Ama agas iit kaneetikyuk, ama epchi iit piik che ki ineeta.

14Nguno ko kaariikyi yaityet tugul eng' kwenutap tuiyet ak kayumetapkei.”

15Ee peek che mi tereeng'ung', peek che rootei eng' keriingeng'ung',

16Tos kanyool koseergei kondametusyeguk po peek eng' olo tugul, ainoosyeguk po peek eng' ortinwek?

17Ingobunjin inyee inyegei, amat kobunji toek che mi kobooten.

18Ingoberuurok kondametung'ung' po peek, ak paibaitune osotyotap ming'inateng'ung',

19uu kenyeleet ne karaaran ak sitwet ne tala. Ingoyamin kinaikyik kotugul, ak paibaitune chamyennyi kotugul.

20Weeriinnyu, amu nee si ibaibaegei chepkugoniot, ak isuup tegetap chepkugoniot?

21Amu ortinwegap chii ko keerei Kamuktaindet ne Toroor ak koriibei mitainik tugul che po chiichooto.

22Namei `kiptengekyot yaitwogikyik, ak keratee ineendet poroonigap tengektanyi.

23Meei ama tinyei atep ne myee, ak petei amu ooindap perberyennyi.

← Chapter 4 Jump to: Chapter 6 →