Acts 14

Kalenjin Bible Revised (BUKUIT NE TILIIL Sireet ne Dutero Kanon)

← Chapter 13 Jump to: Chapter 15 →

1Ye kingo mi Paulo ak Barnaba Ikonio, ko ki pa sinagogitap Yahudik ak kong'alaal kot koyan tuiyet ne oo ne po Yahudik ak Yunanik.

2Ago kiim Yahudik che kibistoik saboonwegap Pororyosyek kot kogoochi kowech tupchosyek.

3Ki tebee olooto anyun peetuusyek che chaang' ak kong'alaali eng' nyiganateet agobo Kiptaiyat, ne kibaoryanji ng'olyootap myeeindonyi ak kogoochin koyaak kaboorunoik ak kwang'utik eng' eunekwak.

4Ago kipcheigei tuiyet ne po nganaseet; ak ki namgei alage ak Yahudik, konamgei alage ak che kiyooktoi.

5Ak ye kimachei Pororyosyek ak Yahudik kobooto pounikwak kobookyi icheek, kole koyachi ne ya, ak kolach eng' koik,

6kosip konai, ak kimwechi Lystra ak Derbe, nganasook che po Lukaonia, ak korotinwek che neegitee olooto,

7ak ki amda logoiywek che myach eng' olooto.

8Ki mi chii age eng' Lystra ne ki ma ko kiimeen keelyekyik ak ki tomo kowendot, amu ki salamwo kobooch komi moetap kamet.

9Ki kas chiichooto Paulo kong'alaali. Ak kingo ochiilji kong' `Paulo chiichooto, ak kogeer kole tinyei kayaneet ne kimuuchi kisoop,

10komwa eng' kutit ne oo kole, “Tonon komyee eng' keelyeguk.” Ak kitoromben ak kowendot.

11Ak kingo keer tuiyosyek kiit ne kayai Paulo, kobolyo eng' ng'aleegap Lukaonia, kole, “Kachorchechkei kamuktaik eng' kergeindap piik.”

12Ak kiguure Barnaba, Seu; koguure Paulo, Herme, amu ki ng'alaalindet ne oo ineendet.

13Ak tisiindetap Seu ne ki mi hekalunnyi taitap nganaseet ko kiget tuuga ak sinendoik kobwa kurgotik, ak kimachei ineendet kobooto tuiyosyek kogoito tiseiywot.

14Ago ye kingo kas agobo nooto che kiyooktoi Barnaba ak Paulo kogereer ngoroikwak ak korwai koba kwenutap tuiyet, koboldos koleen,

15“Choronochu, kalya si oyai tuguuchu? Ki piik agacheek che kergei ak okweek, ak kagiibwok logoiywek che myach, si kobiit oweeige omete tuguuchu ma tilei kiy ak obwonji Kamuktaindet ne sabei, ne kiyaei kipsengwet ak ng'wony ak araraita ak tugul che mi olooto.

16Ki pagaakyi `ineendet pororyosyek tugul eng' ibinwek che ki kosiirto kobendat eng' ortinwekwak.

17Ago ki ma tebi puch ineendet ama tinyei paorya, amu ki yai ne myee, ak kogoonok ropta ne punu kipsengwet ak peetuusyegap rurateet, kogoochin kobiyong'so mugulelwekwok eng' amitwogik ak kaagaasetapkei.”

18Agot eng' ng'aleechu ki mwa, ko ki neegit kotemenee kogirinda icheeget si mata kogoochi icheek tiseiywot.

19Ago ki pwa Yahudik che ki punu Antiok ak Ikonia ak kolom tuiyosyek. Kilach `icheek Paulo eng' koik, ak kochuut komanda eng' nganaseet, koleen kagome.

20Ago ye kitonondos kasubik ko kayiem ineendet, kong'eet ak kwo nganaseet. Eng' peetuut ne ki isubi nooto koba Derbe ak Barnaba.

21Ye kingo kagoamji logoiywek che myach nganasanooto, ak ko kagoyai che chaang' koek kasubik, koweektagei koba Lystra, ak Ikonia, agoi Antiok.

22Ki igimitoti saboonwegap kasubik, ko ki ili koba tai eng' kayaneet ak koleenji, “Kanyool keit laitornatetap Kamuktaindet eng' nyalilwogik che chaang'.”

23Ak kingo kagolewenji icheek `poisyek eng' kaniset age tugul, kosa eng' karugutetapkei, konde icheek eutap Kiptaiyat ne kiga koyan.

24Ki pa kobun Pisidia ak koit Pamphylia.

25Kingo kagoamda ng'olyoot eng' Perga, kochoortagei Attalia.

26Kotaune olooto ko ki pun moinget agoi Antiok, ole ki kindae icheek myeeindap Kamuktaindet agobo poisyet ne kiga koyai kosulda.

27Kingo kagobwa, koyum kaniset komugul ak komwachi tuguuk tugul che kiga koyai Kamuktaindet eng' icheek, ak ole kiga koyatyindo Pororyosyek kurgeet ne po kayaneet.

28Ak ki tebi peetuusyek che chaang' olooto kobooto kasubik.

← Chapter 13 Jump to: Chapter 15 →