Acts 20

Kalenjin Bible Revised (BUKUIT NE TILIIL Sireet ne Dutero Kanon)

← Chapter 19 Jump to: Chapter 21 →

1Ak kingo pata polateet, ko kagoyookto Paulo kasubik kobwa ak kogimit icheek, koyomiskei, si kwo Makedonia.

2Ak kingo kagobun komoswechooto, ko kagogimiit icheek eng' ng'aleek che chaang', koit Greece.

3Ak kingo kagotebee olooto arawek somok, kochop Yahudik ng'aleek eng' ung'oot agobo ineendet, ye kimachei kobun moinget kwo Syria, komachei kole koweegegei ooreetap Makedonia.

4Ak ki pa kobooto ineendet agoi Asia Sopatro ne po Berea, ne po kap Puro; ak che po Thessalonikek Aristarko ak Sekundo; ak Gaio ne po Derbe, ak Timoteo; ak Tukiko ak Tropimo che po Asia.

5Ago kiga kondo chuuto, ak ki igenech eng' Traos.

6Ak ki kibun moinget eng' Philippi ko kagobata peetuusyegap magatyat ne ma kinde mermereek, ak keit ole mi icheek eng' Traos eng' peetuusyek muut; ole ki kitebee eng' peetuusyek tisap.

7Ak eng' peetuutap tai ne po wigiit ye kiga kiyumge si kebuutul magatyat, koamji Paulo icheek, ye kimachei kwo eng' peetuut ne po aeng'; kong'alaal koek keny agoi kemoi kween.

8Ak ki mi taisyek che chaang' eng' koot ne po parak, ole kiga kiyumjige.

9Ak kitebee tirisyet neraneet age ne ki kiguure Eutuko ak kibirto met; ak kita koamji Paulo koek keny, ak kingo pirto met, kotururtogei kong'etee koot ne po somok, ak ki kisut ko kagome.

10Ak kichoortagei Paulo, ak koitaegei ineendet ak kosuube eunekyik, komwa kole, “Moiimge; amu ta kosabei.”

11Ak kingo togosta, ak kobuutul magatyat, ak koam, ak kong'alaal keny kobooto icheek, agoi koeech, kwo anyun.

12Ak ki imut nerananooto ko kagosap, ak kinyoor kagaigaet ne oo.

13Ago ki kindoi acheek keebe meeliit, keebe Assos, amu ki kimache kimut Paulo eng' olooto: amu kiga kong'at ineendet ko uu nooto, komach ineendet kole kobun keeldo.

14Ak ye ki ngetuiye ak ineendet eng' Assos, kimut ineendet konyo moinget, ak keit Mitulene.

15Ak ki kibe eng' olooto kebun moinget, keit Ki o eng' peetuut ne po tai; ak peetuut ne po aeng' keit Samo; ak peetuut ne po somok keit Mileto.

16Amu kiga kobegechi Paulo kwo kosiirtoe Epheso eng' moinget, si ma igagei eng' Asia; amu ki igirgiri, kole tamangap koit Jerusalem eng' peetuutap Pentekoste.

17Ak ki iyookto eng' Mileto keguur poisyegap kaniset eng' Epheso.

18Ak ye kingo pwa ole mi ineendet, koleenji, “Ongen okweeget kobooch peetuut ne po tai ye kinga tau atyech Asia, ole ki ateptoi kobootok tugul,

19aboisyechini Kiptaiyat eng' kaming'inetapkei tugul, ak eng' peegap kong', ak eng' tyemuutik che kibwanjo eng' chobutik che po ung'oot che po Yahudik;

20ko uu ye ki ma ariiny amwaiwok kiy age tugul ne imuuchi kotoretook, ak aneetaak eng' taitap piik, ak ang'eete koot age agoi koot age,

21abaoryanjini Yahudik kobooto Yunanik siguunet eng' taitap Kamuktaindet ak kayaneet eng' Kiptaiyandennyo Jeso Kristo.

22Ak ogeer anyun nguno, awendi Jerusalem ko aa mutworiin ne po Kabuuset ne Tiliil, amangen tuguuk che pwonjino eng' olooto:

23kobatee kityo paoryanjino Kabuuset ne Tiliil eng' nganaseet age tugul, koleen, igeno ratisyosyek ak nyalilwogik.

24Ago ma iiti saboondanyu ale kiy ne achame kot, si kobiit agees pandanyu, ak poisyet ne ki ataach eng' Kiptaiyat Jeso, abaoryanji logoiywek che myach che po myeeindap Kamuktaindet.

25“Ak nguno anyun, ogeero, angen ale okweek tugul che ki aamdaate logoiywegap laitornatetap Kamuktaindet, koma ogeere togeennyu kogeny.

26Abaoryani anyun eng' taing'wong' peetuuni, ale, aa tiliil eng' korotiigap piik tugul.

27Amu ma ariiny amwaiwok maguutik tugul che po Kamuktaindet.

28Oriipkei anyun okweeget, kobooto akweet tugul, ne ki koonok Kabuuset ne Tiliil oegu riibiik, obai kanisetap Kamuktaindet, ne ki ale korotiikyik.

29Angen ale ye kaawe komong'jok suik che koroomen, ama riiree akweet.

30Ak tuun ng'eetos alage eng' kwenung'wong' komwaei ng'aleek che imaasi piich, si kochuut kasubik koosup icheek.

31Oriipse anyun, ak obwaat ole ma abagaakte atigoon chii age tugul eng' peegap kong' eng' kenyiisyek somok kemoi ak peet.

32“Ara anyun, kabagakyok nguno eutap Kamuktaindet, ak ng'olyootap myeeindonyi, ne imuuchi koteechak, ak kogoonok poroteet kobooto icheek tugul che kitiliili.

33Ma agase myat fedha che po chii age tugul, anan thahabu, anan ngoroik.

34Ongen okweek ole kibois eunechu agobo tuguuk che ki anyalili, ak agobo icheek che ki mi kobooto.

35Ki agoonok kaboorunet eng' tuguuk tugul, ale ye oboisyei ko nyolu otoret che ma tinyei kimnateet, ak obwaati ng'aleegap Kiptaiyat Jeso, ko uu ye ki mwa ineendet kole ‘Tinyei poiboiyet kagoitoet kosiir taaget.’ ”

36Ak kingo kagomwa ko uu nooto, kogutuny, kosa kobooto icheek tugul.

37Ak ki riiryo icheek tugul miising', ak kosuup kaatitap Paulo, ak kong'utut ineendet,

38koaragendos kosiir agobo ng'olyoot ne kiga komwa, kole ma tuun kogeerei togeennyi kogeny. Ak ki iyomis ineendet kowendi kolaanyei meeliit.

← Chapter 19 Jump to: Chapter 21 →