Acts 22

Kalenjin Bible Revised (BUKUIT NE TILIIL Sireet ne Dutero Kanon)

← Chapter 21 Jump to: Chapter 23 →

1“Che kitupche ak kwanisyekyok, ogas ng'aleek che amwae nguno eng' taing'wong' che asaruunegei.”

2Ak kingo kas kole ng'alaaljin icheek eng' kutitap Yahudik, kosiisyo miising': ak ki le

3aa Yahudyot, ki kisikyo Tarsis ne po Cilicia, ago ki anerchi nganasani, ak ki ineeta Gamaliel, ak ki kineta komyee ko uu ole teptoi Ng'atuutyetap kwanisyekyok, ak ki atinye kagiiletapkei eng' Kamuktaindet, ko uu ole oteptoi okweek tugul rani:

4ak ki ausausi Orani agoi meet, arate ak atoorchini korgoreet murenik ak kobogorisyek.

5Ko uu ye paoryanjino tisiindet ne oo, ak kapkirwooget tugul ne po poisyek: che ki anyoorunee paronok, che ki aibe koba kaptupchosyek, ak ki awe Damasko, ale amut icheek che ki mi olooto kobwa Jerusalem ko ratotiin, si kobiit kebir.

6“Ak ye ki awendi, ko kariikyi Damasko, ko katonon asiis, kooluu eng' sainooto lapkeiyet ne oo ne ki punu kipsengwet koluucha komoswek tugul.

7Ak ki abutyi ng'wony, ak agas kutit koleenjo, ‘Saulo, Saulo, amu nee si iusa?’

8Ak ki awolu ale, ‘Ii ng'oo inyee, Kiptaiyat?’ Ak ki leenjo, ‘Aa Jeso ne po Nazareth, ne iuse.’

9Ak ki keer lapkeiyet iman che ki mi kobooto, ago ki ma kas kutitap ineendet ne ki ng'alaalwo.

10Ale, Ayai nee anyun, Kiptaiyat? Koleenjo Kiptaiyat, Ng'eet, ui Damasko; si kemwaun eng' olooto tuguuk tugul che kigeng'at iyai.

11Ak ye ki ma kota amuuchi ageer kiy amu liletap lapkeiyonooto, ait Damasko, konamota euut icheek che ki mi kobooto.

12“Ak ki nyo ole ami, chiito age ne keguure Anania, chiito ne po iman eng' riibetap Ng'atuutyet, ne kibaoryanjin Yahudik tugul che ki menyei olooto kole myee.

13Ak ye kitononi eng' ye neegiteena, koleenjo, Ne kitupche Saulo, keerte. Ak eng' sainooto ageer ineendet.

14Ak ki le, ‘Ki kolewenin Kamuktaindet ne po kwanisyekyok si kobiit inai magennyi, ak igeer Ineendet ne po Imanda, ak igas ng'olyoot ne punu kutinnyi.

15Amu iegu paoryandennyi eng' piik tugul agobo tugul che koigeer ak che koigas.

16Ta igeni nee anyun nguno? Ng'eet kibatisanin, ak kiuundo tengekwogiguk iguure kainennyi.’

17“Ak kingo kaaweektegei Jerusalem, ak kingo ta asaae eng' Hekaluut, kobutya kiit ne uu rwon,

18ageer ineendet koleenjino, ‘Igirgir, chaakte, mande eng' Jerusalem, amu mataachei paornateet eng' inyee agobo anee.’

19Ak ki ale, ‘Kiptaiyat, ingen icheeget kole ki arate ak abire eng' sinagogit age tugul eng' icheek che ki iyanin.

20Ak ye ki ngetumdoi korotiigap Stepano paoryandeng'ung', ko ki atononi agane eng' yooto, ayanjini ak ariibe ngoroigap icheeget che ki parei ineendet.’

21Ak ki leenjo ineendet, ‘Ui, amu ayooktoin iwe ole loo agoi ye mi Pororyosyek.’ ”

22Koepchi iit anyun icheek ineendet agoi ng'olyoondoniito; yeityo komwa eng' kutit ne oo, kole, “Oiste chiito ne uu niito kwo eng' ng'wony; amu ma nyolu kosap.”

23Ak ye kita koboldos, ak kowiirtoi ngoroikwak, ak kowastoi temburyek koba parak,

24kong'at kiptaiyat ne oo kole kimut ineendet kwo irimeet, kong'at kole, ogine eng' pireet ne po kipcharitisyek, si konai ineendet kiit ne kabolji icheek ko uu nooto agobo ineendet.

25Ak ye kingo kagorate ineendet anook, koleenji Paulo kiptaiyatap pogol ne kitononi eng' yooto, Tos chamdoi ng'atuutik eng' okweek obir chii ne Romanindet, ama kirwookyi?

26Ak kingo kas chemogonooto po kiplugotinik pogol, kwo ole mi kiptaiyat ne oo, ak komwachi ineendet koleenji, “Imache iyai nee nguno? Amu Romanindet chiichi.”

27Konyo anyun kiptaiyat ne oo, ak koleenji ineendet, Mwaiwo, tos ii Romanin? Ak ki le, Ee.

28Kowol kiptaiyat ne oo kole, “Ki aegu chiitap pororyoni eng' alyet ne oo.” Ak ki le Paulo, Ki kisikyo pororyoniito.

29Koba anyun eng' sainooto icheek che kimachei kogine ineendet: ak ki iywei agine kiptaiyat ne oo, ye kingo nai kole kaagaa Romanindet ineendet, ak amu kiga korat ineendet.

30Ago ye kimachei konai komyee eng' peetuut ne po aeng', kiit ne koitaame Yahudik, kotyach ineendet ak kong'at tisiik che eecheen ak kapkirwooget tugul kotuiyo, ak komut Paulo kochoorgei, ak konde ineendet tainnywa.

← Chapter 21 Jump to: Chapter 23 →