bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kalenjin
/
Kalenjin Bible Revised (BUKUIT NE TILIIL Sireet ne Dutero Kanon)
/
Numbers 21
Numbers 21
Kalenjin Bible Revised (BUKUIT NE TILIIL Sireet ne Dutero Kanon)
← Chapter 20
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 22 →
1
Ki kas laitoryatap Arad kanaanindet ne ki menyei murot tai, kole, pwoonei Yahudik kobunu ooreetap Atarim, ki wo ak ki parge ak Israel, ak kiluul alak eng' Yahudik.
2
Ki iyasyechi `Yahudik Kamuktaindet ne Toroor, koleenji, “Ngot igoono pichu, ang'eme awong'u nganasookwak.”
3
Ki kas Kamuktaindet ne Toroor ng'aleegap Yahudik, ak ki igoochi Kanaanik. King'em kowong' icheek kobooto nganasookwak. Ki kiguure anyun yooto Horma.
4
Ki pa anyun eng' tulweetap Hor kobun ooreetap Araraita ne Piriir, koyiem emetap Edom. Ago kichootyo mugulelwegap piik amu ooreet.
5
Ki ing'unyng'ung'ji anyun `piik Kamuktaindet kobooto Musa, kole, “Kilya si omutwech kemang'une Misiri kebwa kebekyi surkwen? Amu ma mi amitwogik anan peek, ak wechei saboonwekyok amitwogichu tertereen.”
6
Ki iyookyi `Kamuktaindet ne Toroor pichooto erenook che ng'woneen susennywa ko uu maat. Kisus piik ak ki pek piik che chaang' che po Israel.
7
Ki pa `piik kap Musa koleenji, “Kogeyai tengekto amu ko king'unyng'ung'ji Kamuktaindet ne Toroor kobooten. Saa Kamuktaindet ne Toroor si koistoenech erenochu.” Ara kisaachi `Musa piik.
8
Ki leenji `Kamuktaindet ne Toroor Musa, “Itaany ereneet ne uu maat ak inde keetit ne itononi; ak ye keer chii age tugul ne kagesus, kosap.”
9
Ki itaany anyun `Musa ereneet ne po sugunwet ak ki inde keetit ak kootonon. Ngo sus ereneet chii age tugul, ak konyal erenanooto po sugunwet, kosap.
10
Ki pa anyun piigap Israel, ak komuung'e Obot.
11
Ki pa eng' Obot agoi komuung'e Iye-abarim ne mi surkwen ne tokyingei Moab, komostap kong'asiis.
12
Ki pa eng' olooto, ak komuung'e atebweetap Sered.
13
Ki pa eng' olooto, ak komuung'e Arnon pitoniin, ne mi surkwen ne punu kiwotetap Amorik. Amu Arnon kiwotetap Moabik, kwenutap Moabik ak Amorik.
14
Siraat eng' kitabuutap Lugosyegap Kamuktaindet ne Toroor amu nooto, “Ne ki yai eng' Araraita ne Piriir, ak atebwosyegap Arnon,
15
ak eng' atebwosyek che choorchingei ole menyei Ar, ne mi ole neegitee kiwotetap Moab.”
16
Ak ki pa eng' olooto agoi Beer, nooto keriingetap peek ne ki mwachi `Kamuktaindet ne Toroor Musa koleenji, “Iyum piik, si anaga peek.”
17
Kityen anyun Yahudik tyeni: “Kuutu peek, ee keriingoni! Otyenji!
18
Keriinget ne kibalei che taagunotiin, kobooto ne igoitoi ng'atuutik che konyitotiin kotinyei kirokto ne po kirwooget ak kirokto ne po pounatet.” Ak ki pa eng' surkwen agoi Matana.
19
Ki pa eng' Matana agoi Nahaliel, ak ki pa eng' Nahaliel agoi Bamot.
20
Ki pa eng' Bamot agoi atebweet ne mi mbareetap Moab, agoi tulweet parak ne po Piska, ne ing'ururi surkwen.
21
Ki iyookto `Yahudik piik koba kap Sihon laitoryatap Amorik koleenji,
22
“Chamwo abun emeng'ung'. Ma kimastoi kebendi mbareenik, anan mbareenigap sabibuk, ama kiee peegap keriingonik. Kibune ooreet ne oo ne po laitoryat; agoi kesiir kiwoteng'ung'.”
23
Ago ma chamji `Sihon piigap Israel kobun kiwotennyi. Ago ki iyum `Sihon piikyik tugul ak koba kobargei ak piigap Israel eng' surkwen, ki pargei ak icheek eng' Jahas.
24
Ki par `Israel ineendet eng' rotwetap chok ak konam emennyi kobooch Arnon agoi Jabbok, agoi kiwotetap piigap Ammon; amu king'ootaat kiwotetap piigap Ammon.
25
Kiluul piigap Israel nganasochooto tugul, ak ki meny Yahudik nganasook tugul che po Amorik, eng' Hesbon, ak eng' nganasookyik tugul.
26
Amu Hesbon ko ki nganaseetap Sihon laitoryatap Amorik, ne kiga kobargei ak laitoryatap Moab ne ki po tai ak kirebe emennyi komugul ne ki mi eunnyi agoi Arnon.
27
Mwaei eng' nooto anyun icheek eng' kalewenaik kole, “Obwa Hesbon keteech; ingeteech nganaseetap Sihon ak kigimit.
28
Amu kamandae maat Hesbon, kamandae liplibenetap maat nganaseetap Sihon. Kagobeel Ar ne po Moab, ak kiptainik che po ole toroor che po Arnon.
29
Pwo! Inyee Moab! Kaolusye, okweek piigap Kemos! Kagogoito weeriikyik che kichililso kogoochi Sihon laitoryatap Amorik, ak tiibiikyik koek luulenik, kogoochi Sihon, laitoryatap Amorik.
30
Kagolus, Hesbon agoi Dibon. Kageng'em agoi Nopa, ne itei Medeba.”
31
Ara ki meny anyun Yahudik emetap Amorik.
32
Ki iyookto `Musa piik kosegei Jaser, ak ki iluul nganasookyik ak ki oon Amorik che ki mi olooto.
33
Ki week anyun kotogosta kobun ooreetap Bashan. Ki manda anyun Og laitoryatap Bashan ak piikyik tugul, kwo kobargei ak icheek eng' Edrei.
34
Ki leenji `Kamuktaindet ne Toroor Musa, “Meiywei ineendet, amu kaande ineendet eung'ung' kobooto piikyik tugul, ak emennyi. Iyachini ineendet ko uu ye ki iyachi Sihon laitoryatap Amorik ne ki menyei Hesbon.”
35
Ki par anyun `icheek ineendet kobooto weeriikyik ak piikyik tugul, kot koma ng'etyi `ineendet chii agot agenge. Ak ki punji icheek emennyi.
← Chapter 20
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 22 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36