Proverbs 24

Kalenjin Bible Revised (BUKUIT NE TILIIL Sireet ne Dutero Kanon)

← Chapter 23 Jump to: Chapter 25 →

1Amat koamjin ng'etkong' piik che yaacheen, anan imach otebi ak icheek;

2amu ineetegei mugulwekwak usiisyet, ak mwaei kutusweekwak che yaacheen.

3Kiteege koot utaatyet, ak ki kimite kaguiyet;

4ak eng' naet kinyiiti kooriik che po oriit che po koyooto eng' mogornatosyek tugul che po kamanuutyet ne oo ak ko myachen.

5Kiim chiito ne utaat kosiir chii ne kiim; ak kiim chiito ne tinye naet kosiir ne tinye kimnateet;

6amu iyae lugeeng'ung' eng' kandoet ne po utaatyet, ak piitu saruunet eng' chaang'indap kirwoogik.

7Toroor utaatyet eng' ne perber; eng' kurgat koma yaatei kutinnyi.

8Ineendet ne chobei koyai yaityet keguure ineendet chii ne ya.

9Tengekto kabwaatutigap ne perber; ak wechei `piik chotindet.

10Ngot itanui eng' peetuutap nyalilda ko ming'in kimnateng'ung'.

11Saru icheek che kimuti koba meet, ak iet che kimachei kebar.

12Ngot imwa ile, “Keero, ma ki nai niito!” Tos ma ibwaati niito ineendet ne keerei mugulelwek eng' karagendoet? Tos ma naei ng'olyoondoniito ineendet ne riibei saboondang'ung'? Ak tos ma igeerchin chii age tugul ko uu poisyennyi?

13Weeriinnyu, am kumyat, amu myach; kobooto masamek, amu anyiny ye ichamchami.

14Inae anyun ile anyiny utaatyet eng' saboondang'ung'; ngot inyooru nooto, kobiitu anyun melekto, ama ki istoi kamang'uneng'ung'.

15Amesapchi ko uu kiptengekyot meng'ootetap chiito ne po iman; ameluul ole imuung'ee ineendet;

16Amu ibuti chiito ne po iman konyil tisap, ak kong'eet kogeny; ago igabui nyalilda kiptengeginik.

17Amat ibaibaitu ye ibut punyondeng'ung', amat kogaskei muguleldang'ung' ye kagiwiirta ineendet,

18si ma keer nooto Kamuktaindet ne Toroor, ak konyit, ak koistoe ineendet nereegekyik.

19Amengonyitin che yaei yaityo; anan koamjin ng'etkong' kiptengeginik;

20amu ma nyooru melekto chiito ne ya; kimisi tait ne po kiptengeginik.

21Weeriinnyu, konyit Kamuktaindet ne Toroor ak laitoryat, amonamge ak icheeget che walaksei;

22amu piitu nyalildanywa kochogu. Ak ng'oo ne ingen ng'emisyetap icheeget tuwai?

23Chuuto ak icheek ko ng'aleegap che utaatiin. ma myee ketiytiy piik eng' kirwooget.

24Ineendet ne mwachin kiptengekyot, koleenjin, “Ii po iman,” kochubei `piik ineendet, wechei pororyosyek ineendet.

25Ago igasegei che kere kong' ineendet, ak nyoonjin icheek kaberuret ne myee.

26Ng'ututisyei ineendet ne wolu ne po iman.

27Chop poisyeng'ung' eng' ole po saang', chopchigei kiy age tugul eng' mbar; yeityo iteech koong'ung'.

28Amat iegu paoryat igirinde chiitap kokweng'ung' puch, amat ing'aalse eng' kuting'ung'.

29Amat imwa ile, “Ayachini ineendet ko uu ye kagoyaiywo; ageerchini chiichooto ko uu poisyennyi.”

30Ki abun mbareetap chiito ne choriren, ak ole neegitee mbareetap sabibuk ne po chiichooto ma tinyei naet;

31Ak keero, ki kobitye katook mbareet tugul; ak ki tuch siwek yooto tugul, ak ki kobutok inatunnyi ne po koik.

32Ki ageer anyun ak abwaat miising'; ki ageer, ak ki anyooru kaneetisyet.

33Rwondo kitigin, kanuuget kitigin, arung'et kitigin ne po eunek eng' rwondo,

34konyonjin anyun panandang'ung' ko uu rebindet, ak konyonjin rubeet ko uu chiito ne tinyei kariik.

← Chapter 23 Jump to: Chapter 25 →