Proverbs 6

Kalenjin Bible Revised (BUKUIT NE TILIIL Sireet ne Dutero Kanon)

← Chapter 5 Jump to: Chapter 7 →

1Weeriinnyu, ngot iegu ne itononjini chiitap kokweng'ung', ngot ko kooyosye onamge eunek ak kipsagarin,

2ye kagoriichin anyun ng'aleek che imwae, kagoratin ng'aleek che imwae,

3Yai anyun niito, weeriinnyu, si isaruge, amu kagonamin eutap chiitap kokweng'ung'; ui iming'ingei, ak igaigai chiitap kokweng'ung'.

4Megoochi konyeguk koru, anan konuuch kamismiseng'ung' po kong'.

5Sarugei ko uu ye sarugei kenyeleet eng' kiplogotyot, ko uu toriityon ne sarugei eng' eutap namindetap toriitik.

6Ui ye mi pirechet, inyee ne ii choriren; ibwaat ortinwekyik si iegu ne utaat.

7Ma tinyei kirwoogindet, anan ne iyagi, anan pounindet,

8ago konorchingei amitwogik eng' kemei, ak koyumi amitwogikyik eng' kesiisyo.

9Ee chorirenoni, irue kot kotyanit? Ing'eete au eng' rwondong'ung'?

10Rwondo kitigin, kanuuget kitigin, namet kitigin ne po eunek si kinuuch,

11eng' let konyonjin pananda ko uu rebindet, ak konyo rartaet ko uu chiito ne tinyei kariik.

12Wendoti chii ne ma tilei kiy, chii ne ya, koibooti ng'aleek che po kamaaset,

13ng'wegisye konyekyik, ak kong'alaale keelyekyik, ng'alaale moriikyik.

14Mi mastaet muguleldanyi, chobei yaityet kotugul, koolei toiyet.

15Cheei anyun ineendet nyalildanyi; ng'emaksei eng' chokyinet ama mi kiy ne kinyae.

16Miitei tuguuk lo che wechei Kamuktaindet ne Toroor; ee, tuguuk tisap che wechei ineendet:

17konyegap menoteet, ng'elyepta ne mwaei lembech, ak eunek che tumdoi korotiik che ma tinyei tengek,

18muguleldo ne chobei kabwaatutik che yaach, keelyek che chepchep korwochin yaityet,

19paoryat ne ma po iman ne mwaei lembech, ak ineendet ne koolei toiyet eng' kwenutap tupchosyek.

20Weeriinnyu, riip kayomisutyetap kwandang'ung', amemete kaneetisyetap kamenng'ung'.

21Ratyi chooto muguleldang'ung' kotugul, ak iratyi kaating'ung'.

22Si ye iwendoti, kondoun; ye irue, koriibin, ak ye ing'eete, kong'alaalun.

23Amu kayomisutyet ko tait, ak ng'atuutyet ko lapkeiyet, ak kereetap kong' ne po katigonet ko ooreetap saboondo.

24Riibin eng' kwondo ne ya, ee riibin eng' chemwaigutnatetap chepkugoniot.

25Amegase myat eng' muguleldang'ung' karaaranindanyi, amengoriigenen konyekyik.

26Amu ibeeti chepkugoniot chiito agoi kong'etyi kererutyet, ak cheeng'oti chepkugoniot koriich saboondo ne karaaran.

27Tos imuuchi chii konamji maat tegeennyi, ama lalyo ngoroikyik?

28Tos imuuchi chii kotyegaat ng'etetyot, ama lalyo keelyekyik?

29Uu nooto chiito ne ibegei ak osotyotap chiitap kokwennyi; age tugul ne twaei ineendet koma kibagaaktoi puch.

30Masasei piik choriindet, ngo choorso si kobiyo ye amei rubeet,

31Ago ngot kenyoor, kogeeri konyil tisap, igoitoi tuguuk tugul che po koonnyi.

32Ma tinyei naet chiito ne ibegei ak kwony; ineendet ne yaei nooto kong'emei saboondanyi.

33Nyooru mook ak teweernateet; ama ki istoi kalilanennyi.

34Amu ng'etkonda nereeknatetap manong'otyo, ama riiree ye yaaktai mugetuut.

35Ma mage kiy kiit ne kityage; ma kigoigoi, agot ngigoochi tuguuk che chaang' che po kagaigaet.

← Chapter 5 Jump to: Chapter 7 →