Proverbs 3

Kalenjin Bible Revised (BUKUIT NE TILIIL Sireet ne Dutero Kanon)

← Chapter 2 Jump to: Chapter 4 →

1Weeriinnyu, ameutyee kaneetisyennyu, ago ingoriip `muguleldang'ung' ng'atuutikyuk;

2amu tesun chooto chaang'indap peetuusyek, kenyiisyegap sabeet ak kaalyeet.

3Amecham koistoenengei rireenet ak iman. Ratyi kaating'ung', sirchi muguleldang'ung'.

4Si inyooru anyun chameet ak kaguiyet ne myee eng' taitap Kamuktaindet ak piik.

5Imang'u Kamuktaindet ne Toroor eng' muguleldang'ung' tugul, ametiegei naeng'ung'.

6Ng'aany ineendet eng' ortinweguk tugul, si kolitiitu ortinweguk.

7Amendegei inyegei ile ii utaat; iywei Kamuktaindet ne Toroor, ak iistoegei yaityo.

8Egu niito anyun chametapkei ne po mugeng'ung', ak koek mwanik eng' koweguk.

9Konyitee Kamuktaindet ne Toroor tuguuguk, ak eng' tongoanigap rurateng'ung' tugul;

10si konyi chogeniguk eng' aiyebindo, ak kong'irtagei divaik che leelach eng' ole ituisye.

11Weeriinnyu, amesas katigonetap Kamuktaindet ne Toroor, ameng'et eng' kateunennyi;

12amu iteechin Kamuktaindet ne Toroor age tugul ne chamei, ko uu ye iteechin kwanda weeriinnyi ne poiboitune.

13Paibai chiito ne nyooru utaatyet, ak chiito ne nyooru kaguiyet.

14Amu siirei chemung'arainateet ne po ng'omnateet ne po fedha, ak siirei keljinet ne kenyoorunee nooto thahabu che korooron.

15Po kamanuutyet ne oo ineendet kosiir koiik che kiguure peninim, ak tuguuk tugul che imache koma mi che kiroge ng'omnateet.

16Mi eunnyi ne po tai chaang'indap peetuusyek; komi eunnyi ne po kaataam mogornatosyek ak teegisto.

17Po kagasetapkei ortinwekyik, ak kaalyeet ortinwekyik tugul.

18Ineendet ko keetitap saboondo eng' icheek che namei, ak paibai age tugul ne namegei ak ineendet.

19Ki lum `Kamuktaindet ne Toroor ng'wony eng' utaatyet, ki igimit kipsengwet eng' kaguiyet.

20Kipcheak rirosyek eng' naennyi, ak isaau poolik rewoot.

21Weeriinnyu, amengoistoenengei chooto eng' taing'ung'; isup utaatyet ne ititaat ak ruchiinet.

22Egu anyun chooto saboondo eng' muguleldang'ung', ak koek myeeindo eng' kaating'ung'.

23Iwendote anyun oreng'ung' eng' chametapkei, ama riichin kiy.

24Meiywei kiy ye irue; ye iru, koanyinyitu rwondang'ung'.

25Amearageni eng' ne cheein, anan eng' ng'emisyetap kiptengeginik ye kait.

26Amu egu Kamuktaindet ne Toroor kamang'uneng'ung', ak koriibei ineendet keeldong'ung' ama ki nam.

27Ameetee myeeindo che nyoljin kigoochi, ye itinye kimnateet ne iyae.

28Ameleenji chiitap kokweng'ung', “Ui, si iweege, si agoonin mutai.” Ye itinye kiit ne machei.

29Amechopchi yaityet chiitap kokweng'ung', amu menyei ole neegiteenen eng' chametapkei.

30Amobeelgei ak chii puch, ngot koma yaun kiy ne ya.

31Amat koamjin ng'etkong' chiito ne koroom, amelewen age tugul eng' ortinwekyik.

32Amu wechei `Kamuktaindet ne Toroor ngelelyot, ago mi ung'ootikyik ak piigap iman.

33Mi chubetap Kamuktaindet ne Toroor kootap kiptengekyot; ago iberuuri meng'ootetap piik che po iman.

34Chotei ineendet iman chotiik, ago igoochin myeeindo che iming'inegei.

35Punjin toroornatet piik che utaatiin, ago egu teweernateet etunatetap che perber.

← Chapter 2 Jump to: Chapter 4 →