Revelation 15

Kalenjin Bible Revised (BUKUIT NE TILIIL Sireet ne Dutero Kanon)

← Chapter 14 Jump to: Chapter 16 →

1Ak ki ageer kaboorunet age eng' kipsengwet, ne oo ak ko po kwong'eet, malaikaisyek tisap che tinyei korotwek tisap che po let, amu kigeesune chooto nereegegap Kamuktaindet.

2Ki aroo kiit ne uu nyanjetap klasit ne purugot ak maat; ak icheeget che ki koterter tyonyooto ak kanamwennyi, ak koitetap kainennyi, kotonondos eng' ye neegitee nyanjetap klasit, che tinyei ketubosyegap Kamuktaindet.

3Ak kotyeni icheek tyendap Musa otwogindetap Kamuktaindet, ak tyendap Aarwet, koleen, “Eechen poisyoniguk ak ko po kwong'eet, ee Kiptaiyat Kamuktaindet, Ne po Kamuktaet. Po imanda ak ko po iman ortinweguk, inyee Laitoryatap pororyosyek.

4Ng'oo ne ma iywei ak kotoroori kaineng'ung', ee Kiptaiyat? Amu ii tiliil inyegei. Pwoonei pororyosyek tugul ak kogutung'so eng' taing'ung', amu kagong'ang'ak poisyoniguk che po imanda.”

5Ak kingo pata tuguuchu, ageer, ak ki kiyaat Hekaluut ne po emaitap paornateet eng' kipsengwet:

6ak ki mang'une hekalunooto malaikaisyek tisabu che tinyei korotwechooto tisap, kolaachi ngoroik che tiliileen, ak kolile piich, ak koratatagei pirenoigap thahabu eng' tegetikwak.

7Ak ki igoochi age eng' tyong'ik ang'wan che saptos malaikaisyek tisap taabook tisap che po thahabu che nyiitootiin nereegegap Kamuktaindet, ineendet ne sabei koigeny ak koigeny.

8Ak ki nyi Hekaluut iyeto ne ki punu toroornatetap Kamuktaindet, ak kamuktaennyi; ak ki ma imuuch chii kwo Hekaluut oriit, agoi kogeskei korotwek tisabu che po malaikaisyek tisap.

← Chapter 14 Jump to: Chapter 16 →