Revelation 20

Kalenjin Bible Revised (BUKUIT NE TILIIL Sireet ne Dutero Kanon)

← Chapter 19 Jump to: Chapter 21 →

1Ak ki ageer malaikaiyat kochoorugei eng' kipsengwet, kotinyei yaateiwotap keriinget ne ma igoksei ak sirimdo ne oo eng' eunnyi.

2Ak konam maswetit, ereneet ne ki po keny, ne ineendet ko Chesawilyet ak ko Setani, ak korat ineendet kenyiisyek eliphuut agenge,

3ak kowiirchi ineendet keriinget ne ma igoksei, ak koger, ak kong'ooch paragunnyi, si mata koberber pororyosyek kogeny, agoi kogeskei kenyiisyek eliphuut agenge. Ye ibata nooto kityaach ne matya.

4Ak ki ageer ng'echerogap laitornatet, ak kitebee icheek, ak ki kigoochi icheek korwooch. Ak ki ageer saboonwegap icheek che ki kitil metowek amu paornateetap Jeso, ak agobo ng'olyootap Kamuktaindet, ak icheek che ki ma kolasu tyondo, anan kanamwennyi, ak che ki ma nyoor perutyet eng' togoochikwak anan eng' eunekwak; ak kisopcho ak kolaitoran kobooto Kristo kenyiisyek eliphuut.

5Ma sapcho che kiga kobek agoi kogeskei kenyiisyek eliphuut agenge. Niito ko ng'eetyeet ne po tai.

6Paibai ak ko tiliil ne tinyei yamdaet eng' ng'eetyeet ne po tai. Mabou icheek meet ne po aeng'; ago egu icheek tisiigap Kamuktaindet ak ko po Kristo, ak kolaitoran ak ineendet kenyiisyek eliphuut agenge.

7Ye igeskei kenyiisyek eliphuut agenge, kityaach Setani komong' eng' korgorennyi,

8ak komong' koberber pororyosyek che miitei luukwek ang'wan che po ng'wony, Gog ak Magog, koyumji icheek lugeet; che tee koiitennywa ng'aniegap nyanjet.

9Ak kotogosta koyom ng'wony ak koyiem ye mi che tiliileen, ak nganaseet ne chamat; ak ki choorgei maat eng' kipsengwet, ak kobeel icheek.

10Ak ki kiwiirchi chesawilyet ne ki iberber icheek araraitap maat ak koik che laldos, ole miitei ak icheek tyondo ak maotyot ne po lembech; ak kinyaliili peet ak kemoi agoi koigeny ak koigeny.

11Ki ageer ng'echereet ne oo ak ko leel ne po laitornatet, ak ineendet ne kitebee, ne kimwee togeennyi ng'wony ak kipsengwet; ama ki sikyi ole tebee.

12Ak ki ageer che ki kobek, che eecheen ak che mengeechen, kotonondos eng' taitap ng'echereetap laitornatet; ak ki kiyaat bukuisyek. Ki kiyat kora bukuit age, nooto ko bukuitap saboondo. Ak ki kirwookyi che ki kobek eng' tuguuk che kiga kisirchi bukuisyechooto, ko uu poisyonikwak.

13Ak kigon nyanjet che ki kobek che ki mi oriitinnyi; ak kigon meet ak ye mi che ki kobek, icheek che ki kobek che ki mi oriitinnywa, ak ki kirwookyi chii age tugul ko uu poisyonikyik.

14Ak ki kiwiirchi meet ak ye mi che ki kobek, araraitap maat. Niito ko meet ne po aeng', araraitap maat.

15Ak ngot kenyoor chii age tugul ne ki ma kisirchi bukuitap saboondo, kewiirchin araraitap maat.

← Chapter 19 Jump to: Chapter 21 →