1 Chronicles 10

Kalenjin Bible (BUKUIT NE TILIL)

← Chapter 9 Jump to: Chapter 11 →

1Kibargei Pilistik ak Israel, ak kimwei bikab Israel eng’ taitab Pilistik, ak kiibutyo kebar eng’ tulwetab Gilboa.

2Ak kion Pilistik Saul ak werikyik kosub inne, ak kibar Pilistik Jonatan, ak Abinadab, ak Malki-sua, werikab Saul.

3Ak king’wanit boriet eng’ Saul, ak kinam inendet mwogik; ak kinyalil eng’ mwogik.

4Kolenji anyun Saul chito ne kiipchin inendet karik, Ng’usu rotweng’ung’ bo chok, ak itoorena; si mabwa bichoto chu ma kimuratan kochota. Ago ma cham chito ne kiipchin karik: amu kiiywei mising’. Konam, anyun Saul rotwennyi bo chok, ak kong’at, ak kobutyi.

5Ak kingogeer chito ne kiipchin inendet karik kole kagome Saul, kobutyi agine rotwennyi bo chok, ak kome.

6Kome anyun Saul, ak werikyik somok; ak kibek gonnyi tugul kibagenge.

7Ak kingogeer bik tugul che bo Israel che kimi atebwet kole, kagomwei, ago kagome Saul ak werikyik, kometo nganasokwak, ak komwei; ak kibwa Pilistik komeny nganasochato.

8Ak ki eng’ karon, ye kibwanei Pilistik kobutei bik che kiga kibar, konyor Saul ak werikyik ko kogobek eng’ tulwetab Gilboa.

9Ak kibut inendet, ak koib metinnyi, ak karikyik, ak koyokto koba emetab Pilistik komoswek tugul koipchi logoiywek kanamonikwak, ak koipchi bik agichek.

10Ak kiinde karikyik gotab kanamonikwak, ak koratyi metinnyi gotab Dagon.

11Ak kingogas Jabes-gilead komugul kit ne koyachi Pilistik Saul,

12kong’eetyo bik tugul che nyigonen, ak koba koib bortab Saul, ak borwekab werikyik, ak koib kobwa Jabes, ak kotub kowekwak eng’ ketit kel eng’ Jabes, ak korugutgei betusiek tisab.

13Kome anyun Saul amu chalwoktanyi ne kiyachi Jehovah, amu ng’olyotab Jehovah ne ma rib; ak amu kiteeb ng’omnatet kogeny eng’ inendet ne kiboisie oik, koteepse,

14ama teebe Jehovah: kobar anyun Jehovah inendet, ak kogochi laitornatet Daudi weritab Jesii.

← Chapter 9 Jump to: Chapter 11 →