1 Chronicles 14

Kalenjin Bible (BUKUIT NE TILIL)

← Chapter 13 Jump to: Chapter 15 →

1Ak kiiyokto Hiram laitoriatab Turo bik koba oldab Daudi, koipchi taragonik, ak koyokyi bik che waei koik, ak musogikab baoinik, koba koteekyi inendet got.

2Ak kinai Daudi kole kogogimit Jehovah inendet koek laitoriatab Israel, amu kigitoror bounatennyi, amu bikyik Israel.

3Ak kiitun Daudi osotik alak eng’ Jerusalem: ak kisich Daudi werik che chang’ ak tibik che chang’.

4Ak chu ko kainaikab lagok che kisichei eng’ Jerusalem; Samua, Sobab, Natan, ak Solomon;

5ak Ibar, Elisua, ak Elpelet;

6ak Noga, Nepeg, ak Japia;

7ak Elisama, Beeliada, ak Elipelet.

8Ak kingogas Pilistik kole, kogiil Daudi koek laitoriatab Israel tugul, kotogosta Pilistik koba kocheng’ Daudi: ak kigas Daudi ak kwo kobargei ak ichek.

9Kiga kobwa Pilistik kobokyi atebwetab Repaim.

10Ak kiteebe Daudi Kamuktaindet kolenji, Atogoste awe kebarge ak Pilistik? Ak tos, inde eunnyu ichek? Ak kilenji Jehovah, Togoste, amu andoi ichek eung’ung’.

11Kotogos anyun kobwa Baal-perasim, ak kibar Daudi ichek eng’ yoto; ak kile Daudi, Kagoiyesta Kamuktaindet bunikyuk eng’ eunnyu, ko u beek che iyestoi. Koguure anyun kainetab koronoto Baal-perasim.

12Ak kibagage oloto kanamonikwak; ak king’at Daudi, ak kigibeel eng’ mat.

13Ak kita kobokyi kogeny atebwonoto Pilistik.

14Ak kiteebe Daudi kogeny Kamuktaindet; ak kilenji Kamuktaindet inendet, Amat itogoste isub ichek: ui taban, si iche ichek eng’ ye itoorjingei ketikab logoek.

15Ak ye igas cheetab banda eng’ ketichato bo logoek barak, iwe anyun obarge: amu kagondoenen Kamuktaindet kwo kobar lugetab Pilistik.

16Ak kiyai Daudi ko u ye king’at Kamuktaindet inendet: ak kibar lugetab Pilistik koboch Gibeon agoi Geser.

17Ak kiyom emotinwek tugul toogunatetab Daudi; ak kiigochi Jehovah bororiosiek tugul koiywei inendet.

← Chapter 13 Jump to: Chapter 15 →