1 Chronicles 29

Kalenjin Bible (BUKUIT NE TILIL)

← Chapter 28 Jump to:

1Ak kilenji laitoriat Daudi tuiyet tugul, Ta ko ming’in Solomon werinnyu, ne kilewen inegei Kamuktaindet, ak ko ta ko etyet, ak ko o boisiet: amu goyoto bo laitoriat ko ma bo chito, bo Jehovah Kamuktaindet.

2Kiachob anyun eng’ kimnatennyu tugul, tahabu agobo tugukab tahabu, che bo gotab Kamuktaindennyu, ak feda agobo tugukab feda, ak sugunonik agobo tugukab sugunonik, ak karik agobo tugukab karik, ak ketik agobo tugukab ketik; koik che kiguure soam, ak koik che kitetei, kindoi kotabon ng’ony, ak che bo saleiywek che terjin, ak koik alak tugul che bo kamanutiet ne o, ak koik ng’isiat che leelach.

3Kogeny, amu kiacham mising’ gotab Kamuktaindennyu, ko u ye atinye tugukyuk che bo tahabu ak feda, agochini gotab Kamuktaindennyu, che siirei tuguk tugul che kiachopchi got ne tilil;

4talentaisiek elfusiek somok che bo tahabu, che bo tahabu che bo Opir, ak talentaisiek elfusiek tisab che bo feda che tililen, che kiliige inatusiekab gorik:

5che bo tahabu agobo tugukab tahabu, ak che bo feda agobo tugukab feda, ak che bo boisiet age tugul che yaei musogik. Ng’o anyun ne chamei kotabanjigei Jehovah eng’ betuni?

6Kiigoito anyun eng’ chamnyet bounikab gorikab kwanisiek, ak bounikab ortinwekab Israel, ak kiptainikab elfusiek, ak che bo bogolwogik, koboto bounik che kibou boisietab laitoriat;

7ak kiigoito agobo otisietab gotab Kamuktaindet talentaisiek elfusiek mut che bo tahabu koboto darkoni elfusiek taman, ak talentaisiek che bo feda elfusiek taman, ak che bo sugunonik talentaisiek elfusiek taman ak sisiit, ak che bo karik talentaisiek elfusiek bogol.

8Ak ichek che kitinyei koik che bo kamanutiet ne o, ko kiigoito kinde ole kigonore tugukab gotab Jehovah, koba eutab Jehiel Gersonindet.

9Koboiboitu anyun bik, amu kiigoito eng’ chamnyet, amu kiigochi Jehovah eng’ muguleldo ne igesunotgei: ak kibaibait agine laitoriat Daudi eng’ boiboiyet ne o.

10Kolos anyun Daudi Jehovah eng’ taitab tuiyet tugul; ak kile Daudi, Iberurot inye, koigeny ak koigeny, ee Jehovah, Kamuktaindetab Israel kwandanyo.

11Cheguk, ee Jehovah, oindo, ak kamuktaet, ak torornatet, ak katerteret, ak etunatet; amu cheguk tuguk tugul che mi kipsengwet ak che mi ng’ony; neng’ung’ bounatet, ee Jehovah, ak i tororot, i metitab tugul.

12Bunun magornatosiek ak teegisto, ak ibou tugul; ak mi eung’ung’ kimnatet ak kamuktaet; inye ne ieeti, ak inye ne igochini tugul kimnatet.

13Ara anyun, Kamuktaindennyo, kimwaun kongoi, ak kilosu kaineng’ung’ ne bo torornatet.

14Ago a ng’o, ak nee bikyuk, kot kimuch kigoite eng’ chamnyet ko u ni? Amu bunun tuguk tugul, ak kagigonin tuguguk.

15Amu ki toek eng’ taing’ung’, ak ki kiprutoinik, ko u ye ki u kwanisiekyok tugul: u betusiekyok eng’ ng’ony uruet, ama mi ne tebyei agoi.

16Ee Jehovah Kamuktaindennyo, bunu eung’ung’ tuguchuto tugul kogechop si keteegunenen got ne bo kaineng’ung’ ne tilil, cheguk tugul.

17Angen kogeny, ee Kamuktaindennyu ale, itieme muguleldo, ak ibaibaitune lititindo. Ak kiagonin tuguchuto tugul eng’ chamnyet ak lititindab muguleldanyu: ak kaageer nguno eng’ boiboiyet biguk che mi yu kogonin eng’ chamnyet.

18Ee Jehovah, Kamuktaindetab Abraham, ak ko bo Isak, ak ko bo Israel, kwanisiekyok, rib ng’olyondonito koigeny eng’ kabwatutik che ibwati mugulelwekab biguk, ak ichopchige mugulelwekwak:

19ak igochi werinnyu Solomon muguleldo ne igesunotgei, si korib ng’atutiguk, ak baornatosieguk, ak konetisiosieguk, ak koyai tuguchuto tugul, ak koteech gotab laitoriat, ne kiachopchi tuguchuto.

20Ak kilenji Daudi tuiyet tugul, Olosu Jehovah Kamuktaindeng’wong’. Ak kiilos tuiyet komugul Jehovah Kamuktaindetab kwanisiekwak, ak kong’uruk, kogutung’ji Jehovah, ak laitoriat.

21Ak kieny tiseiywek koeng’ji Jehovah, ak kogochi Jehovah kagochinoik che kibeelei eng’ betut ne bo aeng’, eik elfut, mengichik elfut, ak arekab kechir elfut, koboto kagochinoikwak che kieei, ak korosek ng’isiat che bo Israel tugul;

22ak kiamis ak koeeiso eng’ taitab Jehovah eng’ betunoto eng’ kagasetab ge ne o. Ak kiyai Solomon weritab Daudi koek laitoriat kogeny, ak koiil inendet eng’ taitab Jehovah koek bounindet, ak koiil Sadok koek tisiindet.

23Kotebe anyun Solomon ng’echeretab laitornatet ne bo Jehovah koek laitoriat, kogeer Daudi kwandanyi, ak kobor; ak kigas it Israel tugul inendet.

24Ak kigas it bounik tugul, ak bik che kimen, koboto werik tugul che bo laitoriat Daudi, laitoriat Solomon.

25Ak kiieet Jehovah Solomon mising’ eng’ taitab Israel tugul, ak kogochi inendet etunatetab laitornatet ne kitom kigochi laitoriat age tugul eng’ Israel ne kiindoune inendet.

26Kilaitoran Daudi anyun weritab Jesii eng’ Israel tugul.

27Ak betusiek che kilaitorane Israel ko ki kenyisiek artam; kilaitoran eng’ Hebron kenyisiek tisab, kolaitoran eng’ Jerusalem kenyisiek sosom ak somok.

28Ak kiilil, ko kagoyam betusiekyik, ak magornatosiek, ak teegisto: ak kilaitoran Solomon werinnyi kogeer inendet.

29Ak boisionikab laitoriat Daudi, che bo tai ak che bo let, ogeero, sirotin eng’ ng’alekab Samuel keerindet, ak eng’ ng’alekab Natan maotiot, ak eng’ ng’alekab Gad keerindet;

30koboto laitornatennyi tugul ak kimnatennyi, ak betusiekab sobennyi, ak che bo Israel, ak che bo bounatosiek tugul che bo emotinwek.

← Chapter 28 Jump to: