1 Kings 19

Kalenjin Bible (BUKUIT NE TILIL)

← Chapter 18 Jump to: Chapter 20 →

1Ak kimwachi Ahab Jesebel tuguk tugul che kayai Elija, koboto ole kabarta maotik eng’ rotwetab chok.

2Koyokto anyun Jesebel chito kwo ole mi Elija, kolenji, Ingoyaiywa kanamonik ko u noto, ak kotes, ngot ko mayai sobondang’ung’ koigei sobondab age eng’ ichek mutai ko negit saini.

3Ak kingogeer ko u noto, kong’eet kwo komweita sobondanyi, ak kiit Beer-seba, ne bo Juda, ak kobagakta otwogindennyi eng’ oloto.

4Ago kiwa ong’atet inendet, bandab betut agenge, ak kiit ole mi ketikab junipa, ak kotebi ng’ony eng’ ketoto kel: ak kisom kole kome; ak kile, Kogoyam; ara anyun, ee Jehovah, ib sobondanyu nguno; ma a mie ane asiir kwanisiekyuk.

5Ak kiru ak konuuch eng’ ketit kel ne kiguure junipa; ak ogeero, kitwa inendet malaikaiyat, ak kolenji, Ng’eet, amisie.

6Ak kigeer, ak ogeero, kimi ye negite metinnyi makatiat ne kiga kibeel eng’ matab nesek, ak teretab beek. Ak kiamis ak koee beek ak koru kogeny.

7Ak kinyo malaikaiyatab Jehovah kogeny ne bo aeng’, ak kotwa inendet, ak kolenji, Ng’eet, amisie; amu o mising’ banda eng’ inye.

8Ak king’eet, ak koamis, ak koee beek, ak kowee kimnatetab amitwogichoto betusiek artam ak kemousiek artam, kot koit Horeb tulwetab Kamuktaindet.

9Ak kiit kebenet ne mi yoto, ak koru yoto; ak ogeero, kinyonji inendet ng’olyotab Jehovah, ak kolenji, Iyae nee eng’ yu, Elija?

10Ak kile, Kigoama ng’etkong’ mising’ agobo Jehovah, Kamuktaindetab lugosiek; amu kigobagakta lagokab Israel kayomiseng’ung’, kobut kaptisisiosieguk, ak kobar maotiguk eng’ rotwetab chok: ak kiang’etu, ane, anege; ak cheng’ei ichek sobondanyu kobar.

11Ak kile, Mande, ak iwe itonone tulwet eng’ taitab Jehovah. Ak ogeero, kisiirto Jehovah, ak kibet tulonok usonet ne o, ne kim, ak kotuatui ruandosiek eng’ taitab Jehovah; ago kima komi Jehovah usononoto: ak kingobata usonet kobiit botanetab ng’ony; ago kima komi Jehovah botanonato bo ng’ony:

12ak kingobata botanet kobiit mat; ago kima komi Jehovah maata: kingobata mat kobiit tuget ne ming’in ne kitwegu mutyo.

13Ak kingogas Elija kotuch togennyi eng’ ngoriennyi, ak kotonon eng’ ye kichutei kebendi kebenet. Ak ogeero, kinyonji inendet kutit, kolenji, Iyae nee eng’ yu, Elija?

14Ak kile, Kigoama ng’etkong’ mising’ agobo Jehovah, Kamuktaindet ne bo lugosiek; amu kigobagakta lagokab Israel kayomiseng’ung’, kobut kaptisisiosieguk, ak kobar maotiguk eng’ rotwetab chok; kiang’etu ane anege; ak cheng’ei ichek sobondanyu kobar.

15Ak kilenji Jehovah inendet, Ui, ketitege, bun ong’atetab Damasko; ak ye iit, iil Hasael koek laitoriat eng’ Suria;

16ak iil Jeu weritab Nimsi koek laitoriat eng’ Israel; ak iil Elisha weritab Sapat ne bo Abel-meola koek maotiot kogeerin.

17Ak inendet ne chilili eng’ rotwetab chok ne bo Hasael, kobarei Jeu: ak inendet ne chilili eng’ rotwetab chok ne bo Jeu kobarei Elisha.

18Ago atuukyinige elfusiek tisab eng’ Israel, kutung’oik tugul che tomo kogutung’ji Baal, ak kutit age tugul ne tomo kong’utut inendet.

19Kwo anyun eng’ yoto, ak kinyor Elisha weritab Sapat, ne kiibatisie eik tiptem ak ang’wan, che bo chogit eng’ tainnyi, ak kikweriei inendet che bo chogitab taman ak aeng’, ne bo let: kiwa Elija ye mi inendet, ak kowirji inendet ngoriennyi.

20Ak kibagakta eik, ak kilabat kosub Elija, ak kolenji, Asomin ale, chamwa awa ang’utut baba ak kamennyu agochi saisere, yeityo asubun. Ak kilenji inendet, Ui, ketitege; amu kayaun nee?

21Ak kiweek, mata kosub inendet, ak konam eik aeng’ che bo chogit, ak koyoe banyekwak tuguk che kiboisie eik, ak kogochi bik, ak kiam. Kingobata kong’eet, ak kwo kosub Elija, koboisiechi inendet.

← Chapter 18 Jump to: Chapter 20 →