1 Thessalonians 3

Kalenjin Bible (BUKUIT NE TILIL)

← Chapter 2 Jump to: Chapter 4 →

1Noto anyun ye kingo mata kimuch kemuite, kibwat kele mie kebagaktech achege eng’ Atene;

2ak kiyogu Timoteo, tupchennyo ak ko kiboitiotab Jehovah eng’ logoiywek che miach che bo Kristo, kogimitok, ak kogaigaak agobo kayaneng’wong’;

3si maing’eak chi age tugul eng’ nyalilwogichuto; amu ongen okweget ole kigilewenwech choto.

4Amu iman, kingemi kobotok, ko kisib kemwawok kele kinyoru usisiet; ko u ye kigobiit, ak ongen ak okwek.

5Amu ng’olyondonito ye kimata amuch amuita, ayogu kut si kobiit anai kayaneng’wong’, ale tama kogoyomak yomindet, ak koek buch boisiennyo ne uui.

6Ago, ye kingonyo Timoteo kobunu olong’wong’, ak koibwech logoiywek che bo boiboiyet che bo kayaneng’wong’ ak chamnyet, ak otinye kabwatet ne mie ne obwatech kotugul, oting’enech emosto omache ogeerech, ko u ye kimache agachek kegeerok;

7amu ng’olyondonito anyun, tupchosiechu, kigigaigaech eng’ okwek eng’ bichiindanyo tugul ak nyalildanyo amu kayaneng’wong’:

8amu kisoptosi nguno, ngot olumdege eng’ Kiptaiyat.

9Amu kongoi nee ne kimuchi kigochi Jehovah kogeny agobo okwek, amu boiboiyet tugul ne kiboiboitune ko amu okwek eng’ taitab Jehovah nenyo;

10kisae mising’ kemoi ak bet si kobiit kegeer togochikwok, ak kigesu noto ne rartaat eng’ kayaneng’wong’?

11Ingondochi anyun bandanyo kebwa oldang’wong’, Jehovah nenyo ak ko Kwanda inendet, ak Kiptaiyandennyo Jesu;

12ingogonok Kiptaiyat otesage ak obaraitu eng’ chamnyet okwege eng’ okwege, ak eng’ bik tugul, agot ko u achek eng’ okwek;

13si kobiit kogimit mugulelwekwok ko motinye kiy ne kimuchi kiruogunenok eng’ tililindo eng’ taitab Jehovah nenyo ak ko Kwandanyo, eng’ nyonunetab Kiptaiyandennyo Jesu koboto chechik che tililen tugul.

← Chapter 2 Jump to: Chapter 4 →