1 Thessalonians 5

Kalenjin Bible (BUKUIT NE TILIL)

← Chapter 4 Jump to:

1Ma nyolu anyun kesirwak, che kitupche, agobo betusiek ak kenyisiek.

2Amu ongen okweget komie ole nyonei betutab Kiptaiyat ko u chorin ne nyonei kemoi.

3Ye mwaei ichek kolen, Kalyet ak chametab ge, koche anyun ichek ng’emisiet, ko u ye ityin ng’wanindo kobogoriot ne machei kosigis; ago magoi chililso.

4Ago okwek, tupchosiechu, ko momi eng’ mesundeito, kot konyonjok betunoto ko u chorin:

5amu okwek tugul ko o werikab lapkeiyet, ak werikab bet: ma ki bo kemoi, anan mesundeito;

6noto anyun among’ keruiye ko u bik alak, ago ongeripse ak keegu che ribegei.

7Amu icheget che ruitos koruitos kemoi; ak icheget che bogitos kobogitos kemoi.

8Ago ongeegu che kiribegei, achek che ke bo bet, kilaachi karnetab teget ne bo kayanet ak chamnyet; ak kutwet, noto ko kamang’unet ne bo yetunet.

9Amu kima lewenjech Jehovah nereknatet, ago nyorunetab yetunet eng’ Kiptaiyandennyo Jesu Kristo,

10ne kimechech, si ngegosu anan ngeruitosi, kesoptosi koboto inendet.

11Noto anyun ogaigaige okwege eng’ okwege, oteech ge okwege eng’ okwege, agot ko u ye oyae ak okwek.

12Ago kisomok, che kitupche, kele onai ichek che tinyei boisiet ne o eng’ kwenung’wong’, ak che boiywok eng’ Kiptaiyat, ak kotigonok;

13ak ogonyit ichek mising’ inne eng’ chamnyet agobo boisienywa. Otebi eng’ kalyet okwege eng’ okwege.

14Ak kitigonok, che kitupche, kele oteechi che maribei che kiging’at, ocher che nyogoren, otoret che nyalulyotin, omuite ak bik tugul.

15Ogeer si mayaakyi chi age tugul chito age yaitio eng’ yaitio; ago osub noto mie kotugul, chi age eng’ age, ak eng’ bik tugul.

16Oboiboitu betusiek tugul;

17osae kotugul;

18omwae kongoi eng’ tuguk tugul: amu nito magetab Jehovah eng’ Kristo Jesu eng’ okwek.

19Amogirinde Tamirmiriet;

20amosas maoinatosiek;

21otiem tuguk tugul; onam mising’ noto mie;

22oistoege kiy age tugul ne ya.

23Ak ingotabanak eng’ katabanet ne nyiitat Jehovah ne bo kalyet; ak ingoribogis komie tamirmirikwok ak sobonwekwok ak borwekwok, ko motinye kiy ne kimuchi kiruogunenok eng’ nyonunetab Kiptaiyandennyo Jesu Kristo.

24Inendet ne kuurok ko inendet ne kiyani, ne yaei noto agine kosulda.

25Tupchosiechu, osaiywech.

26Ogat tupchosiek tugul eng’ ng’ututet ne tilil.

27Ayosiewok eng’ Kiptaiyat ale kesomanji baruani che kitupche tugul.

28Ingotebi mieindab Kiptaiyandennyo Jesu Kristo kobotok.

← Chapter 4 Jump to: