1 Thessalonians 4

Kalenjin Bible (BUKUIT NE TILIL)

← Chapter 3 Jump to: Chapter 5 →

1Ne bo let anyun, tupchosiechu, kesomok mising’ ak kiteeiywok eng’ Kiptaiyat Jesu, ko u ye kiotaach eng’ achek, ole kanyol obetite ak obaibaite Jehovah, agot ko u ye obendoti, si kobiit obaraitu mising’ inne.

2Amu ongen ng’atutik che kigigonok achek eng’ Kiptaiyat Jesu.

3Amu nito magetab Jehovah, noto katabaneng’wong’, si kobiit oistoege sokset.

4Si kobiit konai chi tugul eng’ okwek komuch gei, korib bortanyi eng’ tililindo ak teegisto,

5ma eng’ maget ne bo kasetab miat, agot ko u Bororiosiek che maingen Jehovah;

6amat koyai chi kachiliilut anan koyachi ne ya tupchennyi eng’ ng’olyondonito: amu Kiptaiyat yaaktaindetab mugetut eng’ tuguchuto tugul, ko u ye kisib kiteeiywok ak kebaorian.

7Amu kima kuurjech Jehovah simdo, ago eng’ tililindo.

8Inendet ne esioi, ko maesio chi, ago Jehovah, ne konok Tamirmiriennyi ne Tilil.

9Ago ma nyolu kesirwak agobo chamnyetab tupchosiek; amu onetotin okweget eng’ Jehovah si ochamnye;

10amu oyae ko u noto iman eng’ tupchosiek tugul che mitei Makedonia komugul. Ago kiteeiywok, tupchosiechu, kele obaraitu kosiir;

11ak onetge otebi eng’ mutyonet, ak oyai boisionikwok, ak oboisie eunekwok, ko u ye kiging’atak;

12si obendate ko u ye nyolu eng’ taitab ichek che mi sang’, si mobanan kiy age tugul.

13Ago magimache anyun, che kitupche, oegu che mongen agobo icheget che ruitos; kele amoarogense, ko u bik alak che matinyei kamang’unet.

14Amu ngiyani kele kime Jesu ak kong’eet kogeny, ko u noto anyun eng’ icheget che ruitos eng’ Jesu, imutu Jehovah koboto inendet.

15Amu kimwawok ni eng’ ng’olyotab Kiptaiyat, kele achek che kisoptosi, che ki ng’etunotin agoi nyonunetab Kiptaiyat, ko magoi kindoe ichek che kigoruiyo.

16Amu chorugei Kiptaiyat inendet eng’ kipsengwet, koboto twegunet ne o, ak kutitab malaikaiyat ne o, ak iriagetab Jehovah: ak isib kong’eetos che kibek eng’ Kristo:

17ak achek anyun che kisoptosi, che ki ng’etunotin, keganabech koboto ichek eng’ bolik, ketuiye ak Kiptaiyat eng’ soet: ak ketebi anyun koboto Kiptaiyat koigeny.

18Noto anyun ogaigaige okwege eng’ ng’alechuto.

← Chapter 3 Jump to: Chapter 5 →