2 Chronicles 31

Kalenjin Bible (BUKUIT NE TILIL)

← Chapter 30 Jump to: Chapter 32 →

1Kingo kagogesgei chuto tugul, koba nganasokab Juda Israel tugul che kimi, koba kobut tolochik, ak koeb Aserik, ak kobut komoswek che tororen ak kapkorosusiek eng’ Juda tugul ak Benjamin, eng’ Epraim agine ak Manase, kot kong’em tugul. Koweek anyun lagok tugul che bo Israel, kwo chi tugul ole mi tugukyik, eng’ nganasokwak.

2Ak kipchei Hesekia ripsosiekab tisiik ak Lawik kobee ripsosiekwak, chi tugul ko u boisiennyi, tisiik ak Lawik, agobo kagochinoik che kibeelei ak kagochinoik che bo kalyet, kootis, ak koweekyi kongoi, ak kolos eng’ ormarichokab nganasetab Jehovah.

3King’at agine kebebertab laitoriat ne bo tugukyik koek kagochinoik che kibeelei, che bo kagochinoik che kibeelei che bo karon ak che bo koskoleny, ak kagochinoik che kibeelei che bo sabatosiek, ak che bo ye kaleel arawet, ak che bo igorwek che kiging’at, ko u ye kigisir eng’ ng’atutikab Jehovah.

4King’at kogeny bik che kimenyei Jerusalem kogoito kebeberta ne bunjin tisiik ak Lawik, si kobiit kogochigei ng’atutietab Jehovah.

5Ak kingogasak ng’atutiet eng’ emet, kogoito lagokab Israel eng’ chang’indo tongoanikab bek, ak che bo divaik, ak mwanik, ak kumik, ak che bo ruratet tugul ne bo emet; ak kiib kebebertab taman ne bo tuguk tugul eng’ chang’indo.

6Ak kiib agichek lagokab Israel ak Juda, che kimenyei nganasokab Juda, kebebertab taman ne bo eik ak kechirek, ak kebebertab taman ne bo tuguk tugul che itabanotin che kiga kigochi Jehovah Kamuktaindenywa, ak kiiyumat.

7Kitoi koyumat eng’ arawetab somok, ak koges eng’ arawetab tisab.

8Ak kingonyo Hesekia koboto bounik ak kogeer kayumanik, kolos Jehovah, ak bikyik Israel.

9Kiteebe anyun Hesekia tisiik ak Lawik agobo kayumanichato.

10Ak kiwolji Asaria tisiindet ne o ne bo gotab Sadok, kolenji, Koboch ngab kotoi bik koib kagochinoik kobwa gotab Jehovah, ko kigiamisie koyamech, ak kigituch che chang’: amu kigoberur Jehovah bikyik; ak che kong’et ko chu chang’.

11King’at anyun Hesekia kechob gorik che mengechen eng’ gotab Jehovah; ak kichob.

12Koib anyun kobwa go eng’ kayanet, kagochinoik ak kebeberwekab taman, ak tuguk che itabanotin: ak ki bounindet Konania Lawindet ne kibou ichek, ak ki ne bo aeng’ Semei ng’etab kamet.

13Ak Jehiel, Asasia, Nahat, Asael, Jerimot, Josabad, Eliel, Ismakia, Mahat, ak Benaia, ko ki ribik che kiindochin Konania ak Simei ng’etab kamet, ko u ye king’at laitoriat Hesekia, ak Asaria bounindetab gotab Kamuktaindet.

14Ak kibou Kore weritab Imna Lawindet, ne ki ribindetab kurget ne mi kong’asis, kagochinoikab chamnyet che bo Kamuktaindet, si kopcheita, kagochinoikab Jehovah che kinamjin barak, koboto tuguk che tililen mising’.

15Ak kirubei inendet Eden, Miniamin, Jesua, Semaia, Amaria, ak Sekania eng’ nganasokab tisiik, eng’ boisienywa ne kigigochi, si kogochi tupchosiekwak kobee ripsosiekwak, kogochi che eechen ak che mengech kogergeit:

16ko maboto ichek che kigiit kobee tetutikab ibinwek che kigosiirto che bo murenik, koboch che bo kenyisiek somok ak che siirei, agot age tugul ne kiwendi gotab Jehovah, ko u ye yamegei ak boisietab betut age tugul, eng’ otisienywa eng’ boisienywa kobee ripsosiekwak:

17koboto ichek che kigiit kobee tetutikab ibinwek che kigosiirto che bo tisiik, ko u gorikab kwanisiekwak, ak Lawik che bo kenyisiek tiptem ak che siirei, eng’ boisienywa kobee ripsosiekwak;

18ak ichek che kigiit kobee tetutikab ibinwek che kigosiirto, che bo lagokwak che mengechen, ak osotikwak, ak werikwak, ak tibikwak, eng’ tuiyet komugul: amu kiianyinygei eng’ boisienywa ne kigigochi eng’ tililindo:

19ko u noto agine eng’ werikab Aron tisiik, che kimenyei mbarenikab emotinwek che kiyagisie, che bo nganasokwak, eng’ nganaset age tugul, ko kimi bik che kigimwa kainaikwak, kopchechi kebeberwek murenik tugul che bo tisiik, koboto tugul che kigiit kobee tetutikab ibinwek che kigosiirto, che bo Lawik.

20Kiyai anyun ko u noto Hesekia eng’ Juda komugul; ak kiyai ne mie ak ne litit ak ne bo iman eng’ taitab Jehovah Kamuktaindennyi.

21Ak eng’ boisiet age tugul ne kitoi koyai eng’ otisietab gotab Kamuktaindet, ak eng’ ng’atutik, ak eng’ kayomisutik, kocheng’ Kamuktaindennyi, kiyai eng’ muguleldanyi komugul, ak kibor.

← Chapter 30 Jump to: Chapter 32 →