bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kalenjin
/
Kalenjin Bible (BUKUIT NE TILIL)
/
2 Chronicles 34
2 Chronicles 34
Kalenjin Bible (BUKUIT NE TILIL)
← Chapter 33
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 35 →
1
Ki bo Josia kenyisiek sisiit ye kitau kolaitorani; ak kilaitoran kenyisiek sosom ak agenge eng’ Jerusalem.
2
Ak kiyai ne mie eng’ taitab Jehovah, ak kiwendote ortinwekab Daudi kwandanyi, ama masta kwo eutab tai anan ne bo katam.
3
Amu eng’ kenyitab sisiit ne bo laitornatennyi, ye kita ko ming’in, kotoi kocheng’ Kamuktaindetab Daudi kwandanyi: ak eng’ kenyitab taman ak aeng’ kotoi kotilil Juda ak Jerusalem koisto komoswek che tororen, ak Aserik, ak kanamonik che kigiwai ak kanamonik che kigitany.
4
Ak kibut kapkorosusiekab Baalik eng’ tainnyi; ak koluul kanamonik che bo asista che kimitei baragunywa; ak kituatui Aserik, ak kanamonik che kigiwai ak kanamonik che kigitany, ak kong’a koek temburiek ak koseerji kererisiekab icheget che kieng’ji.
5
Ak kibeel kowekab tisiik eng’ kapkorosusiekwak, ak kotilil Juda ak Jerusalem.
6
Ak kiyachi ko u noto nganasokab Manase ak Epraim, ak Simeon, agoi Naptali, ak komoswek tugul che bo karatwekwak.
7
Ak kibut kapkorosusiek, ak kong’a Aserik ak kanamonik che kigiwai ak kanamonik che kigitany, koek temburiek, ak koluul kanamonik tugul che bo asista eng’ emet komugul ne bo Israel, yeityo koweek Jerusalem.
8
Ak eng’ kenyitab taman ak sisiit ne bo laitornatennyi, ye kiga kotilil emet ak got, koyokto anyun Sapan weritab Asalia, ak Maaseia bounindetab nganaset, ak Joa weritab Joahas sirindetab tuguk che biitu, koteech ole kigobutok eng’ gotab Jehovah Kamuktaindennyi.
9
Ak kibwa ole mi Hilkia, tisiindet ne o, ak kogochi fedaisiek che kigiibu kobwa gotab Kamuktaindet, che kiga koyum Lawik, ribikab kurget, che kigiyumune Manase ak Epraim, ak Israel tugul che kigong’et, ak che bo Juda tugul ak Benjamin ak che bo bik che kimenyei Jerusalem.
10
Ak kiigochi kiboitinik che kitononjin gotab Jehovah; ak kiigoito kiboitinik che kiboisiei eng’ gotab Jehovah si kobiit kechobe ak keteege ole kiga kobutok eng’ got;
11
kiigochi musogik ak teegik, koale koik che kigewai, ak baoinik che kigituiyote, ak che kiyae bambanikab gorik che kiga kobut laitorinikab Juda.
12
Ak kiyai bichoto boisiet koek bik che kiyani: ak kandoikab bichoto ko ki Jahat ak Obadia, Lawik eng’ werikab Merari; ak Sekaria ak Mesulam eng’ werikab Kohat, che kiichirjiri boisiet: ak Lawik alak, che ki utotin eng’ butetab kibugandinik.
13
Ak kibou kogeny bik che kilaei milosiek, ak kiichirjiri tugul che kiyaei boisiet age tugul: ak kimi Lawik che ki sirik ak kiptainik ak ribikab kurgotik.
14
Ak ye kingonem fedaisiek che kiga kiib kobwa gotab Jehovah, konyor Hilkia tisiindet bukuitab Ng’atutikab Jehovah che kigonu Musa.
15
Ak kiwolji Hilkia Sapan sirindet, kolenji, Kaanyoru bukuitab Ng’atutik eng’ gotab Jehovah. Ak kiigochi Hilkia Sapan bukuinoto.
16
Ak kiipchi Sapan laitoriat bukuinoto, ak kilenji laitoriat kogeny, Yaei otwogiguk kit age tugul ne kemwachi.
17
Ak kigoib fedaisiek tugul che kiginyorji gotab Jehovah, ak kogoch ribik, ak kiboitinik.
18
Ak kimwachi Sapan sirindet laitoriat kolenji, Kagona Hilkia tisiindet bukuit. Ak kisoman Sapan bukuinoto eng’ taitab laitoriat.
19
Ak kingogas laitoriat ng’alekab ng’atutichoto, kobet ngoroikyik.
20
Ak king’at laitoriat Hilkia, ak Aikam weritab Sapan, ak Abdon weritab Mika, ak Sapan sirindet, ak Asaia otwogindetab laitoriat, kolenji,
21
Oba oteebunena Jehovah, ak agobo bik che king’et eng’ Israel ak Juda, agobo ng’alekab bukuit ne kogenyor: amu o nereknatetab Jehovah ne rong’jinech, amu ma rib kwanisiekyok ng’olyotab Jehovah, koyai ko u tugul che kigisirji bukuini.
22
Kiba anyun Hilkia ak ichek che kiiyokto laitoriat, oldab Hulda chebioset ne maotiot, osotiotab Salum weritab Tokat, weritab Hasra, ribindetab ngoroik; (kimenyei Jerusalem nganaset ne bo aeng’;) ak komwachi ko u noto.
23
Ak kilenji ichek, Kamwa Jehovah Kamuktaindetab Israel ko u ni, kole, Omwachi chito ne kaiyokwok obwa ole ami, olenji,
24
Kamwa Jehovah ko u ni, kole, Ogeero, aipchini yaitiet yuto, ak ichek che menyei olito, chubisiosiek tugul che kigisirji bukuit ne kagesoman eng’ taitab laitoriatab Juda:
25
amu kigometa, ak kigobeelji nyamdutik kanamonik, si kobiit kotacha anerech eng’ boisionik tugul che bo eunekwak; noto anyun, karong’jige neregekyuk yuto, ama kimisi.
26
Ago olenji laitoriatab Juda, ne kagoyokwok obwa oteepse Jehovah, Kamwa Jehovah Kamuktaindetab Israel ko u ni, kole: Eng’ ng’alechato kaigas,
27
amu ki tangus muguleldang’ung’, ak kiiming’ingei eng’ taitab Kamuktaindet, ye kegas ng’alekyik che nerekyin yuto, ak bik che menyei olito, ak iming’inige eng’ tainnyu, ak igerer ngoroiguk, ak irir eng’ tainnyu; ko kaagasun agane, mwaei Jehovah.
28
Keero, ayumin iwe ole mi kwanisieguk, ak iwe kerering’ung’ eng’ kalyet, ama keerei konyeguk yaitiet tugul ne aipchini koroni, koboto bik che menyei. Ak kiipchin laitoriat ng’olyot kogeny.
29
Koyokto anyun laitoriat kiyum boisiek tugul che bo Juda ak Jerusalem.
30
Ak kitogosta laitoriat gotab Jehovah, koboto bik tugul che bo Juda ak bik che kimenyei Jerusalem, ak tisiik, ak Lawik, ak bik tugul, che eechen ak che mengechen: ak kosoman ng’alek tugul che bo bukuitab arorutiet ne kiginyoru eng’ gotab Jehovah.
31
Ak kitonon laitoriat eng’ komostanyi, ak koyai arorutiet eng’ taitab Jehovah, kosub Jehovah, ak korib ng’atutikyik, ak baornatosiekyik, ak kayomisutikyik, eng’ muguleldanyi tugul, ak eng’ sobondanyi tugul, kosub ng’alekab arorutiet che kigisirji bukuini.
32
Ak king’at bik tugul che kimi Jerusalem ak Benjamin kotononso koyan ng’alechato. Ak kiyai che kimenyei Jerusalem ko u kayomisetab Kamuktaindet, Kamuktaindetab kwanisiekwak.
33
Ak kiisto Josia tuguk tugul che kiwechei eng’ emotinwek tugul che bo Israel, ak kong’at bik tugul che bo Israel kootis, koot Jehovah Kamuktaindenywa. Ma meto bichoto kosub Jehovah Kamuktaindetab kwanisiekwak, eng’ betusiekyik tugul.
← Chapter 33
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 35 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36