2 Thessalonians 1

Kalenjin Bible (BUKUIT NE TILIL)

Jump to: Chapter 2 →

1Paulo, ak Silbano, ak Timoteo, kisirjini kanisetab Tesalonikek eng’ Jehovah Kwandanyo ak Kiptaiyat Jesu Kristo:

2Ingoteb kobotok mieindo ak kalyet che bunu Jehovah Kwanda ak Kiptaiyat Jesu Kristo.

3Kanyol kemwachi Jehovah kongoi betusiek tugul agobo okwek, che kitupche, ko u ye nyolu, amu nerei kayaneng’wong’ mising’, ak ko tesoksei chamnyet ne oting’ege okwek tugul;

4kot kichounenok ge okwek eng’ kanisosiekab Jehovah amu muitaeng’wong’ ak kayanet eng’ usisiosiekwok tugul ak nyalilwogik che omuitoi;

5nito kaborunet ne toogunot ne bo kiruogetab imanda ne bo Jehovah; si kobiit kiitok kele onyolu eng’ bounatetab Jehovah, ne onyorune agine nyalilda:

6si ngo kiy ne bo imanda eng’ Jehovah koyaakyi mugetut ne bo nyalilda icheget che inyalilok,

7ak kogonok kamuung’et kobotech, okwek che kiusei, eng’ ng’ang’etab Kiptaiyat Jesu kobunu kipsengwet koboto malaikaisiek che bo kamuktaennyi

8eng’ mat ne lalei, koyaakyi mugetut icheget che ma nai Jehovah, ak ichek che magase it logoiywek che miach che bo Kiptaiyandennyo Jesu:

9che tun nyoru biret, noto ng’emisiet ne bo koigeny ko kageisto eng’ taitab Kiptaiyat ak eng’ torornatetab kimnatennyi,

10ye tun nyo si kobiit kitoror eng’ chechik che tililen; ak kekwong’e eng’ ichek tugul che iyani (amu kigiyan baornatennyo eng’ okwek), eng’ betunoto.

11Noto anyun kisaiywok kotugul, si kobiit koiitok Jehovah nenyo kole onyolu eng’ kuurseng’wong’, ak kosulda maget age tugul ne bo mieindo ak boisiet age tugul ne bo kayanet, eng’ kamuktaet;

12si kobiit kitoror kainetab Kiptaiyandennyo Jesu eng’ okwek, ak okwek eng’ inendet, ko u mieindab Jehovah nenyo ak Kiptaiyat Jesu Kristo.

Jump to: Chapter 2 →