2 Thessalonians 3

Kalenjin Bible (BUKUIT NE TILIL)

← Chapter 2 Jump to:

1Ne bo let anyun, che kitupche, osaiywech, si kobiit kochakta ng’olyotab Kiptaiyat ak kitoror, ko u ole teptoi eng’ okwek agine;

2si kobiit kesoruech eng’ bik che ngelelik ak che yaachen; amu matinyei tugul kayanet.

3Ago Kiptaiyat ko ne kiyani, ne igimitok, ak koribok eng’ noto ya.

4Ak kitinye kamang’unet eng’ Kiptaiyat agobo okwek, kele oyae ak ko ta oyae tuguk che king’ate.

5Ak ingondochi Kiptaiyat mugulelwekwok agoi chamnyetab Jehovah, ak muitaetab Kristo.

6King’atok anyun, che kitupche, eng’ kainetab Kiptaiyandennyo Jesu Kristo, kele oistoege tupchet age tugul ne wendoti eng’ bistoet, ama ko u bitonwek che kionyorunenech.

7Amu ongen okweget ko u ye kanyol oyai ko u ye kiyae: amu kima kitebi achek eng’ kwenung’wong’ ko u bik che maribegei;

8ama kiam amitwogikab chi age tugul buch, ago eng’ boisiet ne uui ak bichiindo, keboisiei kemoi ak bet, si ma kiim chi age tugul eng’ okwek:

9ma amu kele magitinye kimnatet, ago si kobiit keyaige keegu kaborunet eng’ okwek, si kobiit oyai osubenech.

10Amu agot ye kigimi kobotok, ko kiging’atak ko u ni, kele ngo macham chi age tugul kobois, ko mat ongoamis.

11Amu kigase agobo alak eng’ kwenung’wong’ che bendoti eng’ bistoet, che maboisiei agot kitigin, ago kibieminik.

12Ago king’ate ak kiteechini che u choto eng’ Kiptaiyat Jesu Kristo, kele kobois eng’ mutyonet, ak koam amitwogikwak.

13Ago okwek, che kitupche, among’etye eng’ yaet ne oyae ne mie.

14Ak ngo magase it chi age tugul ng’olyondennyo eng’ baruani, obwat chichoto, amat oyomege ak inendet, si kobiit kolilan.

15Amoiit inendet ole bunyot, ago otigon ko u tupchet.

16Nguno anyun ingogonok kalyet Kiptaiyat inendet, ne Kiptaiyat ne bo kalyet, kotugul eng’ ui tugul. Ingoteb Kiptaiyat kobotok okwek tugul.

17Kagatennyu ane Paulo eng’ eunnyu, noto kaborunet eng’ baruet age tugul: asire anyun ko u noto.

18Ingoteb mieindab Kiptaiyandennyo Jesu Kristo kobotok okwek tugul.

← Chapter 2 Jump to: