2 Thessalonians 2

Kalenjin Bible (BUKUIT NE TILIL)

← Chapter 1 Jump to: Chapter 3 →

1Kisomok anyun, che kitupche, agobo nyonunetab Kiptaiyandennyo Jesu Kristo, ak kayumennyo bo ge ne kiyumjinige inendet;

2si motoptobense ochokyi eng’ kabwatutikwok, anan oarogense, ngot ko eng’ tamirmiriet, anan eng’ ng’olyo, anan eng’ baruet ne olen bunwech, olen kagoit betutab Kiptaiyat;

3amat kong’alak chi eng’ kiy age tugul; amu maitu betunoto, kobate indou katuituet ak keng’any chito ne bo tengekto, weritab luset,

4inendet ne kirindoi ak kotororegei kogirindoi tugul che kiguure Jehovah anan che kilosu; si koteb anyun eng’ hekalutab Jehovah, koborugei inendet ko u ne Jehovah.

5Tos mobwati, yu kiami kobotok, ole kiamwawok tuguchu?

6Ak nguno ongen noto ne ranyei, si kobiit keng’any eng’ betusiekyik.

7Amu boisiei nguno ung’otietab ngelelnatet; kobate mi agenge ne ranyei nguno, agoi keisto.

8Ak yeityo keng’any ngeleliot, ne tun barei Kiptaiyat Jesu eng’ kabusetab kutinnyi, ak kong’em koek buch eng’ ng’ang’etab nyonunennyi;

9nyonunennyi konamegei ak boisietab Setani koboto kamuget tugul ak kaborunoik ak kwong’utik che bo lembech,

10koboto kenisiet tugul che ma bo imanda agobo ichek che lustos; amu ma taach chamnyetab imanit, si kobiit kesor.

11Amu nito anyun, iyokyin Jehovah ichek kamaaset ne boisie si kobiit koyan lembeita:

12si kobiit kiruokyi ichek tugul che ma iyan imanit, ago che kiboiboitune che ma bo imanda.

13Ago kanyol kemwachi Jehovah kongoi kotugul agobo okwek, che kitupche che chamanikab Kiptaiyat, amu kilewenjok Jehovah yetunet koboch taunet eng’ katabanetab Tamirmiriet ak kayanetab imanit:

14kiguurok anyun eng’ choto eng’ logoiywekyok che miach, si kobiit onyoru torornatetab Kiptaiyandennyo Jesu Kristo.

15Noto anyun, che kitupche, olumdege, ak onam bitonwek che kiginetak, ngot ko eng’ ng’olyot, anan eng’ baruennyo.

16Nguno anyun, ingogaigai Kiptaiyandennyo Jesu Kristo, ak Jehovah Kwandanyo ne kichamech ak kogonech kagaigaet ne bo koigeny ak kamang’unet ne mie eng’ mieindo,

17kogaigai mugulelwekwok ak kogimit ichek eng’ boisiet age tugul ne mie ak ng’olyot.

← Chapter 1 Jump to: Chapter 3 →