Acts 19

Kalenjin Bible (BUKUIT NE TILIL)

← Chapter 18 Jump to: Chapter 20 →

1Ak ye kita komi Apolo Korinto, ko kagobun Paulo emet kwen, koit Epeso, ak konyor alamalyet:

2ak kilenji ichek, Tos kiotaach Tamirmiriet ne Tilil ye kingoyan? Kolenji, Achicha, tomo agot kegas ngo mitei Tamirmiriet ne Tilil.

3Ak kilenji, Kigibatisanjok nee anyun? Ak kile, Kigibatisanjech kabatisanetab Johana.

4Kole Paulo, Kiibatisanis Johana eng’ kabatisanetab sigunet, kolenjin bik kanyol koyan inendet ne isubu inendet, noto ko Jesu.

5Ak ye kingogas nito, kibatisan eng’ kainetab Kiptaiyat Jesu.

6Ak ye kingo kagogonoor Paulo eunekyik icheget, konyonji anyun Tamirmiriet ne Tilil ichek; ak king’alal eng’ kutuswek che terotin, ak koamda.

7Ak ki olo bo taman ak aeng’ bichoto tugul.

8Ak kiwa sunagogit orit, ak kong’alal eng’ nyiganatet eng’ arawek somok, kong’alali ak kolomei agobo tuguk che bo bounatetab Jehovah.

9Ago ye kingouuegitu mugulelwekab alak ak kobistoe, ak komwaei ne ya agobo Oranato eng’ taitab tuiyet, kwo eng’ ole mi, ak kotaban alamalyet, kong’alaljin betut age tugul eng’ skulitab Turano.

10Kiyaak ko u noto eng’ kenyisiek aeng’; kot kogas ng’olyotab Kiptaiyat tugul che kimenyei Asia, Yahudik koboto Yunanik.

11Ak kiyai Jehovah boisionikab kimnatet che ter eng’ eunekab Paulo:

12kot keipchi che miandos kitambaok ak angok che kiga kotiiny bortanyi, ak kiistogei mainwek eng’ bichoto, ak kimanda tamirmirik che yaachen eng’ ichek.

13Ak kitoi Yahudik alage che kiombenoti, che kilen koon oik, komwa kainetab Kiptaiyat Jesu eng’ icheget che kitinyei tamirmirik che yaachen, kolen, Ayosiewok eng’ Jesu ne amdoi Paulo.

14Ak kimi werik tisabu che bo Skeba, inendet Yahudiot, tisiindet ne o, che kiyai ng’olyondonito.

15Ak kiwolji tamirmiriet ne ya ichek, kolenji, Angen Jesu, ak angen Paulo: ago okwek ko o ng’o?

16Ak kitorombenji chichoto kitinyei tamirmiriet ne ya ichek, ak konenet ichek, ak koterter, kot komwei komanda eng’ goyoto ach ngor ko kagiguoten.

17Ak kinaak nito eng’ tugul, Yahudik koboto Yunanik, che kimenyei Epeso; ak kinyor kaiyweisiet ichek tugul, ak kinyor teegisto kainetab Kiptaiyat Jesu.

18Kibwa agichek che chang’ che kiiyan, kong’anyei, ak kobortoi boisionikwak.

19Ak kiib bukuisiekwak bik che chang’ eng’ ichek che kiyaei ng’orset, ak kobeel eng’ taitab bichoto tugul: ak kiit kamanutienywa, konyor kole kiitei fedaisiek elfusiek konom.

20Kotesak ko u noto anyun ng’olyotab Kiptaiyat eng’ kimnatet ak koterter.

21Kingobata anyun tuguchuto, komach Paulo eng’ tamirmiriennyi kwo Jerusalem, ko kagobun Makedonia ak Akaya, kolen, Ye kaawe oloto, ko kanyol ageer Rom agine.

22Ye kingo kagoyokto aeng’ eng’ ichek che kiboisiechin inendet koba Makedonia, Timoteo ak Erasto, kota kotebi inendet eng’ Asia ne matia.

23Ak king’eet bolatet ne o eng’ betusiechoto agobo Oranato;

24amu chito age ne kiguure Demetrio, kitang’indet ne bo feda, ne kiitanyi kanamonik che bo feda che bo Artemi, ne kiipchin tuguk che chang’ kitang’ik;

25che kiiyum kibagenge koboto bik che kitinyei boisiet ne u noto, ak kolenji, Murenju, ongen okwek ole, bunu magornatennyo boisioni.

26Ak ogeere ak ogase ole, ma eng’ Epeso kityo, ago negit Asia tugul, kagochuut bik che chang’ Paulo-inito, ak koweechi, kolenjin, choto kigiyae eunek ko ma cheptalelisiek:

27ak ma kele kityo biitu bichiindab sasisiet ne kisasei boisiennyo; ago kiiti kele ma kiy hekalutab cheptalelit ne o ne kobogoriot Artemi, ak keistoe inendet teegistannyi, ne koilosu Asia tugul koboto ng’ony.

28Ak ye kingogas nito, konerekso inne, ak kobolyo, kole, O Artemi ne bo Epesoek.

29Ak konyi anyun nganaset bolatet: ak koruai kibagenge oldab ureriet, ko kagonam Gaio ak Aristarko, bikab Makedonia, che kibendoti ak Paulo.

30Ak ye kimachei kwo Paulo orit ole mi bik, ko ma kochamji alamalyet.

31Ak kiiyokto ng’olyot bik alage che eechen che bo Asia, amu ki choronokyik, si mat kogoitogei kwo oldab ureriet orit.

32Kiboldos anyun alage, komwaei ni, komwaei alage kit age: amu kibiit bolatet eng’ tuiyet; ak kima kongen che chang’ kit ne kiigochi kotuiyo.

33Ak kiimut Aleksandro komong’ eng’ tuiyet, kogoito Yahudik inendet. Ak kiiborji Aleksandro bichoto eng’ eut, ak kimachei kosorgei eng’ bichoto.

34Ago ye kingonai kole inendet ko Yahudiot, kobolyo tugul eng’ kutit agenge, eng’ olo bo saisiek aeng’, kolen, O Artemi ne bo Epesoek.

35Ak kingo kagomwachi sirindetab nganaset tuiyet kosisyo, kole, Okwek bikab Epeso, tos mi ng’o ne maingen kole nganasetab Epesoek ko ribindetab hekalutab Artemi ne o, ak kanamwet ne kiibut kobunu barak?

36Ak ngo magimuchi ketiiyo agobo tuguchu, ko kanyol osisye, mat osartae ng’olyo.

37Amu kaomutu bichu, che ma rebikab hekalusiek ama chubei cheptalelinnyo ne kobogorio.

38Ngo tinyei anyun Demetrio ak musogik che mi koboto inendet, ng’olyo agobo chi, ko yatotin kapkiruogutik, ak mitei bounik: ingoruokyin anyun ichegei.

39Ago ngocheng’ okwek ng’olyo agobo tuguk alak, ko tun kilititi eng’ tuiyet ne cham komi.

40Amu mi bichiindo ne tos kiruokwech agobo bolatet ne bo rani, amu mami kito ne bo: ak magimuchi ketetu kiy agobo tuiyoni.

41Ak kingo kagomwa ko u noto, komwachi tuiyet koba.

← Chapter 18 Jump to: Chapter 20 →

Recommended Reading

Commentary Acts Commentaries → Devotional Acts Devotional Guide → Get This Bible Kalenjin Bible (BUKUIT NE TILIL) Study Bible →