Acts 5

Kalenjin Bible (BUKUIT NE TILIL)

← Chapter 4 Jump to: Chapter 6 →

1Ago kialda chito age ne kigiguure Anania, ak osotiondennyi Sapira, korennyi,

2ak kiituuch kebebertab che kigialdae, kongen agine osotiondennyi, ak kiib kebeberta age, konde kelyekab che kiyoktoi.

3Ago kile Petero, Anania, kalya si konyi Setani muguleldang’ung’ kot iberber Tamirmiriet ne Tilil, ak ituuch kebebertab che kigialdae koret?

4Kingota komi, ko kima ko neng’ung’? Ak kingo kagealda, ko kima ibou? Kalya si ichob kii eng’ muguleldang’ung’? Ma iberber chi, ago Jehovah.

5Ak kingogas Anania ng’alechu, kobut ak kome: ak kinyonji kaiyweisiet ne o tugul che kigas.

6Ak king’eetyo murenik ak kotaae musto anget, ak kisut kwo sang’ ak kotub.

7Ak ye ki negit kogesgei saisiek somogu, koit osotiondennyi agine, ak kima kongen kit ne kagoyaak.

8Ak kiwolji Petero kolenji, Mwawa ngo kioaldae koret tuguk che te choto. Kole, Ee, te choto.

9Ago kilenji Petero inendet, Katepto ano kot ochamnyechi tuwai oyom Tamirmirietab Kiptaiyat? Keero, mi kurgat kelyekab icheget che katubei manong’otiondeng’ung’, ak sutin aginye imande.

10Ak kiibutyi kelyekyik ngunoto, ak kome: kobwa go anyun murenik konyor ko kagome, ak kisut kwo sang’ ak kotupchi ye negite manong’otiondennyi.

11Konyonji anyun kaiyweisiet ne o kaniset komugul, koboto tugul che kigas tuguchoto.

12Ak kiyaogis eng’ eunekab che kiyoktoi kaborunoik ak kwong’utik che chang’ eng’ kwenutab bik; ak kimi tugul eng’ kabwatet agenge eng’ keterut ne bo Solomon.

13Ago eng’ bik alak ko kimata kobiit chi ne kita kogany konamgei ak icheget; ago kiitoror bik ichek;

14ak kitesak kayanik eng’ Kiptaiyat kosiir, kichang’a murenik koboto kobogorisiek;

15kot komut ichek che miandos kobwa ortinwek, ak komogonji itogusiek ak kiplusisiek, kole, tamangab kokwer uruetab Petero alak eng’ ichek, kosiirtoi.

16Ak kiiyomogei tuiyet ne bunu nganasok che negite Jerusalem, komutu che miandos, koboto che kiinyalili tamirmirik che muruonen: ak kigisoob age tugul eng’ ichek.

17Ago kitonon tisiindet ne o, ak tugul che kimi koboto inendet (kasubikab Sadukaik choto), ak ki nyiitat ichek ng’et konda,

18ak kinam che kiyoktoi, ak kotoorji korgoret ne bo bik tugul.

19Ago kiyat malaikaiyatab Kiptaiyat kurgotikab korgoret kemoi ak komut ichek komong’ sang’, ak kolenji,

20Oba, ak otonon eng’ hekalut ak omwachi bik ng’alek tugul che bo Soboni.

21Ak kingogas ko u noto, koba hekalut ko kaech, ak konetis. Ago kinyo tisiindet ne o, ak che kimi koboto inendet, ak koguur kiruoget, ak boisiek tugul che bo lagokab Israel, ak koyokto kimut ichek kobwa eng’ ole kigiratyi.

22Ago kingoit askarik korgoret ko manyor ichek: ak kiweektagei, ak komwaita,

23kole, Kaginyoru ko kerat komie korgoret, ak kotonondos ribik eng’ kurgotik: ak ye kangeyat, koma kenyorji chi orit.

24Ak kingogas ng’alechu kiptaiyatab hekalut ak tisiik che eechen, koiimgei mising’ agobo ichek kole egu nee anyun ng’alechu.

25Ak kinyo chi ak kolenji, Ogeero, bicho kogotoorji korgoret, kotonondos eng’ hekalut ak koneti bik.

26Kwo anyun kiptaiyat koboto askarik, ak komut kobwa, ago ma eng’ kimnatet; amu kiiywei bik kole si ma kilach ichek eng’ koik.

27Ak kingo kagomut ichek kobwa, konde taitab kapkiruok. Koteebe tisiindet ne o ichek,

28kole, Kigeetenak inne kele, amatata onet bik eng’ kainani: ak ogeero, kionyiit Jerusalem konetisieng’wong’, ak omache oibwech korotikab chichito kobwanjech.

29Ago kiwol Petero ak che kiyoktoi kole, Kanyol kegas it Jehovah kosiir bik.

30Kiing’eet Jehovah ne bo kwanisiekyok Jesu, inendet ne kiobar ogartat eng’ ketit.

31Inendet ne kiitoror Jehovah eng’ eunnyi ne bo tai koek Ne O ago Yetindet, si kogochi Israel sigunet, ak nyoetab kaat ne bo tengekwogik.

32Ak ki baorinik achek che bo tuguchu; ak Tamirmiriet ne Tilil agine, ne kigogochi Jehovah ichek che kase it inendet.

33Ak kingogas ichek nito, kong’wanit mising’ eng’ mugulelwekwak, kot komach kobar ichek.

34Ago kitonon chito age eng’ kapkiruok, Parisaindet, ne kigiguure Gamaliel, konetindetab Ng’atutik, ne kigonyiti bik tugul, ak kong’at kole kimut bichoto koba sang’ ne matia.

35Ak kilenji ichek, Okwek bikab Israel, oripge eng’ bichu, eng’ kit ne omache oyai.

36Amu kingo tom koit betusiechu, koit Teudas kochoigei kole, a chito ne o; ak konamgei ak inendet bik che itei olo bo bogol ang’wan: ak kigibar inendet; ak kiyesta tugul che kigase it inendet, ak kibetyo.

37Kingobata chichoto kong’eet Judas ne bo Galili eng’ betusiek che bo sirisietab kainaikab bik, ak kochuut bik alak kosub inendet: kime agine; ak kiyesta tugul che kigase it inendet.

38Ara anyun, amwawok nguno, ale, Oistoege bichu, ak obagakte ichek: amu ngo bo bik ng’alechu anan boisioni, kowong’ugei:

39ago ngot ko bo Jehovah, ko momuchi owong’u; si ma kinyoruok obortosi ak Jehovah.

40Kocham anyun ng’alekyik: ak kingo kagoguur che kiyoktoi kobwa ole mi ichek, kobir ak kong’at kolenji, amatata ong’alale kainetab Jesu, ak kiunda koba.

41Koba anyun eng’ taitab kapkiruok koboiboi amu kagiit kele nyoljin konyor katewerisiet agobo Kainanato.

42Ak kima sisyo eng’ betut age tugul konetis ak koamdoi eng’ hekalut ak eng’ gorik, kole Jesu ko Kristo.

← Chapter 4 Jump to: Chapter 6 →