Acts 4

Kalenjin Bible (BUKUIT NE TILIL)

← Chapter 3 Jump to: Chapter 5 →

1Ak kingota kong’alaljin ichek bik, kobwanji icheget tisiik ak kiptaiyatab hekalut ak Sadukaik,

2kotinyei neregek amu kiinet bik ak koamda eng’ Jesu ng’eetyetab che kibek.

3Ak kinam icheget, ak kotoorji korgoret agoi mutai: amu kiga koimen.

4Ago kiiyan che chang’ eng’ ichek che kigas ng’olyot; ak kiek koitetab murenik olo bo elfusiek mut.

5Ak eng’ betut ne kiisubi noto koyumgei bounik ak boisiek ak sirik eng’ Jerusalem;

6ak Anas tisiindet ne o, ak Kaiapa, ak Johana, ak Aleksandro, ak tugul che bo oretab tisiindet ne o.

7Ak kingo kagonde ichek kwenunywa, koteebe kole, Nee kamuget ne koyae ni, anan eng’ kainetab ng’o?

8Kingonyi anyun Petero Tamirmiriet ne Tilil, kolenji ichek, Okwek bounikab bik ak boisiek,

9ngemachei keginenech rani agobo boisiet ne mie ne kogiyachi chito ne nyalulat, ole kogisoopto chichito;

10ingonaak anyun eng’ okwek tugul, ak eng’ bik tugul che bo Israel ole, eng’ kainetab Jesu Kristo ne bo Nasaret, ne kiogartat okwek, ne kiing’eet Jehovah eng’ che kibek, tononi chichi eng’ yu, eng’ taing’wong’, ko kagosob eng’ inendet.

11Inendet koita ne kiosas okwek teegik, ne kiga kiyai koek metitab luita.

12Ama mi yetunet eng’ chito age: amu mami kainet age eng’ kureretab kipsengwet, ne kigigochi bik, ne kanyol kesorunenech.

13Ak kingogeer nyiganatetab Petero ak Johana, ak konai kole bik che ma kinet, ama toogunotin, kokwong’io; ak kinai kole, kicham komi koboto Jesu.

14Ak kingogeer chito ne kogisoob kotononi koboto ichek, ko mata komuch komwa kiy agobo noto.

15Ago ye kingo kagong’at ichek komanda eng’ kapkiruok, kong’alal ichegei,

16kole, Kiitoi nee bichu? Amu naat eng’ bik tugul che menyei Jerusalem kele koyaak iman eng’ ichek kwong’utiet ne o, ama kimuchi ketiiye.

17Ago si mata koiyestaat eng’ kwenutab bik, konyolu keger kong’ ichek, si mata kong’alalji chi age tugul eng’ kainanito kogeny.

18Ak kiguur ichek, ak kong’at ichek, kolenji, amatata kong’alal agot kitigin anan konetis eng’ kainetab Jesu.

19Ago kiwolji Petero ak Johana ichek kolenji, Ngo mie eng’ taitab Jehovah kegasak kosiir Jehovah, oruoch okwek:

20amu magimuchi kesisye kobate kemwa tuguk che kigegeer ak che kigegas.

21Ak kingo kagoger kong’ ichek kogeny, kounda koba, ko mata konyor ng’olyot ne iruokyine, amu bik; amu kiitoror bik tugul Jehovah agobo noto koyaak.

22Amu kisiirei artam kenyisiekab chichoto kiyaak eng’ inendet kwong’utionito bo kasoobet.

23Ak kingo kageunda, koba ole mi bikwak, ak komwaita tugul che kamwachi tisiik che eechen ak boisiek.

24Ak kingogas ichek komwachi Jehovah eng’ kutit ne o eng’ kabwatet agenge, kolenji, Ee Kiptaiyat, inye ne kiiyai kipsengwet ak ng’ony ak nyanjet, ak tugul che mi oloto:

25ne kiimwa eng’ Tamirmiriet ne Tilil eng’ kutitab kwandanyo Daudi kiboitiondeng’ung’, ile, Kilya si kobolyo Bororiosiek, Ak kobwatoti bik tuguk che manamegei ak kiy?

26Kitetegei laitorinikab ng’ony, Ak koyumegei bounik, Agobo Kiptaiyat, ak Kristo nenyi:

27amu iman kituitos eng’ nganasani Herod ak Pontio Pilato agine koboto Bororiosiek ak bikab Israel, kole kogirinda Kiboitiondeng’ung’ ne Tilil Jesu, ne kiil,

28si koyai kit age tugul ne kisib kong’at eung’ung’ ak ng’omnateng’ung’ kole kosulda.

29Ak nguno anyun, Kiptaiyandani, keer kertaenywa bo kong’: ak igochi otwogiguk komwa ng’olyondeng’ung’ eng’ nyiganatet tugul,

30ye iitoi inye eung’ung’ isoobi bik; si koyaak kaborunoik ak kwong’utik eng’ kainetab Kiboitiondeng’ung’ ne Tilil, noto ko Jesu.

31Ak kingo kagosa, kotumdumgei ole kiga koyumjigei; ak kinyi ichek tugul Tamirmiriet ne Tilil, ak kimwa ng’olyotab Jehovah eng’ nyiganatet.

32Ak ki bo muguleldo agenge ak sobondo agenge tuiyet ne kiga koyan: ak ma mwa chi agot agenge kole, nenyi kiy age tugul ne kitinyei; ago kiyamdoi tugukwak tugul.

33Ak kibaorian che kiyoktoi eng’ kimnatet ne o agobo ng’eetyetab Kiptaiyat Jesu: ak kitebe mieindo ne o ichek tugul.

34Amu kima komi agot agenge eng’ kwenunywa ne kibanani kiy: amu tugul che kitinyei korotinwek anan gorik, ko kialda, ak koib tuguk che kiga aldae kobwa

35konde kelyekab che kiyoktoi: ak kigipchechi chi age tugul ne kinyalili.

36Ak kialda Josep mbaret ne kitinyei, inendet ne kitochi che kiyoktoi kainet ne bo aeng’ koguure Barnaba (ne ye kiweech, ko Weritab kagaigaet), Lawindet, chito ne kisalu Kupro,

37ak kiib siling’isiek konde kelyekab che kiyoktoi.

← Chapter 3 Jump to: Chapter 5 →