Amos 7

Kalenjin Bible (BUKUIT NE TILIL)

← Chapter 6 Jump to: Chapter 8 →

1Kiiborua Kiptaiyat Jehovah ko u ni: ogeero, kiyai inendet chereng’enyinik ye kibitos tuguk che bo let; ogeero, ki tuguk che bo let che kibitos ye kingo kagobata ng’eetab suswek che bo laitoriat.

2Ak ye kingo kagoam suswek koges eng’ emet, ale anyun, Ee Kiptaiyat Jehovah, asain ale, nyochi kaat: tonondoi ano Jakobo? Amu ming’in.

3Kiwal Jehovah kabwatutikyik agobo nito: mabiitu ko u noto, mwaei Jehovah.

4Kiiborua Kiptaiyat Jehovah ko u ni: ogeero, kiguur Kiptaiyat Jehovah mat kobelisie; ak kibeel riret ne o, ak komach koam emet.

5Yeityo amwa ale, Ee Kiptaiyat Jehovah, asain ale, Isis; tonondoi ano Jakobo? Amu ming’in.

6Kiwal Jehovah kabwatutikyik agobo nito: Mabiitu nito agine, mwaei Kiptaiyat Jehovah.

7Kiiborua inendet ko u ni: ogeero, kitonone Kiptaiyat ole negite inatut ne kigilitite borowet, kotinyei eng’ eunnyi borowet ne kilititisie.

8Ak kilenja Jehovah, Amos, igeere nee? Ak kiale, Ageere borowet ne kilititisie. Kile anyun Kiptaiyat, Keero, andoi borowet ne kilititisie kwenutab bikyuk Israel; ma abune kogeny ole mi ichek:

9ak koguber komoswek che tororen che bo Isak, ak kebut oldinwek che tililen che bo Israel; ak ang’eet abar gotab Jeroboam eng’ rotwetab chok.

10Kiiyokto anyun tisiindet Amasia ne bo Bet-el keguur Jeroboam laitoriatab Israel, kelenji, Kogochaamin Amos eng’ kwenutab gotab Israel: maimuchi emet komuita eng’ ng’alekyik tugul.

11Amu mwaei Amos ko u ni kole, Kibarei Jeroboam eng’ rotwetab chok, ak keluul iman Israel kimut eng’ emennyi.

12Kilenji kogeny Amasia Amos, Ee inye, keerindoni, ui mwechi emetab Juda, ak iamisie eng’ oloto, ak imaoten eng’ oloto:

13ago mat kota imaoten kogeny eng’ Bet-el: amu oloto ko oldo ne tilil ne bo laitoriat, ak ko gotab laitornatet.

14Kiwolji anyun Amos Amasia, kolenji, Kima ko a maotiot, ak ki ma ko a weritab maotiot; ago kia mestowot, ak kia saborindetab mogoonik:

15ak kiimuta Jehovah ayagisiei, ak kilenja Jehovah, Ui maotenji bikyuk Israel.

16Kas anyun nguno ng’olyotab Jehovah: Imwae inye ile, Amat imaotenji Israel agobo kiy ne ya, anan imwa ng’olyo agobo gotab Isak.

17Mwaei anyun Jehovah ko u ni kole: Egu osotiondeng’ung’ chepkugoniot eng’ nganaset, ak kebare rotwetab chok weriguk ak tibiguk, ak kepchee borowet emeng’ung’; ak imee inyendet eng’ emet ne ng’wan, ak keluul iman Israel kimut eng’ emennyi.

← Chapter 6 Jump to: Chapter 8 →