Amos 9

Kalenjin Bible (BUKUIT NE TILIL)

← Chapter 8 Jump to:

1Kiageer Kiptaiyat kotonone ole negite kaptisisiet: ak kile, Kwer walisiekab tolochik, kot kotumdumgei tugatugik: yeityo itonaton walisiechoto eng’ metowekab ichek tugul; ak abere rotwetab chok che ng’etu: mamweei agot agenge eng’ ichek, ama chilili agot agenge.

2Agot ngo bal agoi oldab che kigobek, konemu eunnyu eng’ oloto; agot ngo togosta kipsengwet, achooru eng’ oloto.

3Agot ngo ung’egei tulwetab Karmel barak, acheng’e ak anemu eng’ oloto; agot ngo ung’enagei eng’ nyanjet orit, ang’ate eng’ oloto erenet, si kosus ichek.

4Agot ngo luul bunikwak, ang’ate rotwetab chok eng’ oloto, si kobar ichek: ak atokyige ichek aipchi yaitiet, maipchini kit ne mie.

5Amu Kiptaiyat Jehovah ne bo lugosiek, ko inendet ne twaei emet si kochoot, ak koririo tugul che menyei oloto; ak ng’eetei emet komugul ko u Ainet; ak koteny kogeny ko u Ainet ne bo Misri.

6Inendet ne teechei gorikyik eng’ kipsengwat, ne teechei yiemutiennyi eng’ baragutab ng’ony; inendet ne kuurei nyanjet ak korong’ji ng’ony; Jehovah kainennyi.

7Tos mou lagokab Etiopik eng’ ane, ee lagokab Israel? Mwaei Jehovah. Tos ma amutu Israel kotogos eng’ emetab Misri, ak amutu Pilistik eng’ Kaptor, ak amutu Suriek eng’ Kir?

8Ogeero, keerei konyekab Kiptaiyat Jehovah bounatet ne tinyei tengekto, ak ang’em aiste eng’ ng’ony; kobate mang’eme agesu gotab Jakobo, mwaei Jehovah.

9Amu, ogeero, ang’ate, ak ases gotab Israel eng’ bororiosiek tugul, ko u ye kisesei bek eng’ kit ne kisesisie, ago maibutyin ng’ony baiywat, agot ne ming’in.

10Begu eng’ rotwetab chok kiptengeginik tugul che bo bikyuk, che len, Maityinech yaitiet anan konyoruech.

11Ang’eeti eng’ betunoto emaitab Daudi ne kigobut, ak agerate ole kibutok; ak atuuru karatwekyik, ak ateech koigei ne ki bo betusiek che bo keny.

12Si kobiit konam ichek bik che king’et che bo Edom, koboto bororiosiek tugul, che kimwaitoe kainennyu, kobunji, mwaei Jehovah ne yaei ng’olyondonito.

13Ogeero, bwanei betusiek, mwaei Jehovah, che nyo kosiirtoe chito ne ibatisiei kesindet, ak kosiirtoe chito ne tiechei sabibuk kolindet; ak kosaune tulonok divaik che anyiny, ak kochootyo tulonok tugul che mengechen.

14Ak amutu kogeny bikyuk Israel che kiga keluul, ak koteech nganasok che kiga koek karatwek, ak komeny oloto; ak komin mbarenikab sabibuk, ak koeei divaikab mbarenichato; ak kobatis, ak koam logoekab mbarenichato.

15Ak amin ichek eng’ emenywa, ama kitutu kogeny eng’ emenywa ne kiagochi, mwaei Jehovah Kamuktaindeng’ung’.

← Chapter 8 Jump to: