Daniel 10

Kalenjin Bible (BUKUIT NE TILIL)

← Chapter 9 Jump to: Chapter 11 →

1Kiging’ang’ji Daniel ne kigiguure Beltesasar kiy eng’ kenyit ne bo somok ne bo Kirus laitoriatab Persia; ak ki bo iman kioto, noto ko ki boriet ne o: ak kiiguiyo, ak konyor kaguiyetab ng’ang’utiet.

2Kiarir ane Daniel eng’ betusiechoto, wigisiek somok che nyiitotin.

3Kima am amitwogik che miach, ama am banyek, amaee divaik, ama aiilge, agoi kogesgei wigisiechoto somogu.

4Ak eng’ betutab tiptem ak ang’wan ne bo arawet ne bo tai, ye kiami ngegutab ainet ne o, ne noto ko Hidekel,

5ayot met ak atobende, ageer chito ne ilaachi ngoroikab katanit, ne kiga rategei tahabu ne kararan ne bo Upas;

6ki u kogeny bortanyi berulo, ak ki u togennyi kalyelet, ak kiu konyekyik taisiek che bo mat, ak ki u eunekyik ak kelyekyik itondab sugunwet ne sitat, ak ki u twegunetab ng’alekyik twegunetab bik che chang’.

7Ak kiageer ng’ang’utiet anege, ane Daniel: amu ma keer ng’ang’utionoto bik che kigimi tugul; ago kibotanso mising’, ak komwei kounygei.

8Kiang’etu anyun anege, ak kiageer ng’ang’utionoto o, ak kima kota atinye kimnatet: amu kiwalak kororonindanyu kong’emak, ak ma ng’etwa kimnatet.

9Ago kiagas twegunetab ng’alekyik: ak kingagas twegunetab ng’alekyik, anuuch, asieb mo.

10Ak ogeero, kitwaa eunnyi ne kinama agutuny ak atebendoe eunekyuk.

11Ak kilenja, Ee Daniel, inye chito ne i chamat mising’, iguiye ng’alek che amwaun, ak itonon komie; amu kagiyokwa anyo oli imi: ak kingo kagomwawa ng’olyondonito, atonon abotani.

12Kolenja anyun, Ameiyweisie, Daniel; amu kigigasun ng’aleguk koboch betut ne bo tai ye kiimach iguiye eng’ muguleldang’ung’, ak iming’inge eng’ taitab Kamuktaindeng’ung’: ak kanyo amu ng’aleguk.

13Ago kiranya bounindetab bounatetab Persia eng’ betusiek tiptem ak agenge: ago keero, kinyo Mikael, age eng’ bounik che eechen kotoreta: ak kiatebe oloto koboto laitorinikab Persia.

14Kanyo anyun si kobiit aborun iguiye tuguk che tun bwanjin biguk eng’ betusiek che bo let: amu bo ng’ang’utiet betusiek che chang’.

15Ak kingo kagong’alalwa ng’alechuto, ang’uruge ak konamaga kut.

16Ak ogeero, kitwa kutinnyu age ne kergei ak werikab bik: ayat kutinnyu anyun, ang’alal, alenji inendet ne kitonon eng’ tainnyu, Ee kiptaiyandennyu, kagobwanja arogenosiekyuk amu ng’ang’utiet, ama ng’etwa kimnatet.

17Amu imuktoi ano otwogindetab kiptaiyandaninyu kong’alal ak kiptiyandennyu? Amu ne u ane, ko ko mata kong’etwa kimnatet, ak kagogera tigiis.

18Yeityo kotwaa kogeny age ne u chito, ak kiigimita.

19Ak kile, Ee inye, chito ne i chamat mising’ ameiywei: ingotebenen kalyet, kimitu, ee kimitu. Ak kingong’alalwa, agimitu anyun, ak kiale, Ingong’alal kiptaiyandennyu; amu kaigimita.

20Yeityo kole, Tos ingen ile amu nee si anyonjin? Kaweege anyun si kebarge ak bounindetab Persia: ak ye awe, keero, konyo bounindetab emetab Yunanik.

21Ago amwaun kit ne sirat eng’ sirutik che bo iman: ama mi age ne toreta agirinda tuguchuto, kobate Mikael bounindeng’wong’.

← Chapter 9 Jump to: Chapter 11 →