Daniel 5

Kalenjin Bible (BUKUIT NE TILIL)

← Chapter 4 Jump to: Chapter 6 →

1Kiyachi laitoriat Belsasar igorta ne o kiptainikyik elfut, ak koeei divaik eng’ taitab bichoto elfut.

2Ye kita koeei Belsasar Divaik, kong’at keib terenik che bo tahabu ak che bo feda che kiibu Nebukadnesar kwandanyi eng’ hekalut ne kimi Jerusalem; si kobiit koeeise laitoriat ak kiptainikyik, osotikyik ak chebaigeinikyik.

3Kigiib anyun terenik che bo tahabu che kigibune hekalut, gotab Kamuktaindet, ne kimi Jerusalem; ak kieeise laitoriat ak kiptainikyik, osotikyik, ak chebaigeinikyik.

4Kiee divaik ak kolos kanamonikab tahabu, ak che bo feda, che bo sugunwet, che bo karik, che bo ketik, ak che bo koik.

5Kitook eng’ sainato morikab eutab chito, ak kisir inatutab gotab laitoriat kotokyigei tait: ak kigeer laitoriat eunoto kisirisiei.

6Kowalak anyun togetab laitoriat, ak koiim inendet kabwatutikyik; ak kiirigisis ole tuiyechin kowekab suennyi, ak kibirgei kutung’oikyik.

7Kiguurso anyun laitoriat eng’ kutit ne o kimut ng’omotikab kecheik, Kaldeik ak kipsogeinik. King’alalji laitoriat bik che ng’omen che bo Babulon, kolenji, Chi age tugul ne somani sirutichu, ak koborua kaweeksennyi, kilaakyin ngoriet ne arus ne birir, ak kilaakyi kaatinnyi sirimdab tahabu, ak koek bounindet ne bo somok eng’ bounatet.

8Kibwa anyun bik tugul che ng’omen che bo laitoriat; ago ma imuch kosoman sirutichoto, anan koborji laitoriat kaweekset.

9Kiimak mising’ anyun laitoriat Belsasar, ak kiwalak togennyi, ak kiimogis kiptainikyik.

10Kinyo anyun chebiosetab gab laitoriat gotab igorta amu ng’alekab laitoriat ak kiptainikyik: king’alal chebiosanato kole, Ee laitoriandani, sob agoi; amatingoiimin kabwatutiguk, anan kowalak togeng’ung’:

11mitei chito eng’ bounateng’ung’ ne menyei tamirmirietab cheptalelisiek che tililen; ak kiginyorji chichoto eng’ betusiekab kwandang’ung’ lapkeiyet ak naet ak ng’omnatet, ne u ng’omnatetab cheptalelisiek: ak kiinde laitoriat Nebukadnesar kwandang’ung’, ne inendet ko laitoriat kwandang’ung’, kiinde inendet koek kiptaiyatab bik che ng’omen che ng’orsei, ng’omotikab kecheik, Kaldeik ak kipsogeinik;

12Amu kiginyorji Daniel tamirmiriet ne mie kot, ak naet, ak kaguiyet, kaweeksetab karuotitaosiek, ak ng’ang’etab ng’alek che ung’otin, ak kaborunetab tuguk che iimi bich, ne kiguure laitoriat Beltesasar. Iyokte anyun keguur Daniel, si kobor inendet kaweekset.

13Kigimut anyun Daniel konyo taitab laitoriat. King’alal laitoriat kolenji Daniel, Tos i Daniel, ne i bo lagokab bik che kigiluul che bo Juda, che kiimutu laitoriat kwandanyu eng’ Juda?

14Koagas agobo inye kele menyin tamirmirietab cheptalelisiek, ak kele itinye lapkeiyet ak naet ak ng’omnatet ne siirtoot.

15Ak kagimut bik che ng’omen, ng’omotikab kecheik, kobwa tainnyu, si kobiit kosoman sirutichuto, ak koborua kaweeksenywa: ago ma imuch kobor kaweeksetab kioto.

16Ago koagas agobo inye kele imuchi iboru kaweeksosiek, ak iboru tuguk che iimi bich: ngot imuchi anyun isoman sirutichuto, ak iborua kaweeksennyi, kilaagun anyun ngoroik che arusen ne birir, ak kilaakyi kaating’ung’ sirimdab tahabu, ak iegu bounindet ne bo somok eng’ bounatet.

17Kowolji anyun Daniel laitoriat kolenji, Ingobunjin kagochinoiguk, ak igochi melekweguk chito age; ago asomanjini laitoriat sirutichoto, ak aborjini inendet kaweekset.

18Ee laitoriandani, kiigochi Kamuktaindet ne Toror Mising’ Nebukadnesar kwandang’ung’ bounatet, ak oindo, ak torornatet, ak etunatet:

19kibotanso ak koiyweis eng’ tainnyi bik tugul, bororiosiek tugul, ak che bo kutuswek tugul, amu oindo ne kiigochi inendet: kibarei ne kimachei kobar, ak kibagaktoi kosob ne kimakyin kosob; kiieeti ne kimachei koeet, ak kiiming’ini ne kimachei koming’in.

20Ago ye kingoeetgei eng’ muguleldanyi, ak kouuiit tamirmiriennyi koboisie menotet, kechoor eng’ ng’echerennyi ne bo laitornatet, ak kerebe torornatennyi:

21ak kigion kwo eng’ ole mi bik; ak kigiyai naennyi koigei ne bo tiong’ik, ak kimeny koboto sigirokab timin; ak kigibae suswek ko u tuga, ak kiibutyi rewot bortanyi: agoi konai kole bou Kamuktaindet ne Toror Mising’ bounatetab bik, ak kogochin age tugul ne makyin koboi.

22Ak ma iming’inge inye werinnyi, ee Belsasar, eng’ muguleldang’ung’, nganda kiingen tuguchuto tugul;

23ago kiietge obelge ak Kiptaiyat ne bo kipsengwet; ak kogeib terenikab gonnyi kobwa taing’ung’, ak kooee divaik, inye ak kiptainiguk, osotiguk ak chebaigeiniguk; ak koilosu kanamonikab feda, ak che bo tahabu, che bo sugunwet, che bo karik, che bo ketik, ak che bo koik, che mageertoi, ama kastoi, amaingen kiy: ama itoror Kamuktaindet ne tinyei kabuseng’ung’ eng’ eunnyi, ak chechik ortinweguk tugul:

24kogiyok anyun eut ne bunu tainnyi, ak kogisir sirutichu.

25Chu sirutik che kogisir: MENE, MENE, TEKEL, UPHARSIN.

26Ni anyun ko kaweeksetab kiito: MENE; kagoiit Kamuktaindet bounateng’ung’, ak koges.

27TEKEL; kagirogendoenen eng’ kit ne kirogendoisie, ak kagegeer kele ma ko i tia.

28PERES; kagepchei bounateng’ung’, ak kagigochi Medik ak Persik.

29King’at anyun Belsasar ng’atutiet, ak kolaakyi bik Daniel ngoriet ne arus ne birir, ak kolaakyi kaatinnyi sirimdab tahabu, ak komwaita agobo inendet kole, egu bounindet ne bo somok eng’ bounatet.

30Kigibar kemounoto Belsasar laitoriatab Kaldeik.

31Ak kinam Darius Medindet laitornatet, ko bo olo bo kenyisiek tamanwogik lo ak aeng’.

← Chapter 4 Jump to: Chapter 6 →