Daniel 12

Kalenjin Bible (BUKUIT NE TILIL)

← Chapter 11 Jump to:

1Ak kotonon eng’ betunoto Mikael, bounindet ne o ne toreti lagokab biguk: ak biitu betusiek che bo nyalilda, che kitomo kobiitu koboch ngab kobiit bororiet agoi betunoto: ak kisoru biguk eng’ betusiechoto, age tugul ne kigisirji kainennyi bukuit.

2Ak kong’eetyo che chang’ eng’ ichek che kigoruiyo eng’ ng’ung’unyek, bendi alak sobondab koigeny, ak kobendi alak tewernatet ak chotisiet ne bo agoi.

3Ak koluu che ng’omen ko u kakweng’et ne bo barak; ak koluu koigeny ak koigeny ko u kecheik ichek che imutyin che chang’ imanda.

4Ago tuch ng’alechu, ee Daniel, ak ing’och bukuit agoi betusiek che bo let: tun ruaati che chang’, ak kotesak naet.

5Kiageer anyun ane Daniel, ak ogeero, kitononso alak aeng’u, kitonone age ngegutab ainet bitoni, kotonone age ngegutab ainet bitonin.

6Ak kiteebe age ne kiilaachi ngoroikab katanit, ne kimi baragutab beekab ainonoto, kolenji, Tianitu si koek kagesunetab kwong’utichu?

7Agas chito ne kiilaachi ngoroikab katanit, ne kimi baragutab beekab ainonoto, ye kinamjin barak eunnyi ne bo tai, ak eunnyi ne bo katam, ak koyosio eng’ inendet ne sobei koigeny, kole kobunjin kenyit, ak kenyisiek ak kebebertab kenyit; ak ye tun kagoges ichek tonet ne tonatoni kimnatetab bik che tililen, kogesgei anyun tuguchuto tugul.

8Ak kiagas, ago ma aguiye: yeityo amwa ale, Ee kiptaiyandennyu, egu nee kagesunetab tuguchuto?

9Ak kile, Ui inye Daniel: amu kagituch ng’alechuto ak keng’och kot koit betusiek che bo kagesunet.

10Ianyinyegei che chang’, ak koyaegei koleelagitu, ak kotililegei: ago yaei kiptengeginik tengekto; amaiguitos kiptengeginik agot agenge: ago iguitos ichek che ng’omen.

11Egu betusiek elfut agenge ak bogol aeng’ ak tamanwogik sogol, koboch betusiek che kiistoi kagochinet ne kibeelei ne bo kotugul, ak kinde kit ne kiwechei ne ng’emisiei.

12Iberurot inendet ne igenisiei, ne itei betusiek elfut agenge ak bogol somok ak sosom ak mut.

13Ago ui inye oldang’ung’ agoi koit kagesunet: amu imuunyi, ak tun itononi eng’ komostang’ung’, eng’ kagesunetab betusiechoto.

← Chapter 11 Jump to: