Jeremiah 19

Kalenjin Bible (BUKUIT NE TILIL)

← Chapter 18 Jump to: Chapter 20 →

1Kimwa Jehovah ko u ni kole, Ui ak ial keregutab cheptereniot, ak imut alak eng’ boisiekab bik, ak alak eng’ boisiekab tisiik;

2ak obe agoi atebwetab weritab Hinom, ne mitei ye negite ole kibunei eng’ ormarichetab rokyonik, ak imwaite eng’ yoto ng’alek che ta amwaun:

3ile, Ogas okwek ng’olyotab Jehovah, ee laitorinikab Juda, ak bik che omenye Jerusalem; mwaei Jehovah ne bo lugosiek, Kamuktaindetab Israel, ko u ni kole, Ogeero, aipchini yaitiet olito, ne ngo kas chi age tugul, kotildilyo itikyik.

4Amu kigometa ichek, kigoyai yuto koek ole maginaei, ak kigobeelji eng’ yuto, nyamdutik, kanamonik che ter, che kima kongen, icheget ak kwanisiekwak ak laitorinikab Juda; ak kigonyiit olito korotikab che matinyei tengek;

5ak kigoteekyi Baal komoswek che tororen, si kobeel werikwak, koek kagochinoik che kibeelei, kogochin Baal; kit ne kima ang’at, anan amwa, anan konyonja met:

6keero, bwanei anyun betusiek, mwaei Jehovah, che ma keguure olito Topet, anan keguure Atebwetab weritab Hinom, ago kiguure Atebwetab Barisiet.

7Ak ayai koek buch kiruogutikab Juda ak Jerusalem eng’ olito; ak agochini kebare rotwetab chok eng’ taitab bunikwak, ak eng’ eunekab icheget che cheng’ei sobonwekwak: ak agoite muswekwak koek amitwogikab taritik che bo barak, ak che bo tiong’ikab ng’ony.

8Ak ayai nganasani koek kwong’et ak ne kirenyei; kwong’ei age tugul ne siirtoi eng’ yoto ak koreny amu korotwek tugul che bo oloto.

9Ak agochi ichek koam banyekab werikwak ak tibikwak, ak koam age tugul eng’ ichek banyekab choruennyi, eng’ yiemetab kabokyinet ak eng’ bichiindo, ne inyalile bunikwak ichek, ak che cheng’ei sobonwekwak.

10Yeityo itui keregut eng’ taitab bik che obendi tugul,

11ak ilenji ichek, Mwaei Jehovah ne bo lugosiek ko u ni kole: Atue ko u noto bichu ak nganasani, ko u ye tuei chito teretab cheptereniot, ne magimuchi keyai komieit kogeny: ak ketupchi ichek Topet, kot ko ma komi ole ketupchin.

12Ayachini ko u noto olito, koboto bik che menyei olito, mwaei Jehovah, kiyaei koigei Topet:

13ak kogergeit gorikab Jerusalem, ak gorikab laitorinikab Juda, che kiging’wanit, ak komostab Topet, gorik tuguk che kibeele ichek baragunywa nyamdutik kobeeljine tuguk tugul che bo kipsengwet, ak kigorong’ji kagochinoik che kieei, kanamonik che ter.

14Kinyo anyun Jeremia eng’ Topet, ole kiga koyoktochi Jehovah kwo komaoten; ak kitonon eng’ seremutab gotab Jehovah, ak kolenji bik tugul:

15Mwaei Jehovah ne bo lugosiek, Kamuktaindetab Israel, ko u ni kole, Ogeero, aipchini nganasani ak nganasokyik tugul yaitiet tugul ne koamwa agobo nganasanito; amu koiuuiit kaatwekwak, si magas ng’alekyuk.

← Chapter 18 Jump to: Chapter 20 →