Jeremiah 34

Kalenjin Bible (BUKUIT NE TILIL)

← Chapter 33 Jump to: Chapter 35 →

1Kinyonji Jeremia ng’olyot ne kibunu Jehovah, ye kibargei Nebukadnesar laitoriatab Babulon, ak lugennyi tugul, ak bounatosiek tugul che bo ng’ony che kimi bounatennyi, ak bororiosiek tugul kobaregei ak Jerusalem, ak nganasokyik tugul, kolenji:

2Mwaei Jehovah, Kamuktaindetab Israel, ko u ni kole, Ui ing’alalji Sedekia laitoriatab Juda ilenji, Mwaei Jehovah ko u ni kole, Keero, agochini nganasani eutab laitoriatab Babulon, ak kobeel eng’ mat:

3amechilile eunnyi, ago kiluulin iman, ak kindein eunnyi, ak igeer laitoriatab Babulon togoch, ak ong’alal tuwai kimni, ak iwe Babulon.

4Ago kas ng’olyotab Jehovah, ee Sedekia laitoriatab Juda: mwaei Jehovah agobo inye ko u ni kole, Memee eng’ rotwetab chok;

5imee eng’ kalyet; ak beelun ichek ko u noto ko u ye kigebeelji kwanisieguk, laitorinik che bo tai che kiindounenen; ak korirjin, kole, Bwa kiptaiyandani! Amu kaamwa ng’oyot, mwaei Jehovah.

6Yeityo komwachi maotiot Jeremia Sedekia laitoriatab Juda ng’alechato tugul eng’ Jerusalem,

7ye kibaregei lugetab laitoriatab Babulon ak Jerusalem, ak kobargei ak nganasok tugul che bo Juda che kigang’et, kobargei ak Lakis ak Aseka; amu chuto kityo nganasok che ng’ototin che bo Juda che king’et.

8Kinyonji Jeremia ng’olyot ne kibunu Jehovah, ye kingo kagoyai laitoriat Sedekia arorutiet koboto bik tugul che kimi Jerusalem, kole, komwaita katiaget eng’ ichek;

9kole kotiach chi tugul otwogindennyi ne muren ak otwogindennyi ne tie, ngo Yahudiot ne muren anan ne tie, kotiach kwo; si mabiit age tugul eng’ ichek ne otei age, noto ko koot Yahudiot tupchennyi.

10Ak kigas it bounik tugul ak bik tugul che kiga yai arorutionoto, kole itiachi chi age tugul otwogindennyi, ne muren, ak kotiach chi age tugul otwogindennyi ne tie kwo, kole mami chi eng’ ichek ne otei age kogeny; kigas it ng’olyondonoto, ak kogochi ichek koba:

11ago eng’ let, kowalak ichek, ak koweech kogeny otwogik ak otwogik che tibik, che kiga kotiach koba, ak komut ichek kogas it koek otwogik, ak otwogik che tibik.

12Kinyonji anyun ng’olyotab Jehovah Jeremia ne kibunu Jehovah, kolenji,

13Mwaei Jehovah, Kamuktaindetab Israel, ko u ni kole: kigiyomisge ak kwanisiekwok eng’ betut ne kiamutu ichek komong’ eng’ emetab Misri, komong’ eng’ gotab otwoknatet, alenji,

14Ye ibata kenyisiek tisabu, kotiach chi age tugul eng’ okwek tupchennyi ne Yahudiot, ne kigeal, ago kigootin eng’ kenyisiek lo, itiachi inendet kwo: ago kima kasa kwanisiekwok, anan koepcha it.

15Ak kiowalage anyun, ak kiga oyai kit ne mie eng’ tainnyu, omwaitoi katiaget eng’ chi age tugul eng’ chitab kokwennyi; ak kiga oyai arorutiet eng’ tainnyu eng’ got ne kimwaitoe kainennyu:

16ago kiowalage ong’wanit kainennyu, ak koweech chi age tugul otwogindennyi, ak otwogindennyi ne tie, che koga otiach koba eng’ boiboiyenywa, ak koomutu ichek kogas it, koek otwogik ak otwogik che tibik, eng’ okwek.

17Mwaei anyun Jehovah ko u ni kole: Ma oepcha it, si omwaite katiaget, eng’ chi age tugul eng’ tupchennyi, ak eng’ chi age tugul eng’ chitab kokwennyi: ogeero, amwawok katiaget, mwaei Jehovah, ne bo rotwetab chok, ne bo koroito, ak ne bo rubet; ak agoitook kewirjok komosi ak komosi eng’ bounatosiek tugul che bo ng’ony.

18Ak agoitoi bik che kigobistoe kayomisennyu, che ma yai ng’alekab arorutiet ne kiga koyai eng’ tainnyu, ye kipcheune aeng’ moita ak kobun kwenetab kebeberwekyik;

19bounikab Juda, ak bounikab Jerusalem, kiptainik, ak tisiik, ak bik tugul che bo emet, che kibun kwenetab kebeberwechoto bo moita;

20agoitoi ichek koba eutab bunikwak, ak koba eutab ichek che cheng’ei sobonwekwak: ak koek muswekwak amitwogikab taritikab barak, ak che bo tiong’ikab ng’ony.

21Ak agoitoi Sedekia laitoriatab Juda ak bounikyik koba eutab bunikwak, ak koba eutab ichek che cheng’ei sobonwekwak, ak eutab lugetab laitoriatab Babulon, che kiba eng’ oli omi.

22Ogeero, ang’ate, mwaei Jehovah, ak aweekyi ichek nganasani; ak kobargei ak nganasani, ak koluul, ak kobeel: ak ayai nganasokab Juda koek surkwen, ole ma komenyei chi.

← Chapter 33 Jump to: Chapter 35 →