Luke 1

Kalenjin Bible (BUKUIT NE TILIL)

Jump to: Chapter 2 →

1Amu kigonde eunekwak che chang’ kotet ng’alek agobo tuguchoto kigosulda eng’ kwenunnyo,

2ko u ye kigogonech, che ki baorinik che kigeer koboch taunet, ak che ki kiboitinik che bo ng’olyot,

3kiageer agane ale, mie atetun eng’ siret, ko kaanai agane ole kibiitunda tuguk tugul koboch taunet, ee, inye, ne i toogunot Teopilo;

4si kobiit inai eng’ iman, ng’alechato kiginetin.

5Kimi eng’ betusiek che bo Herod, laitoriatab Judea, tisiindet age ne kigiguure Sakaria, ne bo ripsetab Abija: ak kitinyei osotiot ne kisalu gab Aron, ak kigiguure kainennyi Elisabet.

6Ak ki bo iman ichek tuwai eng’ taitab Jehovah, ak kibendate ng’atutik tugul ak karureiywek che bo Kiptaiyat, ama tinyei lelut.

7Ak kima kotinyei lakwa, amu ki son Elisabet, ak kiga koosegitu tuwai.

8Ak ye kita koyaei boisietab tiseinatet eng’ taitab Jehovah, ko u tetetab ripsennyi,

9ko u biteetab boisietab tiseinatet, ko kigilewen inendet kwo hekalutab Kiptaiyat kobeel nyamdutik.

10Ak kimi sang’ tuiyet komugul ne bo bik, kosaei eng’ sait ne kibeele nyamdutik.

11Ak kimong’ji malakaiyatab Kiptaiyat kotonone komostab tai ne bo kapkorosut ne kibeele nyamdutik.

12Ak kingogeer Sakaria inendet koarogen ak koiyweis.

13Ago kilenji malaikaiyat inendet, Ameiyweisie, Sakaria: amu kogegasun someng’ung’, ak ta kosigun osotiondeng’ung’ Elisabet werit, ak iguure kainennyi Johana.

14Ak inyoru boiboiyet ak kagasetab ge; ak boiboitu bik che chang’ eng’ sigennyi.

15Amu tun egu ne o eng’ taitab Kiptaiyat, ama eei divaik anan maiyek; ago kinyiiti Tamirmiriet ne Tilil, koboch komi moetab kamet.

16Ak koweekyi lagokab Israel che chang’ Kiptaiyat Jehovah nenywa.

17Ak kowendot eng’ taitab togennyi eng’ tamirmiriet ak kimnatetab Elija, si koweech mugulelwek che bo kwanisiek kotokyigei lagok, ak kowelel ngelelik si kobendat eng’ ng’omnatetab che bo iman; si kochopchi Kiptaiyat bik che chobotin.

18Ak kilenji Sakaria malaikaiyat, Anae nee ng’olyondonito? Amu koaositu, ak kigotar kenyisiek che chang’ osotiondennyu.

19Ak kiwolji malaikaiyat kolenji, A Gabriel, ne atononi eng’ taitab Jehovah; kagiyokwa ang’alalun, ak aibun logoiywechu miachen.

20Ak keero, namoksein kut, amemuchi ing’alal, agoi tun betut ne biitu ng’alechu, amu ma iyan ng’alekyuk, che tun isuldoi eng’ betusiekwak.

21Ak kiigen bik Sakaria, kot kokwong’io, amu kiigagei eng’ hekalut.

22Ak ye kingomong’ sang’, koma komuch kong’alalji ichek, ak kinai ichek kole, kagogeer kaborunet ne bo kwong’et eng’ hekalut: ak king’alaljine bichoto eut, ak kiteb ko namat kut.

23Ak ye kingogesgei betusiekab otisiennyi, kwo ga.

24Ak ye kingogesgei betusiechoto komanach osotiondennyi Elisabet; ak kiunygei arawek mut, ak komwa kole,

25Koyaiywa ko u nito Kiptaiyat eng’ betusiek che kiibwata, si koistoena reng’sennyu eng’ bik.

26Kiiyokto Jehovah malaikaiyat Gabriel eng’ arawetab lo kwo nganaset ne bo Galili, ne kiguure Nasaret,

27kwo oldab chepto bergeiyat ne kiga kechamji murenet age ne kiguure Josep, ne bo gotab Daudi; ak kigiguure bergeiyandanato Maria.

28Ak kinyo ole mi cheboto, ak kolenji, Chamge, inye ne i chamat mising’, mi Kiptaiyat koboten.

29Ago kiimgei mising’ inendet eng’ mwaonato, ak kiibwat kole, egu nee kagatoni.

30Ak kilenji malaikaiyat inendet, Ameiywei, Maria: amu kainyoru chamet eng’ Jehovah.

31Ak keero, imanachi, ak isich werit, ak tun iguure kainennyi JESU.

32Egu ne o inendet, ak tun kiguure Weritab Inendet ne Toror Mising’: ak kigochin Kiptaiyat Jehovah ng’echeretab laitornatet ne bo kwandanyi Daudi:

33ak tun laitorane gotab Jakobo koigeny; ama tinyei ole igesunegei bounatennyi.

34Ak kilenji Maria malaikaiyat, Egundoi ano ng’olyondoni, amu mangen muren?

35Ak kiwolji malaikaiyat kolenji, Nyonjinin Tamirmiriet ne Tilil ak kouurin kamuktaetab Inendet ne Toror Mising’: noto anyun kiguure ne tilil, Weritab Jehovah, inendet ne tun kisichei.

36Ak keero, managat agine Elisabet tupcheng’ung’, tun sichei werit eng’ osindanyi: ne bo lo arawani eng’ inendet ne kigiguure son.

37Amu mami ng’olyo ne bunu Jehovah ne ma kim.

38Ak kile Maria, Keero, a chepto ne otwogindetab Kiptaiyat; ingeyaiywa ko u ng’olyondeng’ung’. Ak kiwa malaikaiyat kobagakta inendet.

39King’eet anyun Maria eng’ betusiechoto kwo kochakta emetab tulonok, agoi nganasetab Juda;

40ak kiwa agoi gotab Sakaria ak kogat Elisabet.

41Ak ye kingogas Elisabet kagatetab Maria, koureren lakwet eng’ moennyi; kinyi anyun Tamirmiriet ne Tilil Elisabet;

42ak komwa eng’ kutit ne o, kole, Iberurot inye eng’ kobogorisiek, ak iberurot inendet ne isiche.

43Ak katepto ano kot anyoru nito, kot konyonja kametab Kiptaiyandennyu?

44Amu, keero, ye kangoit itikyuk kutitab kagateng’ung’, koureren lakwet eng’ moennyu eng’ boiboiyet.

45Ak baibai kobogoriondonoto iyani; amu tun isuldoi tuguk che kigemwachi inendet che bunu Kiptaiyat.

46Ak kile Maria, Itorori sobondanyu Kiptaiyat,

47Ak kagobaibait tamirmiriennyu eng’ Jehovah Yetindennyu.

48Amu kagogeer nyerotietab otwogindennyi ne chepto: Amu, ogeero, koboch ra koguurena ibinwek tugul ne baibai.

49Amu kagoyaiywa inendet ne bo kamuktaet tuguk che eechen; Ak tilil kainennyi.

50Tebyei rirenennyi eng’ ibinwek agoi ibinwek Eng’ icheget che konyiti inendet.

51Kigobor kimnatet eng’ eunnyi; Ak kigoiyesta che menotik eng’ kabwatutikab mugulelwekwak.

52Kagochoor bounik eng’ ng’echerokwak, Ak kagoeet che nyerotin.

53Kagobae che amei rubet tuguk che miachen: Ak kagoon magorek koba buch.

54Kagotoret otwogindennyi Israel, Si kobwat rirenetab ge,

55Ko u ye king’alalji kwanisiekyok, Eng’ Abraham ak iyotennyi agoi koigeny.

56Ak kitebi Maria koboto Elisabet ne negit arawek somok; yeityo koweek kwo ga.

57Kiit anyun betut ne sigisie Elisabet; kosich werit.

58Ak kogas bikab kokwennyi ak bikab orennyi kole kagotesyi Kiptaiyat rirenennyi kwonyoto; ak kiboiboitu koboto inendet.

59Ak kingoit betut ne bo sisiit, kobwa ichek koyatita lakwet; kimachei koguure Sakaria, kemwaitae kainetab kwandanyi.

60Ak kiwol kamet kole, Achicha; kiguure Johana.

61Ak kilenji ichek inendet, Mami chi eng’ oreng’wong’ ne keguure kainanato.

62King’alaljine ichek eut kwanitab lakwet, koteebe kainet ne machei ketochi.

63Kosom kit ne kisirei, ak kisir, kole, Johana kainennyi. Ak kikwong’io tugul.

64Koyatak anyun kutinnyi ngunoto, ak kotiagak ng’elyeptanyi, ak kitwek kolos Jehovah.

65Ak kinyonji kaiyweisiet tugul che kimenyei komoswekwak; ak kigimwaita ng’alechuto tugul koyom emetab tulonok ne bo Judea.

66Ak kigonore mugulelwekwak ng’alechato ichek tugul che kigas, kole, Tun egu nee anyun lakwani? Amu kimi koboto inendet eutab Kiptaiyat.

67Kinyi anyun Tamirmiriet ne Tilil kwandanyi Sakaria, ak kimaoten, kole,

68Iberurot Kiptaiyat, Jehovah ne bo Israel; Amu kagorutochi bikyik ak koyachi katiaget ichek,

69Kagong’eetwech kuinetab yetunet Eng’ gotab Daudi kiboitiondennyi

70(Ko u ye kimwa eng’ kutuswekab maotikyik che tililen che kimi koboch ko kagitoi ng’ony),

71Si kosoruech eng’ bunikyok, ak eng’ eunekab tugul che wechech;

72Si korire kwanisiekyok, Ak kobwat kayomisennyi ne tilil;

73Kayosiet ne kiiyosiechi kwandanyo Abraham,

74Si kobiit kogonech, ko kagosoruech eng’ eunekab bunikyok, Keboisiechi inendet ama eng’ kaiyweisiet,

75Eng’ tililindo ak eng’ imanda eng’ tainnyi eng’ betusiekyok tugul.

76Ee lakwani, kiguurenen maotiotab Inendet ne Toror Mising’: Amu iwendi eng’ taitab Kiptaiyet indoi, si kobiit ichob ortinwekyik;

77Si igochi bikyik naet ne bo yetunet Eng’ nyoetab kaat ne bo tengekwogikwak,

78Amu muguleldo ne riregei ne bo Jehovah nenyo, Si kochorjech lapkeiyet ne bunu barak,

79Si koluuchi icheget che tebyei eng’ mesundeito ak che mi uruetab meet; Si kondochi kelyekyok kot koit oretab kalyet.

80Ak kiner lakwanato, ak kotesak kimnatet eng’ tamirmiriet, ak kimeng’oti surkwen agoi betut ne kiiborjigei Israel.

Jump to: Chapter 2 →