Luke 14

Kalenjin Bible (BUKUIT NE TILIL)

← Chapter 13 Jump to: Chapter 15 →

1Ak ye kingwo gotab age eng’ bounik che bo Parisaik eng’ betutab sabato, si koamis, koribot ichek inendet.

2Ak ogeero, kimi chi tainnyi ne ki lolosenot borto.

3Ak kiwolji Jesu ng’omotikab ng’atutik ak Parisaik, kolenji, Tos chamdaat eng’ ng’atutik kisoob chi eng’ betutab sabato, anan achicha?

4Ago kisisyo. Ak kinam inendet, ak kosoob, ak kounda kwo.

5Ak kolenji icheget, Ng’o eng’ okwek ne tinyei sigiriet anan eito ne kagobutyo keringet, ama sutu eng’ sainato eng’ betutab sabato?

6Ak kimata komuch anyun kowolji inendet kogeny agobo tuguchuto.

7Ak kimwachi kalewenet che kiga kiguur, ye kingogeer ole lewendoi ng’echerok che bo tai; kolenji ichek,

8Ye kaguurjin chi age tugul igortab katunisiet, ko metebe ng’echeret ne bo tai; amu abere kagiguur age ne konyitot kosiirin,

9si ye nyo inendet ne kaguurok okwek tuwai, komwaun kole, Istochige chichi; itau anyun iwe ole bo let eng’ kalilanet.

10Ago ye kiguurin, itebe olo bo let; ak ye nyo anyun ne kaguurin, komuchi kolenjin, Choruani, ui olin bo tai: inyoru anyun teegisto eng’ che oamisiei tugul.

11Amu age tugul ne itororigei kiming’ini; ak inendet ne iming’inegei kitorori.

12Kimwachi anyun chichoto kiga kuurso agine, kolenji, Ye ichob amitwogik che bo bet anan che bo koskoleny, ko mat iguur choronoguk, anan che otupche, anan tilionutiguk, anan magorek che bo kokwet; abere tos kuurin agichek, ak koweegun cheguk.

13Ago ye ichob igorta, iguur kibananok, ak che bo mugungon, ak che ing’waldos, ak che koriotin:

14si kiberurin; amu matinyei icheget che weegun: amu tun kiweegun eng’ ng’eetyetab che bo iman.

15Ak kingogas tuguchuto chito age ne kimi koboto inendet eng’ amisiet, kolenji, Baibai inendet ne tun amisiei eng’ bounatetab Jehovah.

16Ago kilenji, Kichob chito age amitwogik che chang’ che bo koskoleny; ak koguur bik che chang’:

17ak kiiyokto otwogindennyi eng’ saitab amitwogik, koguur che kiga kemwachi, kolenji, Obwa; amu kagochobogis tuguk tugul.

18Ak kotoi tugul eng’ maget agenge komwa kit ne karany. Kilenji chito ne bo tai, Kaal mbaret, kanyolja awo ageer: asomin ale nyoiywa kaat.

19Kole age, Kaal eik taman che bo chogit, kawe atiem ichek: asomin ale nyoiywa kaat.

20Kole age, Kaatunisie, noto anyun mamuchi anyo.

21Konyo anyun otwogindonoto, ak kotetyi kiptaiyandennyi ng’alechuto tugul. Konerech anyun chitab kobo got, ak kolenji otwogindennyi, Ui chakte ortinwek che eechen ak che mengechen che bo nganaset, ak imutu yu kibananok, ak che bo mugungon ak che koriotin ak che ing’waldos.

22Ak kile otwogindonoto, Kiptaiyandani, kagoyaak kit ne kageng’at, ago ta komi boroindo.

23Kolenji anyun kiptaiyat otwogindennyi, Ui ortinwek che eechen ak kiwotosiekab mbarenik, ak ichiich kobwa go, si konyi gonnyu.

24Amu amwawok ale, mami agot agenge eng’ che kiga kemwachi ne chamjami amitwogikyuk.

25Ak kiba ak inendet tuiyosiek che chang’: ak kiwelelgei inendet ak kolenji,

26Ngo nyonja chi, ama wech kwanda, ak kamet, ak osotiondennyi, ak lagokyik, ak werik che tupcho, ak chepkametinik, ee ak sobondanyi agine, ko maimuchi koek alamalyennyu.

27Ak chi age tugul ne maibei kimurtoiyondennyi, ak kosubwa, ko maimuchi koek alamalyennyu.

28Amu ng’o eng’ okwek, ne machei koteech got ne koi, ama toi koteb ng’ony korok ak koiit tuguk, ngo tinyei che yamei kogesune got?

29Si ma ye kagotonon lumeiywot, ak koma komuch koges, kotoi kochurachur inendet tugul che keerei,

30kole, Kitoi chichi koteekso ago ma imuch koges.

31Anan ng’o laitoriat ne wendi kobaregei ak laitoriat age, ama teb ng’ony korok ak korar ole teptoi, ngo tos imuchi inendet ak bik elfusiek taman kotuiyo ak ne setyin inendet ak bik elfusiek tiptem?

32Anan, ye ta komi age ole loo, koyokto ng’olyot, si koteeb agobo kalyet.

33Noto anyun, chi age tugul eng’ okwek ne mabagaktoi tugukyik tugul, ko maimuchi koek alamalyennyu.

34Miachen munyuk: ago ngo kagogesgei anyinyindanyi, ko ta kianyinye nee?

35Ma kotilei kiy eng’ emet anan eng’ kapng’atat: kilaktoi. Inendet ne tinyei itik che kastoe, kogas.

← Chapter 13 Jump to: Chapter 15 →