Mark 16

Kalenjin Bible (BUKUIT NE TILIL)

← Chapter 15 Jump to:

1Ak kingo kagosiirto sabato koal Maria Magdalene, ak Maria kametab Jakobo, ak Salome, nyamdutik, si kobwa koiil inendet.

2Ak eng’ karon inne, eng’ betutab tai ne bo wigit, koit kererit ko kachor asista.

3Ak kong’alaljigei ichegei kole, Mildaiywech ng’o koita eng’ kurgetab kererit?

4Ak kingoyot met, kogeer ko kagemilda koita: amu ki o mising’.

5Ak kingochut kererit, kogeer muren kotebyei eng’ komostab tai, ne ilaachi ngoriet ne leel; ak kikwong’io.

6Ak kilenji ichek, Amokwong’ie: ocheng’e Jesu, Nasaretindet, ne kiga kigartat: kagong’eet; ma komi yu: ogeer ole kiga kinde inendet!

7Ago, oba, omwachi alamalyennyi ak Petero, olenji, Kagondoenak kwo Galili: ogeere inendet eng’ oloto, ko u ye kiga komwawok.

8Ak kimanda sang’ eng’ kererit, ak komwei; amu kiga botanso ak kokwong’io: ak ma mwachi chi kiy; amu kiiyweis. [

9Ak kingong’eet Jesu anyun karon mising’ eng’ betutab tai ne bo wigit, kochunji korok Maria Magdalene, inendet ne kiga kocherune Jesu oik tisab.

10Kiwa komwachi icheget che kimi koboto inendet, ye kita koarongendos ak korirtos.

11Ak kingogas ichek kole sobei, ak kole, kagogeer inendet chebiosonato, ko ma iyan.

12Ak kingobata tuguchu, kong’ang’jigei eng’ itondo age aeng’ eng’ ichek kobendi eng’ oret koret age.

13Kiba anyun ak komwachi chun alak: ak kima iyan choto agichek.

14Ak kingobata noto, kong’ang’jigei icheget taman ak aeng’ kotebyei eng’ amisiet; ak koger kong’ amu bistoenywa ak uuindab mugulelwekwak, amu kima iyan icheget che kigeer inendet ko kagong’eet.

15Ak kilenji, Oba ng’ony komugul, oamjinote logoiywek che miach bik tugul.

16Inendet ne iyani ak kibatisan kesoru; ago inendet ne maiyani ko tun kiruokyin.

17Ak isubi kaborunoichu ichek che iyani: onei oik eng’ kainennyu; ak kong’alali ng’alalet ne leel;

18namei erenok, ak ngo ee tuguk che barei bich, ko manyoru ng’wanindo matiny; igonoori eunekwak bik che miandos ak kosopcho.

19Ye kingo kagong’alal ak icheget Kiptaiyat Jesu, kimut anyun inendet kwo kipsengwet, ak kotebe eutab tai ne bo Jehovah.

20Ak kiba anyun, koamdaat eng’ oldo tugul, kobois Kiptaiyat koboto ichek, ak kogimit ng’olyot eng’ kaborunoik che kiisuboti. Amen.]

← Chapter 15 Jump to: