Mark 8

Kalenjin Bible (BUKUIT NE TILIL)

← Chapter 7 Jump to: Chapter 9 →

1Eng’ betusiechoto, ye kimi kogeny tuiyet ne o, ak kima kotinyei kiy ne amei, koguur Jesu alamalyennyi kobwa ole mi inendet, ak kolenji,

2Arire tuiyet, amu kagotebi kobota nguno betusiek somok, ama tinyei kiy ne amei:

3ak ngot aunde koba oldanywa ama am kiy, kotanuitos eng’ oret; ak kibunu alak ole loo.

4Ak kiwolji alamalyennyi kole, Imuchi konyorune ano chi makatinik eng’ emoni surkwen kobae bichu kot kobiyong’so?

5Ak kiteebe ichek kolenji, Otinye makatinik ata? Ak kole, Tisab.

6Ak king’at tuiyet kobuur: ak kinam makatinichoto tisab, ak kingo kagomwa kongoi, kobutul, ak kogochi alamalyennyi, si konde tainywa, ak kogochinot tuiyet.

7Ak kitinyei njirenik che mengechen che ng’ering’: ak kingo kagoberur, kong’at konde choto agichek tainywa.

8Kiamis anyun, kobiyong’so: ak kiiyum katuganik, ak kiyam mesendoik tisab.

9Ak icheget ko ki olo bo elfusiek ang’wan: ak kiunda koba.

10Ak yeityo anyun kolany moingetab beek koboto alamalyennyi, koba komoswekab Dalmanuta.

11Ak kibwa Parisaik, ak kotoi koteepse inendet, komage kaborunet ne bunu kipsengwet, kotiemei inendet,

12ak kiibus ne nyigis eng’ tamirmiriennyi, ak kole, Amu nee si kocheng’ei ibini kaborunet? Amwawok iman ale, Magoi kigochi ibini kaborunet.

13Ak kibagakta ichek, ak kolany moingetab beek kogeny kolanda bitet age.

14Ak kiutie ichek koib makatinik: kima kotinye kiy eng’ moinget kobate makatiat agenge kityo.

15Ak kiitigon ichek, kolenji, Oripge, ak oribege mermerekab Parisaik ak mermerek che bo Herod.

16Ak king’alaljingei ichegei, kolen, Magitinye makatinik.

17Ak kingonai Jesu, kolenji, Kalya si oteebege, amu motinye makatinik? Tom onai, anan tom oguiye? Ta ko uuen mugulelwekwok?

18Otinye konyek, amogeere kiy? Ak otinye itik, amogastoi? Amobwati?

19Yu kingabutulji makatinik mut bik elfusiek mut, ko kitinye kerebonik ata katuganik che kigoyum? Kolenji inendet, Taman ak aeng’.

20Ak tisab eng’ bik elfusiek ang’wan, ko kinyi mesendoik ata katuganik che kigoyum? Ak kolenji, Tisab.

21Ak kolenji ichek, Tom oguiye?

22Ak kiit anyun Betsaida. Ak kimutyi inendet chi ne korat, ak kosom kotwa inendet.

23Ak kinam eutab kipkoratiandanato, ak komut komandae nganaset; ak ye kingo kagong’utyi konyekyik, ak kogonoor eunekyik inendet, koteebe kole, Igeere kiy?

24Ak kiinyal barak, ak kole, Ageere bik; amu ageere ichek ko u ketik, kobendi.

25Yeityo kotwa eunekyik kogeny konyekyik; ak kiichiil konyek, ak kisob, ak kogeer tuguk tugul komie.

26Ak kiunda kwo ga, ak kolenji, Amewe nganaset agot kitigin.

27Ak kiba anyun Jesu ak alamalyennyi agoi nganasok che bo Kaisaria Pilipi: ak kiteebe alamalyennyi eng’ oret, kolenji, Mwaei bik kole a ng’o?

28Ak kimwachi inendet kolenji, Len, i Johana Kabatisanindet: kolen alak, i Elija; ak len alak, i agenge ne bo maotik.

29Ak kiteebe icheget kole, Ago olen okwek a ng’o? Kowolji Petero kolenji, I Kristo.

30Ak king’at ichek kole, amat komwachi chi agobo inendet.

31Ak kitoi konet ichek, kole, kanyol konyalil Weritab chi eng’ tuguk che chang’, ak koesio boisiek, ak tisiik che eechen, ak sirik ak kebar, ak ye igesgei betusiek somogu, kong’eet kogeny.

32Ak kimwa ng’olyondonoto kotook. Ak kinam Petero inendet ak kotoi koger kong’.

33Ago kiwelelgei, ak kogeer alamalyennyi, ak koger kong’ Petero, ak kolenji, Ui let eng’ ane, Setani: amu mebwati tugukab Jehovah, ago tugukab bik.

34Kiguur anyun tuiyet koboto alamalyennyi kobwa ole mi inendet, ak kolenji ichek, Ngo machei chi age tugul kosubwa, koesiogei, ak kosut kimurtoiyondennyi, ak kosubwa.

35Amu age tugul ne machei kosor sobondanyi kobeeti; ak age tugul ne ibeeti sobondanyi agobo ane ak logoiywek che miach kosoru.

36Amu nyoru borot nee chi, ngonyor ng’ony komugul, ak kobeet sobondanyi?

37Amu igoitoi nee chi kowale sobondanyi?

38Amu age tugul ne ililani agobo ane koboto ng’alekyuk eng’ ibinita bo sokset ak tengek, ko tun ililanjin agine Weritab chi inendet, ye tun nyonei eng’ lilindab Kwandanyi koboto malaikaisiek che tililen.

← Chapter 7 Jump to: Chapter 9 →