Mark 3

Kalenjin Bible (BUKUIT NE TILIL)

← Chapter 2 Jump to: Chapter 4 →

1Ak kiwa sunagogit kogeny; ak kimi chito ne resot eut.

2Ak kirib ichek inendet, kole kogeer, ngo tos isoob chichoto eng’ betutab sabato; si kobiit komwaita.

3Ak kilenji chito ne resot eut, Tonon eng’ kwen.

4Ak kilenji ichek, Tos, chamdoi ng’atutik keyai ne mie eng’ betutab sabato, anan keyai ne ya? Kisoob chi, anan kebar? Ago kisisyo.

5Ak ye kiga kogeerot komoswek tugul eng’ neregek, koarogen amu uuindab mugulelwekwak, kolenji chichoto, Chuul eung’ung’. Kichuul anyun: ak kisob eunnyi.

6Ak kimanda sang’ Parisaik, ak ngunoto anyun kochob ng’alek ak Herodik agobo inendet, si konai ole bartoi.

7Kiitabangei Jesu ak alamalyennyi ak koba araraita; ak kiisub inendet tuiyet ne o ne kibunu Galili: ak ne kibunu Judea,

8ak Jerusalem, ak Idumea, ak bitetab Jordan, ak komoswekab Turo ak Sidon, kibwanji inendet tuiyet ne o ye kingogas agobo tuguk che eechen che kiyai.

9Ak kimwachi alamalyennyi kochob moinget ne ming’in ne bo beek, amu chang’indab bik, si machiil inendet:

10amu kiga kosoob che chang’; kot koriich inendet tugul che kitinyei korotwek che yaachen, si kobiit kotwa inendet.

11Ak eng’ ui tugul ye kageer inendet tamirmirik che muruonen, kobutyi ng’ony eng’ tainnyi, ak koteiyo kole, Inye ko i Weritab Jehovah.

12Ak king’at ichek mising’ si mang’anda inendet.

13Ak kitogosta tulwet anyun, ak kiguurjigei che kimach: ak kiba ole mi inendet.

14Ak kilewen taman ak aeng’, si kotebi ak inendet, si kobiit koyoktoi ichek koba amdaet,

15ak konyor kimnatet ne one oik:

16ak Simon ne kiigochi kainet age koguure Petero;

17ak Jakobo weritab Sebedi, ak Johana ng’etab kametab Jakobo; kiigochi ichek kainet koguure Boanerges, ye kiweech kele, Weritab tulet:

18ak Andrea, Pilipu, Bartolomayo, Matayo, Tomas, Jakobo ne bo gab Alpayo, ak Tadayo, ak Simon Kananindet,

19ak Judas Iskariot, ne king’wektoi inendet.

20Ak kiiyumgei tuiyet kogeny kot ko mata komuch agot koamis.

21Ak ye kingogas choronokyik, koba konam inendet: amu kimwa kole, Kagobet met.

22Ak kimwa sirik che kichorunegei Jerusalem, kole, Tinyei inendet Beelsebul, ak, Onei oik eng’ kimnatetab ne o ne bo oik.

23Ak kiguur ichek kobwa ye mi, ak kolenji eng’ kalewenaik, Imuktoi ano Setani koon Setani?

24Ak ngo pcheak bororiet inegei, ko maimuchi bororionoto kotonon.

25Ak ngo pcheak got inegei, ko maimuchi goyoto kotonon.

26Ak ngo ng’eet Setani koboriegei inegei ak ngo pcheak inegei, ko maimuchi kotonon, ago tinyei ole igesyingei.

27Ago maimuchi chi kwo got orit ne bo chito ne kim, ak korebe tugukyik, ngot ko ma rat korok chichoto kim; si kouur gonnyi anyun.

28Amwawok iman ale, Kinyochin kaat werikab bik tengekwogikwak tugul, ak ng’alek alak tugul che yaachen che mwaei:

29Ago age tugul ne chubei Tamirmiriet ne Tilil ko magoi kinyochi kaat koigeny, ago tinyei ng’ogisto ne bo koigeny:

30amu kimwa kole, Tinyei inendet tamirmiriet ne muruon.

31Kibwa anyun kamet ak che tupcho; ak kotononso eng’ sang’, ak kigiyokto keguur inendet.

32Ak kitebyei tuiyet ko kayiem inendet; ak kilenji, Keero, mi sang’ komet ak che otupche kocheng’in.

33Ak kiwolji ichek, kolenji, Ng’o kamennyu ak che kitupche?

34Ak kigeerot che kayiem inendet, ak kolenji, Ogeero, kamennyu ak che kitupche!

35Amu chi age tugul ne yaei magetab Jehovah, noto werit ne kitupche, ak chepto ne kitupche, ak kamennyu.

← Chapter 2 Jump to: Chapter 4 →