Romans 12

Kalenjin Bible (BUKUIT NE TILIL)

← Chapter 11 Jump to: Chapter 13 →

1Noto anyun che kitupche, asomok mising’, eng’ rirenosiekab Jehovah ale, ogoite borwekwok koek tiseiywot ne sobei, ne tilil, ne taachaksei eng’ Jehovah, noto ko boisieng’wong’ ne nyolu.

2Amoyaniege ateptab betusiechu: ago ingewalak eng’ kaleelitetab kabwatutikwok, si kobiit onai komie maget ne mie, ne tachaksei ak kogesunotgei, ne bo Jehovah.

3Amu amwachini chi age tugul ne mi kwenung’wong’, eng’ mieindo ne kigegona, amat kobwatgei chi kole toror kosiir ne te ne nyolu kobwat; ago kobwat ne yamei, ko u ye kiigochi Jehovah chi age tugul karagutietab kayanet.

4Amu agot ko u ye kitinye kebeberwek che chang’ eng’ borto agenge, ama tinyei kebeberwek tugul boisiet agenge:

5ko u noto eng’ achek che ki chang’, ki borto agenge eng’ Kristo, ak ki kebeberta age tugul ne bo age.

6Ak ketinye konunoik che terotin ko u mieindo ne kigegonech, ngo maoinatet, ko ongeamde ko u ole te kayanennyo;

7anan boisiet, ongigochige boisiennyo; anan inendet ne inetisiei, kochuljigei konetisiennyi;

8anan inendet ne iteitoi, kochuljige kateitaennyi: inendet ne igoitoi, kogoito eng’ aiyebindo; inendet ne bou, koboi kochuljigei; inendet ne riregei, koriregei eng’ boiboiyet.

9Ingoek chamnyet ne matinyei ng’alset. Wech mising’ noto ya; onamge ak ne mie.

10Ochamnye eng’ chamnyet ne u ne bo tupchosiek; ingoiit chito age chito age kosiir inendet eng’ teegisto;

11eng’ kagiiletab ge amochoriren; ogiilge mising’ eng’ tamirmiriet, oote Kiptaiyat;

12oboiboitu eng’ kamang’unet; omuitoi eng’ nyalilda; ogiiljige saet kotugul;

13otoret che tililen eng’ tuguk che bononi; oaiyebitu eng’ toek.

14Oberur che usok; oberur, amochub.

15Oboiboitu koboto che boiboi; oririe koboto che rirtos.

16Oegu che tinyei kabwatet agenge okwege eng’ okwege. Among’asyige tuguk che tororen, ago onamge ak che iming’inegei. Moiityige ole o ng’omen eng’ loseng’wong’ bo ge.

17Amoyaakyi chi yaitio eng’ yaitio. Ibwat tuguk che bo teegisto eng’ taitab bik tugul.

18Ngomugaksei eng’ okwek, otebi ak bik tugul eng’ kalyet.

19Chamanichu, amoyaakte mugetut, ago ogochi boroindo neregek: amu sirat kole, Nenyu yaaktaetab mugetut; ayaaktoi, mwaei Kiptaiyat.

20Ago ngo am rubet bunyondeng’ung’, ibai; ngo am melel, inage koee: amu ye iyae ko u noto ko kerurukyi ng’etetiot metinnyi.

21Ameng’ koterterin yaitiet, ago iterter yaitiet eng’ ne mie.

← Chapter 11 Jump to: Chapter 13 →