Romans 8

Kalenjin Bible (BUKUIT NE TILIL)

← Chapter 7 Jump to: Chapter 9 →

1Noto anyun ma komi kiruoget eng’ ichek che mitei eng’ Kristo Jesu.

2Amu kagotiacha ng’atutietab Tamirmirietab sobon eng’ Kristo Jesu among’une ng’atutietab tengek ak meet.

3Amu kit ne kima imuch Ng’atutiet koyai, amu nyaluletab borto, koyok Jehovah Werinnyi eng’ kergeindab bortab tengek si koek kagochinet ne bo tengekto, kogikyi tengekto eng’ borto:

4si kobiit kosulda kayomisetab Ng’atutiet eng’ achek, che magisubi borto, ago Tamirmiriet.

5Amu ichek che isubi borto kogereri met agobo tugukab borto; ago ichek che isubi Tamirmiriet kogereri met agobo tugukab Tamirmiriet.

6Amu kererwekab met che bo borto ko meet; ago kererwekab met che bo Tamirmiriet ko sobondo ak kalyet:

7amu kererwekab met che bo borto ko bunyondit eng’ Jehovah; amu magase it Ng’atutietab Jehovah, amaimuchi:

8ak icheget che mi borto kotemene kobaibai Jehovah.

9Ago ma omi eng’ borto ago eng’ Tamirmiriet, ngo menyok Tamirmirietab Jehovah. Ago ngo matinyei chi Tamirmirietab Kristo ko ma nenyi.

10Ak ngo mi Kristo eng’ okwek, ko kigome borto amu tengekto; ago Tamirmiriet ko sobondo amu imanda.

11Ago ngo menyok Tamirmirietab inendet ne kiing’eet Jesu komong’une che kibek, kosoobi borwekwok che begu inendet ne kiing’eet Kristo Jesu komong’une che kibek, eng’ Tamirmiriennyi ne menyei eng’ okwek.

12Noto anyun, che kitupche, ki che kiyaachei, ma eng’ borto, si kisubi borto:

13amu ngosubi borto, obegu matiny; ago ngobar eng’ Tamirmiriet boisionikab borto, osoptosi.

14Amu tugul che indochin Tamirmirietab Jehovah, ko werikab Jehovah choto.

15Amu kima otaach kogeny tamirmirietab otwoknot ne konok oiyweisie; ago kiotaach tamirmiriet ne kigiyaenak oegu lagok, eng’ noto anyun kerire kele, Aba, Kwanda.

16Baoriani Tamirmiriet inendet ak tamirmirikyok kole ki lagokab Jehovah:

17ak ngo ki lagok, ko ki che bunjinech tuguk; che bunjinech tugukab Jehovah, ak che bunjinech tuguk koboto Kristo; ngot kenyalildosi koboto inendet, si kitororech koboto inendet.

18Amu aiiti ale nyalilwogik che bo betusiechu ko ma nyolu kiroge torornatet ne tun king’ang’wech.

19Amu igeni mising’ ak koganyei yaet komugul ng’ang’et ne bo werikab Jehovah.

20Amu kigigochi yaet tugul kogas it kit ne matilei kiy, ma ko u ye machei, ago amu inendet ne kiigochi kogas it ko u noto eng’ kamang’unet,

21si kobiit kitiach yaet komugul agine eng’ otwoknatetab ng’emisiet agoi katiaget ne bo torornatetab lagokab Jehovah.

22Amu kingen kele tigeni ak kogasei ng’wanindo yaet komugul kobotech agoi nguno.

23Ak ma u noto kityo, ago agot achek, che kitinye tongoanikab Tamirmiriet, ketigendosi agachek eng’ orit, kigeni keyaech keegu lagok, noto ko katiagetab borwekyok.

24Amu kigesoruech eng’ kamang’unet: ago kamang’unet ne kigeerei ko ma kamang’unet; amu ng’o ne imang’u noto keerei?

25Ago ngimang’u noto magigeere, kigeni noto anyun eng’ muitaet.

26Ak toreti ko u noto agine Tamirmiriet nyalulennyo: amu magingen kesa ko ye nyolu; ago saiywech Tamirmiriet inendet eng’ tigenoik che magimuchi kemwa;

27ak inendet ne isiachi mugulelwek kongen kit ne ibwati Tamirmiriet, amu saei agobo bik che tililen ko u magetab Jehovah.

28Ak kingen kele, eng’ ichek che chamei Jehovah, kotuitos tuguk tugul si kobois koreu che miach eng’ ichek che kigeguur ko u magennyi.

29Amu Jehovah ne kisib konai ichek, ko inendet ne kisib kolewen ichek si kogergeit ak itondab Werinnyi, si koek ne bo tai eng’ che tupcho che chang’:

30ak icheget che kisib kolewen, koguur choto; ak choto che kiguur, ko kiityi imanda: ak choto che kiityi imanda, ko kiitoror.

31Kimwae nee anyun eng’ tuguchuto? Ngo mi Jehovah komostanyo, ko ng’o ne kirindaech?

32Inendet ne kima rire Werinnyi, ago kigon inendet agobo achek tugul, tos magonech tuguk tugul eng’ aiyebindo koboto inendet?

33Ng’o ne itaami che kilewen Jehovah? Jehovah ne iityin imanda;

34ng’o inendet ne igikyin? Kristo Jesu ne kime, ee, inendet ne kiging’eet komong’une che kibek, ne mi eutab tai ne bo Jehovah, ne saiywech agine.

35Ibestosech ng’o eng’ chamnyetab Kristo? Nyalilda, anan bichiindo, anan usisiet anan rubet anan ach ngor, anan ng’oiyondit, anan rotwetab chok?

36Ko u ye kigisir, kele, Kibarech betut komugul agobo inye; Kigiitech ko u kechirek che bo eng’set.

37Ago, ki katerterik kot kosiir eng’ tuguchu tugul eng’ inendet ne kichamech.

38Amu angen komie ale maimuchi kobesiech meet, anan sobondo, anan malaikaisiek, anan bounatosiek, anan tuguk che mitei, anan tuguk che bwanei, anan kimnatosiek,

39anan tororindo, anan asurto, anan kiy age tugul ne kigiyai, eng’ chamnyetab Jehovah, ne mi eng’ Kristo Jesu Kiptaiyandennyo.

← Chapter 7 Jump to: Chapter 9 →