Romans 9

Kalenjin Bible (BUKUIT NE TILIL)

← Chapter 8 Jump to: Chapter 10 →

1Amwae iman eng’ Kristo, mamwae lembech, baoriani kabwatutikyuk kobota eng’ Tamirmiriet ne Tilil,

2ale atinye arogenet ne o ak ng’wanindo ne maigesugei eng’ muguleldanyu.

3Amu kata amache ale king’wanita anendet eng’ Kristo agobo tupchosiekyuk, che bikyuk eng’ borto:

4che Isrealik; che kigiyai koek lagok, che nenywa torornatet, ak kayomisutik, ak kagoitoetab Ng’atutiet, ak otetab Jehovah, ak arorutik;

5ne chechuak kwanisiek, ak nenywa Kristo eng’ atebetab borto. Iberurot koigeny Jehovah, ne bou tugul. Amen.

6Ago ma kele kogoek buch ng’olyotab Jehovah. Amu ma Israelik ichek tugul, che bo Israel:

7ama kele lagok ichek tugul, amu keswekab Abraham: ago, Kiguurtoe Isak keswondeng’ung’.

8Noto anyun, ichek ko ma lagokab borto che lagokab Jehovah; ago lagokab arorutiet che kiiti koek keswot.

9Nito anyun ko ng’olyotab arorutiet, Anyone tun kapkora eng’ kenyit ne nyonei, ak kosich Sara werit.

10Ak ma u noto kityo; ago ye kingo kagomanach Rebeka agine eng’ agenge, noto kwandanyo Isak-

11amu ye kitomo kesich lagok, koyai kiy age tugul ne mie anan ne ya, si kobiit kotonon magetab Jehovah ko u lewenet, ama bo boisionik, ago bo inendet ne kuursei,

12kigilenji inendet, Otei ne o ne ming’in.

13Agot ko u ye sirat, kele, Kiacham Jakobo, ago kiawech Esau.

14Kimwae nee anyun? Mi ne ma bo imanda eng’ Jehovah? Achicha, ma u noto.

15Amu mwachin inendet Musa kolenjin, Arire inendet ne amache arire, ak atinye rirenetab ge eng’ inendet ne amache arirege.

16Noto anyun ma bo inendet ne machei, anan inendet ne labati, ago bo Jehovah ne tinyei rirenetab ge.

17Amu mwachin siret Parao kolenjin, Kang’eetin amu ng’olyondonito ale, abartaenen kamuktaennyu, si keamdaat kainennyu eng’ ng’ony komugul.

18Noto anyun inendet ne machei korire, koriregei, ak ne machei kouuiit, kouuiiti.

19Ilenjina anyun, Amu nee si kota kocheng’ei lelutiet? Amu ng’o ne kirindoi magennyi?

20Achicha, ago, ee inye chi, i ng’o ne tos iwolji Jehovah kiy? Tos mwachin kit ne kigimimi mimiindet, kolenjin, Amu nee si iyaa ko u noto?

21Anan matinyei cheptereniot kimnatet eng’ menet, koyai eng’ kebebertab menonoto teret ne bo teegisto, ak age ne ma bo teegisto?

22Tos nee anyun, ngo machei Jehovah kobarta nereknatennyi, ak kong’any kimnatennyi, komuita eng’ talasiet ne o agobo terenik che bo neregek che nyoljin ng’emisiet:

23ak si kobiit kobarta magornatosiekab torornatennyi eng’ terenik che bo rirenetab ge che kiga sib kochopchi telunatet,

24agot achek che kiguurech, ma eng’ Yahudik kityo, ago eng’ Bororiosiek agichek?

25Ko u ye mwaei agine eng’ Hosea kole, Aguure ichek bikyuk, che kima ko bikyuk; Ak aguure inendet chamanet, ne kima ko chamanet.

26Ak eng’ oloto ole kigimwachine, kelenji, Ma o bikyuk, Keguure eng’ oloto werikab Jehovah ne sobei.

27Ak kimwa Isaia eng’ kutit ne o agobo Israel, kole, Agot ngo koitetab lagokab Israel ko te ng’aniekab nyanjet, kesoru che king’et:

28amu yaei Kiptaiyat ng’olyondennyi eng’ ng’ony, koges ak kotil konwagit.

29Ak, ko u ye kiga sib komwa Isaia kole, Nda kima bagakwech Kiptaiyatab Lugosiek keswot, Ta kiga kegergeitu ak Sodom, ak ta kiga keyaech keige Gomora.

30Kimwae nee anyun? Kimwae kele kigonor Bororiosiek imanda che kima kosubi imanda, noto ko imanda ne bo kayanet:

31ago Israel, ye kingosub ng’atutietab imanda, ko maityi Ng’atutionoto.

32Amu nee? Amu kima cheng’ eng’ kayanet, ago ko u eng’ boisionik. Kiriich ichek koita ne riichei bich;

33ko u ye sirat kole, Ogeero, andoi Sion koita ne riichei bich ak ruandet ne inachi bich: Ak ne iyani inendet ko magigochin kolilan.

← Chapter 8 Jump to: Chapter 10 →