Ruth 1

Kalenjin Bible (BUKUIT NE TILIL)

Jump to: Chapter 2 →

1Kibiit rubet eng’ emet eng’ betusiek che kiiruochi kiruogik. Kiwa chito age ne bo Bet-lehem-juda kwo komeny emetab Moab, ak osotiondennyi, ak werikyik aeng’.

2Ak kainetab chichoto ko ki Elimelek, ak kainetab osotiondennyi ko ki Naomi, ak kainaikab werikyik aeng’ ko ki Malon ak Kilion, Epratikab Bet-lehem-juda. Kiit emetab Moab, ak kotebe oloto.

3Ak kime Elimelek manong’otiotab Naomi; ak king’et inendet ak werikyik aeng’.

4Ak kiitun osotik eng’ kwonyikab Moab; kainetab age ko ki Orpa, ak kainetab age ko ki Ruth: ak kimeny oloto olo bo kenyisiek taman.

5Ak kibek tuwai Malon ak Kilion; kibegune kwonyoto lagokyik aeng’u ak manong’otiondennyi.

6King’eet inendet anyun koboto che bo werikyik, komachei koweektagei eng’ emetab Moab: amu kiga kogas eng’ emetab Moab kole kigorutochi Jehovah bikyik kogochi amitwogik.

7Ak kiwa eng’ komosta ne kimi, koboto osotik aeng’ che bo werikyik; ak kiba bandanywa koweektagei emetab Juda.

8Ak kilenji Naomi osotichoto aeng’ bo werikyik, Oba, ingoweek age tugul kwo gotab kamet: ingoyaiywok Jehovah ne mie, ko u ye kioyachi bichu kibegu, ak ko u ye kioyaiywa.

9Ingogonok Jehovah onyoru kamuung’et, age tugul eng’ okwek eng’ gotab manong’otiondennyi. Yeityo kong’utut ichek; ak kiwaach koririo.

10Ak kilenji ichek inendet, Achicha, kiweeksei tugul ole mi biguk.

11Ak kile Naomi, Oweeige, tibikyuk: amu nee si kebe tugul? Ta asiche werik alak che imuchi koek manong’otaikwok?

12Oweektege anyun, tibikyuk, oba; amu koaositu, ma kituna. Nda amwae ale, atinye kamang’unet, nda agot asiche manong’otiot kemouni, ak asich werik;

13ko kata ogeni kot koeegitu? Ko kata otebye amotinye manong’otaik? Achicha, tibikyuk; amu kona aarogen mising’ agobo okwek, amu kigonyalila eutab Jehovah.

14Ak kiwaach koririo kogeny: ak king’utut Orpa korgennyi bo yugoi; ago kiratyigei Ruth inendet.

15Ak kilenji Naomi Ruth, Keero, kagoweek kwondab bomurtang’ung’ kwo ole mi bikyik, ole mi kanamwennyi: weektege aginye isub ne bo bomurtang’ung’.

16Ak kile Ruth, Amegaigaa abagachin, aweek awa ga amasubin: amu ole iwendi awendi; ak ole itebe atebe agane: egu biguk bikyuk, ak egu Kamuktaindeng’ung’ Kamuktaindennyu:

17ole imechini, amechini agane, ak ketupcha yoto: ingoyaiywa Jehovah ko u noto, ak kotes, kobate meet inegei ne ibestosech ane ak inye.

18Ak kingogeer Naomi kole, kiga kobegechi koba tuwai, ko mata kong’alalji inendet.

19Kiba tuwai anyun kot koit Bet-lehem. Kingoit Bet-lehem, kochirjiren nganaset komugul agobo ichek, ak kile gotab kor, Naomi nito?

20Ak kilenji ichek, Amat oguurena Naomi, oguurena Mara: amu kigoyaiywa Inendet ne bo Kamuktaet kit ne ng’wan.

21Kiawendi ko a nyiitat, ak kogomutwa Jehovah ga ami buch: amu nee si oguurena Naomi, amu kigobaorian Jehovah kogikya, kigonyalila Inendet ne bo Kamuktaet?

22Kiweek anyun Naomi, koboto Ruth Jemoabindet, osotiotab werinnyi, che kiweek eng’ emetab Moab: ak kiit Bet-lehem eng’ taunetab kesisietab sairik.

Jump to: Chapter 2 →