2 Chronicles 24

Khmer 2005 (ព្រះគម្ពីរភាសាខ្មែរបច្ចុប្បន្ន ២០០៥)

← Chapter 23 Jump to: Chapter 25 →

1ព្រះ‌បាទយ៉ូអាសឡើងសោយរាជ្យ ក្នុងជន្មាយុប្រាំ‌ពីរព្រះ‌វស្សា ទ្រង់សោយរាជ្យបានសែ‌សិបឆ្នាំ នៅក្រុងយេរូ‌សាឡឹម។ មាតារបស់ស្ដេចមាននាមថា ស៊ីប‌យ៉ា ជាអ្នកស្រុកបៀរ‌សេ‌បា។

2ព្រះ‌បាទយ៉ូអាសប្រព្រឹត្តអំពើសុចរិត ជាទីគាប់ព្រះ‌ហឫទ័យ ព្រះ‌អម្ចាស់ អស់មួយជីវិតរបស់លោកបូជា‌ចារ្យយេហូ‌យ៉ាដា។

3លោកយេហូ‌យ៉ាដារកបានមហេសីពីរអង្គមកថ្វាយព្រះ‌បាទយ៉ូអាស ហើយស្ដេចបង្កើតបានបុត្រាបុត្រីជាច្រើន។

4ក្រោយមក ព្រះ‌បាទយ៉ូអាសមានបំណងជួស‌ជុលព្រះ‌ដំណាក់របស់ ព្រះ‌អម្ចាស់ ។

5ស្ដេចកោះហៅក្រុមបូជា‌ចារ្យ និងក្រុមលេវី ឲ្យមកជួប‌ជុំគ្នា ហើយមានរាជ‌ឱង្ការថា៖ «សូមអស់លោកអញ្ជើញទៅតាមក្រុងនានាក្នុងស្រុកយូដា ហើយរៀងរាល់ឆ្នាំ ត្រូវប្រមូលប្រាក់ក្នុងស្រុកអ៊ីស្រា‌អែលទាំងមូល ដើម្បីជួស‌ជុលព្រះ‌ដំណាក់នៃព្រះរបស់អស់លោក។ សូមសម្រេចការនេះឲ្យបានឆាប់ៗផង»។ ប៉ុន្តែ ក្រុមលេវីពុំបានធ្វើការនេះឲ្យបានរួស‌រាន់ទេ។

6ព្រះ‌រាជាក៏ត្រាស់ហៅលោកមហាបូជា‌ចារ្យយេហូ‌យ៉ាដាមក ហើយមានរាជ‌ឱង្ការថា៖ «ហេតុអ្វីបានជាលោកមិនទាម‌ទារឲ្យក្រុមលេវីប្រមូលប្រាក់ ដែលប្រជា‌ជននៅស្រុកយូដា និងក្រុងយេរូ‌សាឡឹម ត្រូវយកមកបង់ ដូចលោកម៉ូសេ ជាអ្នកបម្រើរបស់ ព្រះ‌អម្ចាស់ បានបង្គាប់ឲ្យសហគមន៍អ៊ីស្រា‌អែលយកមកថ្វាយសម្រាប់ពន្លានៃសន្ធិ‌សញ្ញា?

7ម្ចាស់‌ក្សត្រិយ៍អថា‌លាដ៏អប្រិយ និងបរិវាររបស់គាត់ បានបំផ្លាញព្រះ‌ដំណាក់របស់ព្រះ‌ជាម្ចាស់ ហើយយកវត្ថុសក្ការៈទាំងប៉ុន្មាននៅក្នុងព្រះ‌ដំណាក់របស់ ព្រះ‌អម្ចាស់ ទៅប្រើ‌ប្រាស់សម្រាប់ព្រះបាល»។

8ពេលនោះ ព្រះ‌រាជាឲ្យគេធ្វើហិបមួយ យកទៅដាក់នៅខាងមុខមាត់ទ្វារចូលព្រះ‌ដំណាក់របស់ ព្រះ‌អម្ចាស់ ។

9គេចេញប្រកាសនៅស្រុកយូដា និងនៅក្រុងយេរូ‌សាឡឹម ឲ្យប្រជា‌ជនយកពន្ធដារមកថ្វាយ ព្រះ‌អម្ចាស់ ដូចលោកម៉ូសេ ជាអ្នកបម្រើរបស់ ព្រះ‌អម្ចាស់ បានបង្គាប់ដល់ជន‌ជាតិអ៊ីស្រា‌អែលនៅវាលរហោ‌ស្ថាន។

10មេដឹកនាំទាំងអស់ និងប្រជា‌ជនទាំងមូល នាំគ្នាយកប្រាក់មកថ្វាយ ដោយចិត្តសប្បាយ។ គេដាក់ប្រាក់នៅក្នុងហិបរហូតដល់ពេញ។

11លុះដល់ពេលដែលត្រូវនាំហិប ទៅឲ្យក្រុមលេវីត្រួតពិនិត្យមើលក្នុងនាមព្រះ‌រាជា គឺនៅពេលដែលគេឃើញមានប្រាក់ច្រើននៅក្នុងហិបហើយ លោកស្មៀនហ្លួង និងលោកអធិ‌ការអមមហា‌បូជា‌ចារ្យ ក៏មកយកប្រាក់ចេញពីហិប នាំយកទៅ ដោយទុកហិបនៅកន្លែងដើមវិញ។ គេធ្វើបែបនេះ ជារៀងរាល់ថ្ងៃ ហើយទទួលបានប្រាក់យ៉ាងច្រើន។

12ព្រះ‌រាជា និងលោកយេហូ‌យ៉ាដាប្រគល់ប្រាក់នោះទៅឲ្យពួកមេជាង ដែលទទួលបន្ទុកលើការ‌ងារជួស‌ជុលព្រះ‌ដំណាក់របស់ ព្រះ‌អម្ចាស់ ។ ពួកមេជាងបានជួលកម្មករមកជួស‌ជុលព្រះ‌ដំណាក់របស់ ព្រះ‌អម្ចាស់ ឡើងវិញ គឺមានជាងដាប់ថ្ម និងជាងឈើ ព្រមទាំងជួលជាងដែក និងជាងលង្ហិនសម្រាប់ជួស‌ជុលព្រះ‌ដំណាក់របស់ ព្រះ‌អម្ចាស់ ដែរ។

13មេជាងទាំងនោះនាំគ្នាបំពេញកិច្ចការ ដោយដឹកនាំការជួលជុលទាំងអស់ ធ្វើឲ្យព្រះ‌ដំណាក់របស់ព្រះ‌ជាម្ចាស់បានល្អ និងមាំ ដូចដើមឡើងវិញ។

14ក្រោយជួស‌ជុលព្រះ‌ដំណាក់ចប់សព្វគ្រប់ហើយ ពួកគេយកប្រាក់ដែលនៅសល់មកថ្វាយព្រះ‌រាជា និងប្រគល់ជូនលោកយេហូ‌យ៉ាដា។ គេក៏យកប្រាក់នោះទៅធ្វើប្រដាប់ប្រដាសម្រាប់ប្រើ‌ប្រាស់ក្នុងព្រះ‌ដំណាក់របស់ ព្រះ‌អម្ចាស់ គឺមានគ្រឿងបរិក្ខារសម្រាប់ពិធីផ្សេងៗ គ្រឿងបរិក្ខារសម្រាប់តង្វាយដុតទាំងមូល ពែង ព្រមទាំងរបស់ឯទៀតៗធ្វើពីមាស និងប្រាក់។ ក្នុងមួយជីវិតរបស់លោកយេហូ‌យ៉ាដា គេតែងតែថ្វាយតង្វាយដុតទាំងមូលជាអចិន្ត្រៃយ៍ នៅក្នុងព្រះ‌ដំណាក់របស់ ព្រះ‌អម្ចាស់ ។

15លោកយេហូ‌យ៉ាដាមានវ័យកាន់តែចាស់ជរា និងមានអាយុវែង រួចលោកទទួលមរណ‌ភាពក្នុងជន្មាយុមួយរយសាម‌សិបឆ្នាំ។

16គេបញ្ចុះសពលោកនៅបុរីព្រះ‌បាទដាវីឌជាមួយស្ដេច ដ្បិតលោកបានប្រព្រឹត្តល្អចំពោះប្រជា‌ជនអ៊ីស្រា‌អែល ចំពោះព្រះ‌ជាម្ចាស់ និងព្រះ‌ដំណាក់របស់ព្រះអង្គ។

17ក្រោយពេលលោកយេហូ‌យ៉ាដាទទួលមរណ‌ភាពផុតទៅ ពួកមេដឹកនាំរបស់ជន‌ជាតិយូដានាំគ្នាមកក្រាបថ្វាយ‌បង្គំព្រះ‌រាជា ហើយព្រះ‌រាជាទ្រង់ព្រះ‌សណ្ដាប់ពួកគេ។

18ពួកគេបោះបង់ចោលព្រះ‌ដំណាក់របស់ ព្រះ‌អម្ចាស់ ជាព្រះនៃបុព្វបុរសរបស់ខ្លួន ហើយគោរពបម្រើព្រះ‌អាសេ‌រ៉ា និងព្រះក្លែង‌ក្លាយឯទៀតៗ។ កំហុសនេះបណ្ដាលឲ្យ ព្រះ‌អម្ចាស់ ទ្រង់ព្រះ‌ពិរោធទាស់នឹងអ្នកស្រុកយូដា ព្រមទាំងអ្នកក្រុងយេរូ‌សាឡឹម។

19ព្រះ‌អម្ចាស់ បានចាត់ពួកព្យាកា‌រីទៅក្នុងចំណោមពួកគេ ដើម្បីណែ‌នាំពួកគេឲ្យវិលមករកព្រះអង្គវិញ។ ព្យាកា‌រីប្រៀន‌ប្រដៅពួកគេ តែពួកគេមិនយកចិត្តទុកដាក់ស្ដាប់ឡើយ។

20ព្រះ‌វិញ្ញាណរបស់ព្រះ‌ជាម្ចាស់យាងមកសណ្ឋិតលើលោកសាកា‌រី ដែលត្រូវជាកូនរបស់លោកបូជា‌ចារ្យយេហូ‌យ៉ាដា។ លោកប្រឈមមុខទល់នឹងប្រជា‌ជន ហើយប្រកាសថា៖ «ព្រះ‌ជាម្ចាស់មានព្រះ‌បន្ទូលដូចតទៅ: ហេតុអ្វីបានជាអ្នករាល់គ្នាបំពានលើបទ‌បញ្ជារបស់ព្រះ‌អម្ចាស់? ដោយអ្នករាល់គ្នាបោះបង់ចោល ព្រះ‌អម្ចាស់ ព្រះអង្គក៏នឹងបោះបង់ចោលអ្នករាល់គ្នា។ ដូច្នេះ អ្នករាល់គ្នាធ្វើអ្វី ក៏មិនបានសម្រេចដែរ»។

21ប្រជា‌ជនឃុបឃិតគ្នាប្រឆាំងនឹងលោកសាកា‌រី ហើយគេយកដុំថ្មគប់សម្លាប់លោក នៅក្នុងទីធ្លាព្រះ‌ដំណាក់របស់ ព្រះ‌អម្ចាស់ តាមបញ្ជារបស់ស្ដេច។

22ព្រះ‌បាទយ៉ូអាសពុំនឹកឃើញសេចក្ដីសប្បុរសដែលលោកយេហូ‌យ៉ាដា ជាឪពុករបស់លោកសាកា‌រី បានសម្តែងចំពោះស្ដេចទេ គឺស្ដេចប្រហារជីវិតកូនរបស់លោក។ នៅពេលស្លាប់ លោកសាកា‌រីពោលថា៖ «សូម ព្រះ‌អម្ចាស់ ទតមើល ហើយរកយុត្តិធម៌ចុះ!»។

23មួយឆ្នាំកន្លងមកទៀត កង‌ទ័ពស៊ីរីបានឡើងមកវាយព្រះ‌បាទយ៉ូអាស។ ពួកគេមកដល់ស្រុកយូដា និងក្រុងយេរូ‌សាឡឹម។ ពួកគេកាប់សម្លាប់មេដឹកនាំទាំងប៉ុន្មានរបស់ប្រជា‌ជន ហើយបញ្ជូនជយ‌ភណ្ឌទាំងអស់ទៅថ្វាយស្ដេចនៅក្រុងដាម៉ាស។

24កង‌ទ័ពស៊ីរីមានចំនួនតែបន្តិចប៉ុណ្ណោះ តែ ព្រះ‌អម្ចាស់ បានប្រគល់កង‌ទ័ពយូដាដែលមានគ្នាច្រើន ទៅក្នុងកណ្ដាប់ដៃរបស់ពួកគេ ព្រោះជន‌ជាតិយូដាបោះបង់ចោល ព្រះ‌អម្ចាស់ ជាព្រះនៃបុព្វបុរសរបស់ខ្លួន។ ដូច្នេះ ព្រះ‌ជាម្ចាស់បានប្រើជន‌ជាតិស៊ីរី សម្រាប់ដាក់ទោសព្រះ‌បាទយ៉ូអាស។

25បន្ទាប់មក កង‌ទ័ពស៊ីរីចាកចេញទៅ ទុកឲ្យព្រះ‌បាទយ៉ូអាសប្រឈួនជាទម្ងន់។ ពួករាជបម្រើឃុបឃិតគ្នាប្រឆាំងនឹងស្ដេច ដើម្បីសង‌សឹកចំពោះឃាត‌កម្មទៅលើកូនរបស់លោកបូជា‌ចារ្យយេហូ‌យ៉ាដា។ គេធ្វើគុតស្ដេចនៅក្នុងក្រឡា‌បន្ទំ រួចយកសពទៅបញ្ចុះនៅបុរីព្រះ‌បាទដាវីឌ តែគេមិនបញ្ចុះនៅក្នុងផ្នូរ ជាមួយស្ដេចឯទៀតៗទេ។

26អ្នកដែលបានឃុបឃិតគ្នាធ្វើគុតស្ដេច គឺលោកសាបាដ ជាកូនរបស់ស្ត្រីសាសន៍អាំម៉ូន ឈ្មោះស៊ីម៉ាត និងលោកយ៉ូសា‌បាដ ជាកូនរបស់ស្ត្រីសាសន៍ម៉ូអាប់ ឈ្មោះស៊ីមរីត។

27រីឯចំនួនបុត្ររបស់ស្ដេច និងសេចក្ដីជាច្រើនដែលព្យាកា‌រីថ្លែងប្រឆាំងនឹងស្ដេច ព្រមទាំងកំណត់ហេតុស្ដីអំពីការជួស‌ជុលព្រះ‌ដំណាក់របស់ព្រះ‌ជាម្ចាស់ សុទ្ធតែមានកត់‌ត្រាទុកក្នុងសៀវភៅអធិ‌ប្បាយរបស់ព្រះ‌មហា‌ក្សត្រ។ ព្រះ‌បាទអម៉ា‌ស៊ីយ៉ា ជាបុត្រ បានឡើងស្នងរាជ្យ។

← Chapter 23 Jump to: Chapter 25 →