Proverbs 22

Khmer 2014 (អាល់គីតាប)

← Chapter 21 Jump to: Chapter 23 →

1ស៊ូមានកេរ្តិ៍ឈ្មោះល្អជាជាងមានទ្រព្យសម្បត្តិស្ដុក‌ស្ដម្ភ។ មានគេរាប់អានច្រើនប្រសើរជាងមានមាសប្រាក់។

2អ្នកមាន និងអ្នកក្រ ជាមនុស្សដូចគ្នា ដ្បិត អុលឡោះ‌តាអាឡា បានបង្កើតគេមកទាំងពីរនាក់។

3កាលមនុស្សឆ្លាតឃើញគ្រោះកាចមកដល់ គេលាក់ខ្លួន រីឯមនុស្សឥតគំនិតអោនក្បាលដើរទៅមុខ ហើយត្រូវបង់ខាតធ្ងន់។

4មនុស្សរាបសាតែងតែគោរពកោតខ្លាច អុលឡោះ‌តាអាឡា គេនឹងទទួលទ្រព្យសម្បត្តិ កិត្តិយស និងមានអាយុវែង។

5ផ្លូវអសីល‌ធម៌មានសុទ្ធតែបន្លា និងអន្ទាក់។ អ្នកស្រឡាញ់ជីវិតតែងតែដើរចៀស‌ឆ្ងាយពីផ្លូវនោះ។

6ចូរអប់រំកូនក្មេងឲ្យមានទំលាប់ល្អ តាំងពីតូច គេនឹងរក្សាទំលាប់នេះរហូតដល់ចាស់។

7អ្នកមានតែងតែជិះ‌ជាន់អ្នកក្រ រីឯកូនបំណុលជាទាសកររបស់ម្ចាស់ប្រាក់។

8អ្នកសាបព្រោះអំពើអាក្រក់តែងតែទទួលគ្រោះកាច ហើយកម្លាំងដែលជំរុញគេឲ្យប្រព្រឹត្តអំពើឃោរ‌ឃៅ នឹងរលាយសូន្យទៅ។

9មនុស្សមានចិត្តសប្បុរសតែងតែទទួលពរ ដ្បិតគេចែកអាហារដល់ជនទុគ៌ត។

10បំបាត់មនុស្សចំអកឡក‌ឡឺយ ជំលោះក៏បាត់អស់ដែរ ការឈ្លោះប្រកែក និងការមើល‌ងាយ លែងមានទៀតហើយ។

11អ្នកណាប្រកាន់ចិត្តបរិសុទ្ធ ហើយមានពាក្យសំដីសុភាពរាបសា អ្នកនោះនឹងបានគាប់ចិត្តស្ដេច។

12អុលឡោះ‌តាអាឡា តែងតែថែ‌រក្សាការយល់ដឹងដ៏ត្រឹម‌ត្រូវ តែទ្រង់ផ្ចាញ់‌ផ្ចាលពាក្យសំដីរបស់មនុស្សពាល។

13មនុស្សកំជិលតែងពោលថា «មានសត្វសិង្ហមួយនៅខាងក្រៅ វាមុខជាហែកខ្ញុំស៊ីនៅកណ្ដាលផ្លូវមិនខាន»។

14ពាក្យសំដីរបស់ស្ត្រីក្បត់ប្ដីជាអន្ទាក់មួយគួរឲ្យព្រឺខ្លាច អ្នកដែល អុលឡោះ‌តាអាឡា មិនពេញចិត្តតែងតែជាប់អន្ទាក់នោះ។

15ក្មេងៗតែងតែជំពាក់ចិត្តនឹងភាពល្ងី‌ល្ងើ ការវាយប្រដៅនឹងនាំវាឲ្យចេញឆ្ងាយពីភាពល្ងី‌ល្ងើនោះ។

16ជនទុគ៌តដែលត្រូវគេសង្កត់‌សង្កិនមុខជាបានចំរើន រីឯអ្នកដែលយកទ្រព្យទៅឲ្យអ្នកមាន នឹងបណ្ដាលឲ្យធ្លាក់ខ្លួនក្រ។

17ចូរផ្ទៀងត្រចៀកស្ដាប់អ្នកប្រាជ្ញ ចូរយកចិត្តទុកដាក់នឹងការយល់ដឹងរបស់ខ្ញុំ

18នោះអ្នកនឹងសប្បាយចិត្ត ដោយចង‌ចាំ ហើយត្រៀមខ្លួនស្រដីចេញមកជា‌និច្ច។

19ខ្ញុំចង់ឲ្យអ្នកស្គាល់ការយល់ដឹងនៅថ្ងៃនេះ ដើម្បីឲ្យអ្នកផ្ញើជីវិតលើ អុលឡោះ‌តាអាឡា ។

20ខ្ញុំបានកត់‌ត្រាទុកនូវឱវាទ និងដំបូន្មានផ្សេងៗ ចំនួនសាម‌សិបសម្រាប់អ្នក

21ដើម្បីឲ្យអ្នកស្គាល់ការត្រឹម‌ត្រូវ និងការពិត ហើយអ្នកអាចផ្ដល់ចម្លើយដ៏ពិតប្រាកដដល់មនុស្ស ដែលចាត់អ្នកឲ្យមក។

22កុំរឹប‌អូសយកទ្រព្យពីជនទុគ៌ត ព្រោះតែឃើញគ្នាទន់ខ្សោយ ហើយកុំសង្កត់‌សង្កិនជនក្រីក្រដែលគ្មានអ្នកការពារ

23ដ្បិត អុលឡោះ‌តាអាឡា នឹងរកយុត្តិធម៌ឲ្យពួកគេ ហើយដកហូតយកជីវិតពីអស់អ្នកដែលរឹប‌អូសយកទ្រព្យរបស់ពួកគេ។

24កុំសេព‌គប់នឹងមនុស្សឆាប់ខឹង ហើយរួមគំនិតជាមួយមនុស្សកំរោល

25ក្រែង‌លោអ្នកយកតម្រាប់តាមគេ ហើយនាំឲ្យជីវិតរបស់អ្នកជាប់អន្ទាក់។

26កុំធានា ឬសន្យាសងបំណុលជួសអ្នកដទៃឡើយ។

27បើអ្នកគ្មានអ្វីសងទេ គេមុខជាដកហូតយកគ្រែដេករបស់អ្នកពុំ‌ខាន។

28កុំដកបង្គោលព្រំចម្ការ ដែលដូនតារបស់អ្នកបានបោះទុកនោះឡើយ។

29ប្រសិនបើអ្នកឃើញមនុស្សម្នាក់ប៉ិន‌ប្រសប់បំពេញការ‌ងាររបស់ខ្លួន តោងដឹងថា អ្នកនោះអាចចូលបម្រើស្ដេច គឺគេមិនស្ថិតក្នុងចំណោមមនុស្សដែលគ្មានកេរ្តិ៍ឈ្មោះឡើយ។

← Chapter 21 Jump to: Chapter 23 →