Proverbs 8

Khmer 2014 (អាល់គីតាប)

← Chapter 7 Jump to: Chapter 9 →

1ចូរត្រង‌ត្រាប់ស្ដាប់! ប្រាជ្ញាញាណរបស់អុលឡោះស្រែកប្រកាសហើយ! តម្រិះក៏បន្លឺសំឡេងឡើងដែរ!

2ប្រាជ្ញាញាណរបស់អុលឡោះឈរលើទួល ក្បែរមាត់ផ្លូវ និងនៅត្រង់ផ្លូវបំបែក

3ក្បែរមាត់ទ្វារក្រុង នៅតាមផ្លូវចេញចូល ហើយស្រែកឡើងថា៖

4បណ្ដា‌ជនទាំង‌ឡាយអើយ! ខ្ញុំស្រែកហៅអ្នករាល់គ្នា ខ្ញុំចង់និយាយជាមួយមនុស្សលោកទាំងអស់។

5មនុស្សមិនដឹងខុសត្រូវអើយ ចូររៀនពិចារណាឡើង មនុស្សឥតប្រាជ្ញាអើយ ចូររៀនឲ្យមានតម្រិះឡើង។

6ចូរនាំគ្នាស្ដាប់ ដ្បិតខ្ញុំមានសេចក្ដីសំខាន់ៗប្រាប់អ្នករាល់គ្នា ខ្ញុំនិយាយទូន្មានអ្នករាល់គ្នាអំពីផ្លូវទៀង‌ត្រង់

7ខ្ញុំថ្លែងប្រាប់តែសេចក្ដីពិតប៉ុណ្ណោះ ខ្ញុំមិនចូលចិត្តនិយាយសេចក្ដីអាក្រក់ឡើយ។

8អ្វីៗដែលខ្ញុំនិយាយសុទ្ធតែទៀង‌ត្រង់ គឺគ្មានពាក្យវៀច‌វេរ ឬបោក‌បញ្ឆោតទេ។

9អ្នកមានតម្រិះយល់ថា ពាក្យខ្ញុំស្រួលស្ដាប់ រីឯអស់អ្នកចេះដឹងក៏យល់ថា ខ្ញុំនិយាយត្រឹមត្រូវមែនដែរ។

10ចូរទទួលដំបូន្មានខ្ញុំជាជាងទទួលប្រាក់ រីឯការចេះដឹងមានតម្លៃ លើសមាសទឹក‌ដប់ទៅទៀត។

11ប្រាជ្ញាមានតម្លៃជាងត្បូងពេជ្រ គ្មានរបស់អ្វីមានតម្លៃស្មើនឹងប្រាជ្ញាឡើយ។

12ខ្ញុំជាប្រាជ្ញា ការពិចារណាស្ថិតនៅជាប់ជាមួយខ្ញុំ ខ្ញុំមានតម្រិះរិះ‌គិត ដោយសុភ‌និច្ឆ័យ។

13អ្នកគោរពកោតខ្លាច អុលឡោះ‌តាអាឡា តែងតែស្អប់អំពើអាក្រក់ ខ្ញុំមិនចូលចិត្តការអួតបំប៉ោង ការព្រហើន អំពើអាក្រក់ និងការពោលពាក្យបោក‌បញ្ឆោតឡើយ។

14ខ្ញុំមានប្រាជ្ញា និងយោបល់ ខ្ញុំផ្ដល់តម្រិះ និងកម្លាំង

15ស្ដេចទាំង‌ឡាយគ្រប់‌គ្រងស្រុក ដោយ‌សារខ្ញុំ ហើយមេដឹកនាំទាំង‌ឡាយ តែងច្បាប់ដ៏ត្រឹមត្រូវ ក៏ដោយ‌សារខ្ញុំដែរ។

16អ្នកធំទាំង‌ឡាយត្រួត‌ត្រាស្រុក ដោយ‌សារខ្ញុំ ហើយពួកនាម៉ឺនជាចៅ‌ក្រមដ៏សុចរិតក៏ដោយ‌សារខ្ញុំដែរ។

17អ្នកណាស្រឡាញ់ខ្ញុំ ខ្ញុំស្រឡាញ់អ្នកនោះវិញ អ្នកណាស្វែងរកខ្ញុំ អ្នកនោះពិតជារកឃើញ។

18ខ្ញុំផ្ដល់ទ្រព្យសម្បត្តិ និងសិរី‌រុង‌រឿង ភាពចំរុង‌ចំរើន និងសេចក្ដីសុចរិត។

19ផលផ្លែរបស់ខ្ញុំមានតម្លៃជាងមាសទឹក‌ដប់ អ្វីៗដែលខ្ញុំផ្ដល់ឲ្យ មានតម្លៃជាងប្រាក់សុទ្ធទៅទៀត។

20ខ្ញុំដើរតាមមាគ៌ាដ៏សុចរិត និងប្រព្រឹត្តតាមផ្លូវយុត្តិធម៌។

21ខ្ញុំផ្ដល់ទ្រព្យសម្បត្តិយ៉ាងបរិបូណ៌ ឲ្យអ្នកដែលស្រឡាញ់ខ្ញុំ។

22អុលឡោះ‌តាអាឡា បានបង្កើតខ្ញុំតាំងពីដើមដំបូងបង្អស់ គឺមុនអ្វីៗដែលទ្រង់បង្កើតមកទៅទៀត។

23ទ្រង់បានចាក់ប្រេងតែង‌តាំងខ្ញុំ តាំងពីអស់‌កល្បរៀងមក គឺនៅគ្រាដំបូងបង្អស់ មុនកំណើតពិភព‌លោកទៅទៀត។

24កាលខ្ញុំកើតមក មិនទាន់មានជម្រៅទឹក ហើយក៏មិនទាន់មានប្រភពទឹកដែរ។

25ទ្រង់បង្កើតខ្ញុំមក មុនទ្រង់ធ្វើឲ្យភ្នំធំភ្នំតូចលេចឡើង។

26ពេលនោះ ទ្រង់មិនទាន់បង្កើតផែនដី និងលំហអាកាសទេ ហើយក៏មិនទាន់បង្កើតធាតុដើមផ្សេងៗដែរ។

27កាលអុលឡោះ‌តាអាឡាលាតសន្ធឹងផ្ទៃមេឃ និងគូរ‌វាសជើងមេឃពីលើមហាសមុទ្រ ខ្ញុំក៏នៅទីនោះដែរ។

28កាលទ្រង់ដាក់ពពកនៅលើអាកាស ហើយកាលប្រភពទឹកផុសចេញយ៉ាងខ្លាំង ពីទីជម្រៅ

29កាលទ្រង់កំណត់ព្រំ‌ដែនសមុទ្រ ដើម្បីខណ្ឌទឹកកុំឲ្យហៀរចេញ កាលទ្រង់ចាក់គ្រឹះផែនដី

30នៅគ្រានោះ ខ្ញុំជាមេជាងជួយធ្វើការជូនទ្រង់ ហើយខ្ញុំធ្វើឲ្យទ្រង់មានអំណរ ជារៀងរាល់ថ្ងៃ ខ្ញុំកំសាន្តនៅចំពោះទ្រង់ គ្រប់ពេលវេលា។

31ខ្ញុំកំសាន្តនៅលើដីដែលទ្រង់បានបង្កើត ខ្ញុំមានអំណរនៅក្នុងចំណោមមនុស្សលោក។

32ឥឡូវនេះ កូនអើយ ចូរនាំគ្នាស្ដាប់ឪពុក អ្នកណាប្រតិបត្តិតាមមាគ៌ារបស់ឪពុក អ្នកនោះពិតជាមានសុភ‌មង្គល!។

33ចូរស្ដាប់ដំបូន្មានរបស់ឪពុក ដោយឥតធ្វេស‌ប្រហែសឡើយ នោះកូននឹងទៅជាអ្នកមានប្រាជ្ញា។

34អ្នកណាស្ដាប់ខ្ញុំ ហើយឈរយាមមាត់ទ្វារខ្ញុំជារៀងរាល់ថ្ងៃ អ្នកនោះពិតជាមានសុភ‌មង្គល។

35អ្នកណារកខ្ញុំឃើញ អ្នកនោះមានជីវិត ហើយ អុលឡោះ‌តាអាឡា ពេញចិត្តនឹងអ្នកនោះ។

36អ្នកណារកខ្ញុំមិនឃើញ អ្នកនោះធ្វើបាបខ្លួនឯង អ្នកណាស្អប់ខ្ញុំ អ្នកនោះស្រឡាញ់សេចក្ដីស្លាប់។

← Chapter 7 Jump to: Chapter 9 →