Song of Solomon 3

Khmer 2014 (អាល់គីតាប)

← Chapter 2 Jump to: Chapter 4 →

1ពេលយប់នៅលើគ្រែ ខ្ញុំស្វែងរកម្ចាស់ចិត្តរបស់ខ្ញុំ ខ្ញុំស្វែងរកគាត់ តែរកពុំឃើញទេ។

2ខ្ញុំក៏ក្រោកឡើង ដើរពាស‌ពេញទីក្រុង ដើម្បីស្វែងរកម្ចាស់ចិត្តរបស់ខ្ញុំ នៅតាមផ្លូវ នៅតាមផ្សារ ខ្ញុំស្វែងរកគាត់ តែរកពុំឃើញឡើយ។

3ខ្ញុំបានជួបនឹងពួកអ្នកយាម‌ល្បាតទីក្រុង ខ្ញុំសួរថា «តើអ្នករាល់គ្នាបានឃើញ ម្ចាស់ចិត្តរបស់ខ្ញុំទេ?»

4ខ្ញុំដើរហួសពួកអ្នកយាម‌ល្បាតបន្តិចទៅ ខ្ញុំក៏បានជួបម្ចាស់ចិត្តរបស់ខ្ញុំ។ ខ្ញុំឱបបងជាប់ ឥតដកដៃឡើយ ខ្ញុំនាំបងចូលទៅក្នុងផ្ទះរបស់ម្ដាយខ្ញុំ ចូលទៅក្នុងបន្ទប់របស់ម្ដាយ ដែលបានបង្កើតខ្ញុំមក។

5ស្រីក្រមុំនៅក្រុងយេរូ‌សាឡឹមអើយ ខ្ញុំសូមប្រាប់ពួកនាង ដោយយកសត្វក្ដាន់ និងសត្វប្រើស ធ្វើជាសាក្សីថា មុននឹងម្ចាស់ចិត្តរបស់នាងយល់ស្រប កុំដាស់សេចក្ដីស្រឡាញ់ឡើយ។

6តើនរណាឡើងពីវាលរហោ‌ស្ថាន ដូចកំសួលផ្សែង ដូចពពកដែលមានក្លិនទេព្វិរូ គ្រឿងក្រអូប និងម្សៅក្រអូបរបស់អ្នកជំនួញ?

7នេះជាគ្រែស្នែងរបស់ស្តេចស៊ូឡៃ‌ម៉ាន ដែលហែ‌ហមដោយទាហានដ៏អង់‌អាច ចំនួនហុក‌សិបនាក់ គឺជាទាហានដ៏អង់‌អាចជាងគេ នៃកង‌ទ័ពអ៊ីស្រ‌អែល។

8អ្នកទាំងនោះប្រដាប់អាវុធ រៀបចំខ្លួនធ្វើសឹកសង្គ្រាម។ ម្នាក់ៗស្ពាយដាវ ត្រៀមខ្លួនតទល់នឹង ភាពអាសន្ន នៅពេលយប់។

9ស្តេចស៊ូឡៃ‌ម៉ានបានធ្វើគ្រែស្នែងមួយ ពីឈើស្រុកលីបង់។

10ស្ដេចបានធ្វើបង្គោលពីប្រាក់ បង្អែកពីមាស រីឯខ្នើយធ្វើពីក្រណាត់ពណ៌ក្រហមទុំ។ ផ្នែកខាងក្នុងលំអ ដោយក្រណាត់ប៉ាក់ ជាស្នា‌ដៃរបស់ស្ត្រីៗក្រុងយេរូ‌សាឡឹម ដែលបំពេញកិច្ចការនេះដោយចិត្តស្រឡាញ់។

11ស្ត្រីនៅក្រុងស៊ីយ៉ូនអើយ ចូរនាំគ្នាចេញមកមើលស្តេចស៊ូឡៃ‌ម៉ាន ស្ដេចពាក់មកុដដែលម្តាយបានបំពាក់ជូន នៅថ្ងៃស្ដេចរៀបអាពាហ៍‌ពិពាហ៍ ជាថ្ងៃដែលស្ដេចមានចិត្តរីក‌រាយ។

← Chapter 2 Jump to: Chapter 4 →